ކިކްބޮކްސިންގް ވޯލްޑް ކަޕުން ފަލަސްތީނުން ދެ ރަން މެޑަލް ހޯދައިފި

އުޒްބެކިސްތާނުގައި ބޭއްވި ކިކްބޮކްސިންގް ވޯލްޑް ކަޕްގައި ދުނިޔޭގެ އެކި ކަންކޮޅުތަކުން ހާހަކަށްވުރެ ގިނަ އެތުލީޓުންނާ ވާދަކޮށް، ފަލަސްތީނުގެ ޤައުމީ ޓީމުން ދެ ރަން މެޑަލާއެކު ޖުމްލަ އަށް މެޑަލް ކާމިޔާބުކޮށްފި އެވެ.

މިއީ ބައިނަލްއަޤްވާމީ ކުޅިވަރުގެ މައިދާނުގައި ފަލަސްތީނުގެ ދައުރު ފުޅާވަމުންދާކަން ހާމަކޮށްދިން މުބާރާތެކެވެ.

އިޝްތިހާރު

ތަޝްކެންޓްގައި ނިމިގެންދިޔަ މި މުބާރާތުގައި 77 ޓީމަކުން ގާތްގަނޑަކަށް 3,000 އެތުލީޓުން ވާދަކުރިއިރު، ސީނިއާ ޑިވިޜަނުން އަބްދުﷲ ކަންޢާން ރަން މެޑަލް ހޯދިއިރު، ޖޫނިއާ ކެޓަގަރީން ރަން މެޑަލް ހާސިލްކުރީ މުހައްމަދު އަލްޔާން އެވެ.

މީގެ އިތުރުން ފަލަސްތީނު ޓީމުގެ އިތުރު ހަ ބައިވެރިއަކު ވަނީ ލޯ މެޑަލް ކާމިޔާބުކޮށްފަ އެވެ. އެއީ މުސްތަފާ ޝަރަފް، އަނަސް އަލް-ގާގް، މުހައްމަދު އުވައިސާތު، އަހުމަދު ސަބީހް، ޔަހްޔާ ޖަބްރު އަދި ވަޢުދު ބްކައިރާތު އެވެ.

ފަލަސްތީނުގެ ހަތް ކްލަބަކާއި ކުޅިވަރު މަރުކަޒުތަކަކުން ހޮވާލެވުނު 27 މެންބަރުންގެ މި ވަފުދުގައި އަންހެން އަދި ފިރިހެން އެތުލީޓުން ހިމެނެ އެވެ.

މީގެ ތެރޭގައި އަސްވާރު ބައިތު އަލް-މަގްދިސް ކްލަބް، އަލް-ބުސްތާން ސިލްވާން އެސޯސިއޭޝަން، ބީ ސްޓްރޯންގް ޖިމް، ސިލްވާދު ސްޕޯޓްސް ކްލަބް، މައިތަލޫން ސްޕޯޓްސް ކްލަބް، ޗެމްޕިއަންސް ސެންޓަރ ފޯ މާޝަލް އާޓްސް އަދި ޓާގެޓް ވަން އެމް.އެމް.އޭހިމެނެ އެވެ.

މި ވަފުދު އިސްކޮށް ހުންނެވީ ފަލަސްތީނު ކިކްބޮކްސިންގް ފެޑެރޭޝަންގެ ނައިބު ރައީސް ނިޒާރު ތާލިބް އެވެ. އޭނާގެ އަރިހުގައި ފެޑެރޭޝަންގެ ބޯޑު މެންބަރުން ކަމަށްވާ ތާމިރު ބަކުރު އަދި ވަސީމް ޝަމްލާވީ ބައިވެރިވެވަޑައިގެންނެވި އެވެ.

އުޒްބެކިސްތާނުގައި ހުންނަވާ ފަލަސްތީނުގެ ސަފީރު ވާއިލް އަލް-ބަޠްރީޚީ ވަނީ ޓީމުގެ ކާމިޔާބީއަށް ތައުރީފު ކުރައްވައި، 2026 ވަނަ އަހަރު ބައިނަލްއަޤްވާމީ މުބާރާތްތަކުގައި ފަލަސްތީނުން ހޯދަމުންދާ ރަނގަޅު ނަތީޖާތަކަށް އަލިއަޅުއްވާލައްވާފަ އެވެ.

ސަފީރު ފާހަގަކުރެއްވި ގޮތުގައި މި އަހަރު ބޭއްވުނު ބައިނަލްއަޤްވާމީ ފަސް މުބާރާތަކުން ފަލަސްތީނުގެ އެތުލީޓުން ވަނީ 17 ރަން މެޑަލް، 18 ރިހި މެޑަލް އަދި 14 ލޯ މެޑަލް ހޯދާފަ އެވެ. ޖުމްލަ 49 މެޑަލްގެ މި ކާމިޔާބީއަކީ ބައިނަލްއަޤްވާމީ ފެންވަރުގައި ފަލަސްތީނުގެ ކުޅިވަރުގެ މަގުބޫލުކަން އިތުރުވަމުންދާކަމާއި އެންމެ މަތީ ފަންތީގައި ވާދަކުރުމުގެ ގާބިލްކަން އެ ގައުމުގެ އެތުލީޓުންގެ ކިބައިގައި ހުރިކަން ހާމަކޮށްދޭ ކަމެއް ކަމަށް އޭނާ ވިދާޅުވި އެވެ.

ވޯލްޑް ކަޕުން ހޯދި މި އަށް މެޑަލަކީ މިއަހަރު ބައިނަލްއަޤްވާމީ މައިދާނުގައި ފަލަސްތީނުގެ އެތުލީޓުން ހޯދި ކާމިޔާބީގެ ސިލްސިލާއަށް އިތުރުވި މުހިންމު ބޮޅެކެވެ.