ރައީސުލްޖުމްހޫރިއްޔާ މިރޭ ގައުމާ މުޚާތަބު ކުރައްވަނީ

ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހު، މިރެ ގައުމާ މުޚާތަބު ކުރައްވާނެ ކަމަށް ރައީސް އޮފީހުގެ ތަރުޖަމާން މުޙައްމަދު މަބްރޫކް އަޒީޒު ވިދާޅުވެއްޖެ އެވެ.

މަބްރޫކް ކުރައްވާފައިވާ ޓްވީޓެއްގައި ވިދާޅުވީ ކުޑަ އިރުކޮޅެއްގެ ތެރޭގައި ރައީސް ޤައުމާއި މުޚާތަބު ކުރައްވާނެ ކަމަށެވެ. އަދި އެމަނިކުފާނު ގައުމާ މުޚާތަބު ކުރައްވާނީ ޓީވީ މެދުވެރިކޮށް ކަމަށެވެ.

އިޝްތިހާރު

ރައީސުލްޖުމްހޫރިއްޔާ @ibusolih މިރޭ ޓީވީތައް މެދުވެރިކޮށް ޤައުމާ މުޚާތަބުކުރައްވާނެ.

މިކަމާ ގުޅޭ އިތުރު މަޢުލޫމާތު ކުޑަ ވަގުތުކޮޅެއްގެ ތެރޭގައި ހިއްސާކުރާނަން.

— Miuvaan Mohamed (@MvSpokesperson) May 6, 2021

ރައީސް ގައުމާ މުޚާތަބު ކުރެއްވުމަށް ނިންމަވާފައި މިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ޙަމަލާއެއް ދީފައިވާ ދަނޑިވަޅެއްގަ އެވެ.

ރޭ ދީފައިވާ ހަމަލާއާ ގުޅިގެން ރައީސުލްޖުމްހޫރިއްޔާ ކެބިނެޓްގެ ކުއްލި ބައްދަލުވުމެއް ވެސް ބާއްވާފައިވާ އިރު، ކެބިނެޓް ބައްދަލުވުމުގެ ކުރީން ރައީސުލްޖުމްހޫރިއްޔާ އާއި ނޭޝަނަލް ސެކިއުރިޓީ ކައުންސިލްގެ މެންބަރުންވެސް ވަނީ ބައްދަލު ކުރައްވާފައެވެ.

މަބުރޫކް ވިދާޅުވީ ރައީސް މުހައްމަދު ނަޝީދަށް މިރޭ ދީފައިވާ ނުރައްކާތެރި ހަމަލާ ދިވެހި ސަރުކާރުން ކުށްވެރިކުރާ ކަމަށެވެ. އަދި މި މައްސަލަ މިހާރު ދިވެހި ފުލުހުންނާއި ސިފައިން ތަހުގީގު ކުރަމުންދާ ކަމަށް ވަނީ ވިދާޅުވެފައެވެ.

ރައްޔިތުންގެ މަޖިލީހުގެ ރަައީސް މުހައްމަދު ނަޝީދުގެ ގެކޮޅު ގ. ކެނެރީގެ ކައިރި އެއްޗެއް ގޮއްވާލުމާއި ގުޅިގެން ރައީސް ނަޝީދަށް ވަނީ އަނިޔާވެސްވެފައެވެ. އެމަނިކުފާނަށް މިވަގުތު އޭޑީކޭގައި ފަރުވާ ދެމުންދާއިރު އެއްޗެއް ގޮވާފައިވަނީ އެމަނިކުފާނު ކާރުކޮޅަށް އަރާވަޑައިގަންނަވަނިކޮށް ކަމަށް އެނގިފައިވެއެވެ.

މިރޭގެ ހަމަލާއާ ގުޅިގެން މަޖިލީހުގެ ކުއްލި ޖަލްސާއެއްވެސް ވަނީ ފަށާފައެވެ. ރައްޔިތުންގެ މަޖިިލީހުގެ ރައީސް މުހައްމަދު ނަޝީދުގެ ސިއްހީ ހާލުކޮޅާ ގުޅޭ ފުރިހަމަ މައުލޫމާތު ލިބެންދެން މިރޭ ފެށި ރައްޔިތުންގެ މަޖިލީހުގެ ހާއްސަ ޖަލްސާ ކުރިއަށް ގެންދަންވެސް ވަނީ ނިންމަވާފައެވެ.