ތަޢުލީމީ މާޙައުލުގައިވެސް ކުޑަކުދިންގެ ބައިވެރިވުން އޮތްކަން އިޙްޞާސްކޮށްދޭންޖެހޭ..
ޢާއިލާއާއި ތަޢުލީމީ މާޙައުލުގައިވެސް ކުޑަކުދިންގެ ބައިވެރިވުން އޮތްކަން އިޙްޞާސްކޮށްދޭންޖެހޭކަމަށް ޖެންޑަރ މިނިސްޓަރ ޝިދާތާ ޝަރީފް ވިދާޅުވެއްޖެއެވެ.
ކުޑަކުދިންގެ ދުވަހުގެ މުނާސަބާގައި ދެއްވި ޚިޠާބުގައި އެކަމަނާ ވިދާޅުވީ ސަރުކާރުގެ ސަތޭކަ ދުވަހުގެ ވަޢުދުތަކުގެ ތެރޭގައި ދިވެހިރާއްޖެއަށް އުފަންވާ ކޮންމެ ކުއްޖަކީވެސް ތުއްތު އިރުއްސުރެ ޢާއިލީ ލޯބި ލިބޭނެ ކުދިން ކަން ކަށަވަރުކުރުން ހިމެނޭ ކަމަށެވެ.
މީގެ އިތުރުން ތަފާތު އެކި ސަބަބުތަކާ ގުޅިގެން ދައުލަތުގެ ބެލުމުގެ ދަށަށް ނެގޭ ކުދިން ދުވަހެއް ދުވަހަކަށް އިތުރުވަމުން ދާ އިރު، އެ ކުދިންނަށް ޢާއިލާއެއްގެ ތެރޭގައި ބޮޑުވުމުގެ ފުރުޞަތު ފަހިކުރުމުގެ ގޮތުން ފޮސްޓަރކުރުމުގެ އުސޫލަށް މުހިންމު ބަދަލުތަކެއް ގެނެވި، ދައުލަތުގެ ބެލުމުގެ ދަށުގައި ތިބޭ ކުދިން ބެލެހެއްޓުން ޙަވާލުކުރުމާ ބެހޭ އުސޫލު މިހާރު ގެޒެޓްކުރެވިފައިވާ ކަމަށްވެސް މިނިސްޓަރ ވިދާޅުވފުވިއެވެ.
ދައުލަތުގެ ބެލުމުގެ ދަށަށް ނެގިފައިވާ ބައެއް ކުދިން ބައެއް ޢާއިލާތަކުން މިހާރުވެސް ފޮސްޓަރކުރަމުން ދާ އިރު، އެ ފަދަ ކުދިންނަށް އުޖާލާ ދިރިއުޅުމެއް ތަނަވަސްކޮށްދީ، ހަރުދަނާ ޒުވާނުންތަކެއްގެ ގޮތުގައި ބިނާކުރުމަކީ މުޅި ޤައުމުގެ ތަރައްޤީއަށް ލިބޭ ކުރިއެރުމެއް ކަމަށާއި މި ފަދަ ކަންކަމުގައި މުޅި މުޖުތަމަޢުގެ އެއްބާރުލުން ބޭނުންވާކަން މިނިސްޓަރ ޝިދާތާގެ ޚިޠާބުގައި ފާހަގަކުރެއްވިއެވެ.
މިލިޔުން ކިޔާލުމުން
