ތައިލެންޑާއި ދިވެހިރާއްޖެ އާއި ދެމެދު ޖޮއިންޓު ޓްރޭޑް ކޮމިޓީގެ ދެވަނަ ބައްދަލުވުން ބާއްވައިފި

ތައިލެންޑާއި ދިވެހިރާއްޖެ  އާއި ދެމެދު ބޭއްވޭ ޖޮއިންޓު ޓްރޭޑް ކޮމިޓީގެ ދެވަނަ ބައްދަލުވުން ބާއްވައިފިއެވެ.

މި އޮކްޓޯބަރ މަހުގެ 12 އިން 13އަށް ހޮޓެލް ޖެންގައި ބޭއްވި މި ބައްދަލުވުމަކީ ތައިލެންޑާއެކު 2013 ވަނަ އަހަރު ސޮއިކުރި ޓްރޭޑް އެންޑް އިކޮނޮމިކް ކޯޕަރޭޝަން އެއްބަސްވުމުގެ ދަށުން އެކުލަވާލާފައިވާ ޖޮއިންޓް ކޮމިޓީގެ ދެވަނަ ބައްދަލުވުމެވެ.

އިޝްތިހާރު

ޖޮއިންޓް ކޮމިޓީގެ މި ބައްދަލުވުމުގެ ފުރަތަމަ ދުވަހު (12 އޮކްޓޯބަރ 2016 ) ގައި ކުރިޔަށް ގެންގޮސްފައިވަނީ ސީނިއަރ އޮފިޝަލުންގެ ބައްދަލުވުމެވެ. އަދި 13 ވަނަ ދުވަހު އޮތީ މިނިސްޓީރިއަލް ސެގްމެންޓަށް ތައްޔާރުވުމުގެގޮތުން ބޭއްވި ބައްދަލުވުމެކެވެ.

ސީނިއަރ އޮފިޝަލުންގެ ބައްދަލުވުމުގައި ވާހަކަދެއްކި ކަންތައްތަކުގެ ތެރޭގައި ދެޤައުމުގެ ދެމެދުގައި އިންވެސްޓްމަންޓް ކުރިއެރުވުމާއި ދެޤައުމުގެ ދެމެދުގައި ވިޔަފާރި އިތުރު ކުރުމަށްޓަކައި ކުރެވިދާނެ ކަންތައްތަކާއި ބެހޭގޮތުން މަޝްވަރާކުރުން ހިމެނެއެވެ.

ޖޮއިންޓް ކޮމިޓީގެ ބައްދަލުވުމުމުގައި ދިވެހިރާއްޖޭގެ ފަރާތުން ބައިވެރިވެވަޑައިގެނެވީ މިނިސްޓްރީ އޮފް އިކޮނޮމިކް ޑިވެލޮޕްމަންޓް، މިނިސްޓްރީ އޮފް ފޮރިން އެފެއަރޒް، މިނިސްޓްރީ އޮފް ޓޫރިޒަމް، މިނިސްޓްރީ އޮފް ފިޝަރީޒް އެންޑް އެގްރިކަލްޗަރ، މިނިސްޓްރީ އޮފް ހެލްތު، މޯލްޑިވްސް އިންލެންޑް ރެވެނިއު އޮޓޯރިޓީ އަދި މޯލްޑިވްސް ފުޑް އެންޑް ޑްރަގް އޮތޯރިޓީ އެވެ.

ތައިލެންޑުގެ ފަރާތުން ބައިވެރިވެވަޑައިގެންނެވީ މިނިސްޓްރީ އޮފް ކޮމާރސް، ޑިޕާޓްމަންޓް އޮފް ޓްރޭޑް ނެގޯސިއޭޝަންސް، މިނިސްޓްރީ އޮފް ލޭބަރ، ޑިޕާޓްމެންޓް އޮފް ފިޝަރީޒް، މިނިސްޓްރީ އޮފް ޕަބްލިކް ހެލްތު އަދި ބޯޑް އޮފް އިންވެސްޓްމެންޓް އޮފް ތައިލެންޑް އެވެ.

ޖޮއިންޓް ކޮމިޓީގެ މިނިސްޓީރިއަލް ސެޝަންގައި މިނިސްޓަރ އޮފް އިކޮނޮމިކް ޑިވެލޮޕްމަންޓް އަދި ތައިލެންޑްގެ ކޮމާރސް މިނިސްޓަރ ހަރ އެކެސެލެންސީ އަޕިރާދި ޓެންޓްރަޕޯން ބައިވެރިވެވަޑައިގެންނެވިއެވެ.

ތައިލެންޑާއެކު ބޭއްވި ޖޮއިންޓް ކޮމިޓީގެ ބައްދަލުވުމުގެ ހަވާސާގައި ދިވެހި ވިޔަފާރި ކުންފުނިތަކާއި ތައިލެންޑުގެ ވިޔަފާރި ކުންފުނިތަކުގެ ދެމެދުގައި ވިޔަފާރި އިތުރުކުރުމުގެ މަޤުޞަދުގައި ބިޒްނަސް ޓު ބިޒްނަސް މެޗް މޭކިންގ ސެޝަނެއް ވަނީ ކުރިއަށް ގެންގޮސްފައެވެ.

ދަރުބާރެގޭގެ ދޮށިމޭނާ މާލަމުގައި ބޭއްވި މި ސެޝަންގައި މިކަމަށް ރާއްޖެ އައި ތައިލެންޑްގެ ބިޒްނަސް ޑެލިގޭޝަންގައި ހޮޓެލް ސަޕްލައިޒް، ގަހަނާ، ކޮންސްޓްރަކްޝަން މެޓީރިއަލް، ސްޕާރ ޕްރޮޑަކްޓްސް އަދި ކާބޯތަކެތީގެ ވިޔަފާރީގައި ހަރަކާތްތެރިވާ 30 އަށް ވުރެ ގިނަކުންފުނި ވަނީ ބައިވެރިވެފައެވެ.