ޑޮލަރު ހޯދުމަށް އިތުރު ފަސޭހަތަކެއް މަރުކަޒީ ބޭންކުން ހަމަޖައްސައިފި
ޑޮލަރު ހޯދުމަށް އިތުރު ފަސޭހަތަކެއް މަރުކަޒީ ބޭންކު (އެމްއެމްއޭ) އިން ހަމަޖައްސައިފިއެވެ.
އެގޮތުން ޑޮލަރު ގަންނަން ބޭނުންވާ މީހުންނަށް ވަގުތުން ޑޮލަރު ގަންނަން ލިބޭނެ އިންތިޒާމު މިހާރު ހަމަޖައްސާފައިވާ އިރު، ކޮންމެ ދުވަހަކު ހެނދުނު 9:00 އިން އިރުއޮއްސި 6:00 އަށް ޕާސްޕޯޓާއި ޓިކެޓް ޗެކް ކުރުމަށްފަހު ސްލިޕަށް ފައިސާ ދޫކުރުމުގެ އުސޫލެއް ކުރިން ގެންގުޅުނު ނަމަވެސް މިހާރު ވަގުތުންވެސް ޑޮލަރު ގަންނަން ލިބޭނެ ކަމަށް އެމްއެމްއޭ އިން ބުންޏެވެ.
އެމްއެމްއޭ އިން ބުނީ ޑޮލަރު ގަންނަން ގޮސް ތިބި މީހުންގެ ޢަދަދު މަދު ނަމަ ކުޑަވަގުތުކޮޅެއްގެ ތެރޭގައި ޑޮލަރު ލިބޭނެ ކަމަށާއި މަރުކަޒީ ބޭންކަށް ޑޮލަރު ގަންނަންވދާ ދަތުރުވެރިންނަށްވެސް ވަގުތުން ޑޮލަރު ލިބޭނެ ގޮތް ހަދާފައިވާ ކަމަށެވެ.
ރާއްޖެއިން ބޭރަށް ދަތުރުކުރާ ދިވެހިންނަށް ބޭންކުތަކުން ޑޮލަރު ވިއްކުން ހުއްޓާލާ، މިދިޔަ މަހު 20 ވަނަ ދުވަހުން ފެށިގެން އެމްއެމްއޭ އިން ޑޮލަރު ވިއްކަން ފަށާފައިވާ އިރު، މިހާތަނަށް 13 މިލިއަން ޑޮލަރަށް ވުރެ ގިނައިން ޑޮލަރު ވިއްކާފައިވާ ކަމަށް އެމްއެމްއޭ އިން ބުނެއެވެ.
ކޮންމެ ޓިކެޓަށް 500 ޑޮލަރު އެ ބޭންކުން ވިއްކާ އިރު، ކޮންމެ މީހަކަށް ގިނަ ވެގެން ޑޮލަރު ގަނެވޭނީ ފަސް ޓިކެޓަށެވެ.
ސުކޫލު ބަންދާ ދިމާކޮށް އެމްއެމްއޭ އިން ޑޮލަރު ވިއްކި ނަމަވެސް އަންނަ މަހުގެ ހަތްވަނަ ދުވަހުން ފެށިގެން ރާއްޖެއިން ބޭރަށް ދަތުރުކުރާ ދިވެހިންނަށް ޑޮލަރު ގަންނަން ލިބޭނީ ރާއްޖޭގައި ހިންގާ ބައިނަލްއަޤްވާމީ އެއަރޕޯޓްތަކުން ކަމަށާއި އެއަރޕޯޓް ތަކުގައި ޑޮލަރު ވިއްކުމުގެ އިންތިޒާމު ބީއެމްއެލް އިން ހަމަޖައްސަމުންދާ ކަމަށްވެސް އެމްއެމްއޭ އިން ބުންޏެވެ.
މިލިޔުން ކިޔާލުމުން
