އިކޮނޮމިކް މިނިސްޓްރީގެ ގޮތްޕެއް މާލޭން ބޭރުގައި ފުރަތަމަ ފަހަރަށް ހުޅުވައިފި

އިކޮނޮމިކް މިނިސްޓްރީގެ ގޮތްޕެއް މާލޭން ބޭރުގައި ފުރަތަމަ ފަހަރަށް ހުޅުވައިފިއެވެ.

އައްޑޫސިޓީގެ ހިތަދޫގައި މިގޮފި ރަސްމީކޮށް ހުޅުވައި ޢާންމުންނަށް ޚިދުމަތްދޭން ފަށާފައިވާ އިރު، މިގޮފި ހުޅުއްވައިދިނުމަށްފަހު އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވީ މިހާރުވެސް މިގޮފިން އިކޮނޮމިކް މިނިސްޓްރީގެ ގިނަ ޚިދުމަތްތަކެއް ލިބެމުންދާނެ ކަމަށާއި ކުރިއަށް އޮތް ދުވަސްތަކުގައި މައި މަރުކަޒުން ލިބޭ ހުރިހާ ޚިދުމަތެއް ޢާންމުންނަށް ލިބޭނެ ކަމަށެވެ.

އިޝްތިހާރު

އަދި ސަރުކާރުގެ އަމާޒަކީ ރާއްޖޭގެ ހުރިހާ ކަންކޮޅެއްގައި ވިޔަފާރި ތަރައްޤީކޮށް ޢާންމުންނަށް ސަރުކާރުގެ ފަރާތުން ލިބިދޭ އެހީތައް ފޯރުކޮށްދިނުން ކަމަށާއި އެކަން ކުރުމަށް މިގޮފީގެ ސަބަބުން މަގުފަހިވެގެންދާނެ ކަމަށްވެސް މިނިސްޓަރ ވިދާޅުވިއެވެ.

މީގެ އިތުރުން އައްޑޫ ސިޓީއަކީ ބާރު ސްޕީޑެއްގައި ތަރައްޤީ ވަމުން އަންނަ ސިޓީއަކަށްވާތީ، މި ގޮތްޕަކީ މިސަރަހައްދުގެ ރައްޔިތުންނަށް ގިނަގުނަ މަންފާ ލިބޭނެ ގޮތްޕެއް ކަމަށްވެސް އިކޮނޮމިކް މިނިސްޓަރ ވިދާޅުވިއެވެ.

ހިތަދޫ ފެނަކަ ސޭލްސް ސެންޓަރު ކައިރީ ލިންކު ރޯޑުގައި ހުޅުވި މިގޮފިން އިކޮނޮމިކް ޑިވެލޮޕްމެންޓާއި އެ މިނިސްޓްރީގެ ދަށުން ހިންގަމުން އަންނަ ޓްރާންސްޕޯޓް އޮތޯރިޓީ އާއި ދެކުނުގެ ބިޒްނަސް ސެންޓަރުގެ ޚިދުމަތްތައްވެސް ލިބޭނެއެވެ.