ޕޮލިސް ބޯޑުގެ ރައީސް އަދި ނައިބު ރައީސްގެ މަގާމަށް ބޭފުޅުން އިންތިޚާބު ކޮށްފި
ޕޮލިސް ބޯޑުގެ ރައީސް އަދި ނައިބު ރައީސްގެ މަގާމަށް ބޭފުޅުން އައްޔަން ކުރައްވައިފި އެވެ.
ހޯމް މިނިސްޓްރީން ބުނީ، ދިވެހި ފުލުހުންގެ ޚިދުމަތުގެ ގާނޫނުގެ (78) ވަނަ މާއްދާގެ ދަށުން ޕޮލިސް ބޯޑުގެ ރައީސްކަމަށް މއ. މަނާގެ، އަލީ ފާއިޒު އަދި އެ ބޯޑުގެ ނާއިބް ރައީސް ކަމަށް މ. ހަޒާރީވިލާ، އަހުމަދު ފަޔާޒް ހަސަން އިންތިޚާބު ކޮށްފައިވާ ކަމަށެވެ.
ރައްޔިތުންގެ ޚާސަ މަޖިލީހުގެ ބ. އަތޮޅުގެ މެމްބަރުކަން ކުރިން ކުރައްވާފައިވާ ޢަލީ ފާއިޒަކީ ކުރީގެ ރައީސް މުހައްމަދު ނަޝީދުގެ ވެރިކަމުގައި ޗީފް އޮފް ޕްރޮޓޮކޯލްގެ މަގާމު އަދާކުރެއްވި ބޭފުޅެކެވެ. އަދި ރާއްޖޭގައި ފުރަތަމަ ފަހަރަށް އުފެއްދި އިލެކްޝަންސް ކޮމިޝަނަށް އައިޑީޕީގެ ފަރާތުން ހުށަހެޅި މެމްބަރުކަން ވެސް ކުރައްވާފައިވާ ފާއިޒު ވަނީ ރައީސް ނަޝީދުގެ ވެރިކަމުގައި މިފްކޯގެ މެނެޖިންގ ޑިރެކްޓަރުގެ މަގާމުވެސް އަދާ ކުރައްވާފަ އެވެ.
ޕޮލިސް ބޯޑަކީ ދިވެހި ފުލުހުންގެ ޚިދުމަތުގެ ބިލުން އުފައްދަން ޖެހޭ ބޯޑެކެވެ. ފުލުހުންގެ ޚިދުމަތުގެ ބިލުގައި ބުނެފައި ވަނީ ޕޮލިސް ކޮމިޝަނަރާއި ޑެޕިއުޓީ ކޮމިޝަނަރު އައްޔަން ކުރުމުގައި އެ މަގާމަށް އެކަށޭނެ ފަރާތެއް ވަޒަންކުރުމަށް ކުރަންޖެހޭ އެންމެހައި ކަންތައްތައް ކުރުމަށާއި އެ ގާނޫނުގެ 76 ވަނަ މާއްދާގައި ބަޔާން ކުރާ މަސްއޫލިއްޔަތުތައް އަދާކުރުމަށާއި އެ ގާނޫނުގެ ދަށުން ލަފާ ދޭންޖެހޭ ކަންކަމުގައި ވަޒީރަށާއި ގާނޫނުގައި ލަފާ ދިނުމަށް ކަނޑައަޅާފައިވާ ފަރާތްތަކަށް ލަފާ ދިނުމަށް ”ޕޮލިސް ބޯޑު“ގެ ނަމުގައި ހަތް މެންބަރުންގެ މައްޗަށް އެކުލެވޭ ބޯޑެއް ރައީސުލްޖުމްހޫރިއްޔާ އެކުލަވާލަންވާނެ ކަމަށެވެ. އެ ބޯޑު އެކުލަވާލާފައިވަނީ މިމަހުގެ ނުވަ ވަނަ ދުވަހުއެވެ.
ޕޮލިސް ބޯޑުގައި ހިމެނޭނީ ރައީސުލްޖުމްހޫރިއްޔާ އައްޔަން ކުރައްވާ ދެ މެންބަރުންނާއި ފަންނީ ދާއިރާއިން ތައުލީމާއި ތަޖުރިބާ ލިބިފައިވާ ތިން މެންބަރުންނާއި އާންމުކޮށް ހުޅުވާލެވިގެން ހޮވާ އާންމު ރައްޔިތުންގެ ތެރެއިން ދެ މެންބަރެކެވެ
ޕޮލިސް ބޯޑުގައި އެކުލެވޭ މެންބަރުން
- 1. އަހްމަދު ފަޔާޒް ހަސަން، މ.ހަޒާރީވިލާ
- 2. އާއިޝަތު ނޫރާ މުހައްމަދު، ހ.ނޫމުތީ
- 3. އަލީ ފާއިޒު، މއ.މަނާގެ
- 4. އަހްމަދު ނާޝިދު، މއ.ގޯލްޑަންމޫން
- 5. އާދަމް އިބްރާހީމް، ގ.ޑިމްލައިޓް
- 6. ހާމިދު އަބްދުލްޣަފޫރު، ހ.ޝޭޑީކޯނަރ
- 7. ސަފާ ޝަރީފް، ދެތަޑިމާގެ / ސ.ހުޅުދޫ
ޕޮލިސް ބޯޑު އެކުލަވާލާތާ ހަތަރު މަސް ދުވަހުގެ ތެރޭގައި ޕޮލިސް ކޮމިޝަނަރު ފިޔަވައި ސުޕްރިޓެންޓެންޑުން ފެށިގެން މަތީގެ ރޭންކުތަކުގައި ތިއްބެވި ފުލުހުންގެ އޮފިސަރުންގެ ތެރެއިން އެކި ތުހުމަތުތައް ކުރެވޭ އޮފިސަރުންގެ މައްސަލަ ބޯޑުން ބަލައި އެ ފަރާތްތައް މަގާމުގައި ބޭތިއްބުމާމެދު އެ ބޯޑުން ގޮތެއް ނިންމަން ޖެހޭނެއެވެ.
ޕޮލިސް ބޯޑުން މައްސަލަތައް ބަލާނީ ލާއިންސާނީ އަމަލުތަކާއި ބާރުގެ ބޭނުން ނަހަމަ ގޮތުގައި ބޭނުން ކުރުމާއި ކޮރަޕްޝަންގެ ތުހުމަތުތައް ކުރެވިފައިވާ އޮފިސަރުންގެ މައްސަލަތަކެވެ. އަދި އެ މައްސަލަތައް ބަލައި ނިންމައި ވަކި ގޮތެއް ކަނޑައަޅަންދެން އެ ބޭފުޅުން މަގާމުގައި ދެމިވެސް ތިބޭނެއެވެ.
މިލިޔުން ކިޔާލުމުން
