މިއަދުގެ އަދަދުތައްވެސް 700 އިން މަތީގަ
ފާއިތުވި 24 ގަޑި އިރު، ރާއްޖެއިން ކޮވިޑަށް ޕޮޒިޓިވް ވި މީހުންގެ ޢަދަދު މިއަދު ވެސް 700 އިން މައްޗަށް އަރައިފި އެވެ.
އެޗްޕީއޭ އިން ނެރުނު ތަފާސް ހިސާބަށް ބަލާ އިރު، މިދިޔަ 24 ގަޑިއިރު ތެރޭ 703 މީހަކު ވަނީ ކޮވިޑަށް ޕޮޒިޓިވް ވެފައެވެ.
އޭގ ތެރޭގައި މާލެ ސަރަހައްދުން 526 މީހަކާއި އަތޮޅު ތެރެއިން 167 މީހަކާއި ސިނާއީ މަސައްކަތްކުރާ ރަށަކުން ތިން މީހެއް ވަނީ ޕޮޒިޓިވް ވެފައެވެ.
އެހެންކަމުން ރާއްޖޭގައި ކޮވިޑަށް ޕޮޒިޓިވްވީ މީހުންގެ އަދަދު 33،368 އަށް ވަނީ އަރާފަ އެވެ.
މިދިޔަ އޭޕްރީލް މަހުގެ 23 ވަނަ ދުވަހުން ފެށިގެން ކޮވިޑް ކޭސްތަކުގެ އަދަދު 300 އިން މަތީގައި ހުރި އިރު، އެ އަދަދުތައް 600 އިން މައްޗަށް އެރުމަށްފަހު، އިއްޔެ އާއި މިއަދު މިވަނީ 700 އިން މައްޗަށް އަރާފަ އެވެ.
ރާއްޖޭގައި ކޮވިޑަށް ފަރުވާ ހޯދަމުން ދިޔަ މީހުންގެ ތެރެއިން މިދިޔަ 24 ގަޑިއިރުގެ ތެރޭގައި 202 މީހުން ރަނގަޅުވެ، މި ބަލިން ފަސޭހަވީ މީހުންގެ އަދަދު 25،675 އަށް ވަނީ އަރާފަ އެވެ. މިހާރު ރާއްޖޭގައި ބައްޔަށް ފަރުވާދެމުން އަންނަނީ 7،607 މީހަކަށެވެ.
ހޮސްޕިޓަލުތަކުގައި 203 މީހަކު ތިބި އިރު، ރާއްޖޭގައި ކޮވިޑަށް ޕޮޒިޓިވްވި މީހުންގެ ތެރެއިން 78 މީހަކު ވަނީ މަރުވެފައެވެ. އެއީ 68 ދިވެހިންނާއި 10 ބިދޭސީންނެވެ. މަރުވި ބިދޭސީންގެ ތެރޭގައި ހިމެނެނީ ބަންގުލަދޭޝްގެ ހަތް މީހަކާއި ފިލިޕީންސް މީހެއް އަދި އިންޑިއާ ދެ މީހެކެވެ.
މިލިޔުން ކިޔާލުމުން
