ކަރަލުން ލިބިދޭ ސިއްޚީ ފައިދާ އެނގިލައްވާތޯ….؟
ކަރައަކީ މަސްހޫރު އަނގަޔަށް މީރު މޭވާގެ ބާވަތެކެވެ. އަޅުގަނޑުމެންގެ މި ކުޑަކުޑަ ރާއްޖޭގައި ވެސް ވަރަށް ގިނައިން ބޭނުންކުރާ ވަރަށް އާންމު މޭވާއެކެވެ. އަޅުގަނޑުމެންގެ މި ރާއްޖޭގައި ކަރައަކީ ރޯދަމަހަށް ވަރަށް ޚާއްޞަ މޭވާއެވެ. މިއަދަކު ނޫނެވެ. ޒަމާނުއްސުރެވެސް ކަރައަކީ އެގޮތުގައި މަސްހޫރު ވެފައި އޮންނަ މޭވާއެކެވެ.
އެގޮތުން ރޯދަމަހު ރޯދަ ވީއްލާ ގަޑިއަށް ކަރާ ފަނި ތައްޔާރު ކުރުމަކީ އާންމު ކަމެކެވެ. އަދި ރޯދަ މަހުގެ އެންމެ މަގުބޫލް އަދި އެންމެ ގިނައިން ބޮވޭ ފަންޏަކީ ވެސް ކަރާފަންޏެވެ.
އެގޮތުން ރާއްޖޭގެ ގިނަ ރައްރަށުގައި އާންމުކޮށް ހައްދާ މޭވާގެ އެއްބާވަތަކީ ކަރައެވެ. އެގޮތުން ބާޒާރުގައި ދިވެހި ކަރާގެ ވައްތަރުތަށް ލިބެން ހުރެއެވެ. އަދި މީގެއިތުރުން ރާއްޖޭން ބޭރުންވެސް ކަރާ ގެނެއެވެ. މި ކަރާގެ ބާވަތްތައްވެސް ބާޒާރުން ލިބެންހުރެއެވެ.
ކަރައަކީ ރޯދަމަސް ނޫނަސް އަބަދުވެސް ބޭނުންކުރަން ރަނގަޅު މޭވާއެކެވެ. ފައިދާ ހުރި މާއްދާތަށް ގިނަ މޭވާއެކެވެ.
ދާދި ފަހުން އެމެރިކާގައި ކޮށްފައިވާ އާ ދިރާސާއަކުން ހާމަވި ގޮތުގައި ދުވާލަކު އެއް ފޮތި ކަރާ ކެއުމުން ބަރުދަން ކޮންޓްރޯލް ކުރެވި އަދި ހިތުގެ ބަލިތައް ޖެހުމުން ވެސް ދުރުކޮށްދެ އެވެ. މިހެން ދިމާވަނީ ކަރާ ކެއުމުން ގެއްލުން ހުރި ކޮލެސްޓްރޯލް ޖަމާވުމަށް ހުއްޓުމެއް ގެނެވޭތީ ކަމަށް ވެސް މި ދިރާސާގައިވެއެވެ..
މީދާ ބޭނުން ކޮށްގެން މި ދިރާސާ ހެދި ސައިންޓިސްޓުން ދިރާސާއަށްޓަކައި ބޭނުން ކުރި މީދާތަކަށް ސަރުބީ ވަރަށް ގިނަވާ ޒާތުގެ ކާނާ ކާން ދިންކަމަށް ވެއެވެ. އަދި މިއާ އެކު ކަރާ ކާން ދިނުމުން “ބޭޑް” ލޯ ޑެންސިޓީ ލިޕޯޕްރޮޓީން ނުވަތަ އެލްޑީއެލް ގިނަވާ ރޭޓް ދެބައިކުޅަ އެއްބަޔަށް ދަށްވެގެން ގޮސްފައިވާ ކަމަށް ވެސް މި ދިރާސާގައި ބުނެއެވެ..
އެލްޑީއެލް އަކީ ކޮލެސްޓްރޯލްގެ ބާވަތެކެވެ. މި ކޮލެސްޓްރޯލް ގިނަވުމުން ލޭ ހޮޅިތައް ބެދި ހިތުގެ މައްސަލަތައް ކުރިމަތިވެ އެވެ..
މި ދިރާސާ އިން އިތުރަށް ހޯދުނު އެއް ހޯދުމަކީ ގަވާއިދުން ކޮންމެ ދުވަހަކު ކަރާ ކެއުމުން ބަރުދަން އިތުރު ނުވެ ހިފެހެއްޓި އަދި ލޭ ހޮޅިތަކުގައި ސަރުބީ ޖަމާވާ މިންވަރު ދަށްކޮށްދޭ ކަމެވެ..
ސައިންސްވެރިން ގަބޫލުކުރާ ގޮތުގައި ކަރާ އިން ސިއްހަތަށް އެންމެ ރަނގަޅު ފައިދާއެއް ކުރަނީ ކަރާގެ ދިޔައިގައި ހުންނަ ސިޓްރޫލިން ކިޔާ ކެމިކަލްއެއްގެ ސަބަބުންނެވެ..
ކަރާ ކެއުމުން ލޭގެ ޕްރެޝަރަށް އެއްވެސް ކަހަލަ ބަދަލެއް އަންނަކަން މި ތަހުލީލުން ހާމަވެފައި ނެތަސް ހިތަށް ނުރައްކާވާ އެހެނިހެން ކަންތައްތަކަށް ވެސް ކަރާ ކެއުމުން އެކަށޭނަ ހެޔޮ ބަދަލުތަކެއް އަންނަ ކަމަށް ވެ އެވެ..
އެހެންކަމުން ކޮންމެ ދުވަހަކުވެސް ކަރާގެ ކޮންމެވެސް މިންވަރެއް ބޭނުންކޮށްލުމަކީ އެންމެ ރަނގަޅުކަމެކެވެ.