އިސްރާއީލަށް ދަތިކުރުމުގެ ފިޔަވަޅު އެޅުމަށް އިނގިރޭސިވިލާތުގެ 50 އަށްވުރެ ގިނަ މެންބަރުން ގޮވާލައިފި

އދ. ގެ އޮފީސް ފޯ ދަ ކޯޑިނޭޝަން އޮފް ހިއުމަނިޓޭރިއަން އެފެއާޒް (އޯޗާ) އިން ހާމަކޮށްފައިވާ ގޮތުގައި ގައްޒާގެ އާބާދީގެ ގާތްގަނޑަކަށް 65 އިންސައްތަ ނުވަތަ 1.4 މިލިއަން މީހުން ދިރިއުޅެމުންދަނީ ފޭލިގެތަކުގަ އެވެ.

ނިމިދިޔަ ހަފުތާގައި ކުރިމަތިވި ބާރުގަދަ ތޫފާންތަކުގެ ސަބަބުން މިފަދަ އެތައް ހާސް ފޭލިގެއެއްގައި ވަނީ ފެންބޮޑުވެ ނުވަތަ ހަލާކުވެފަ އެވެ.

އިސްރާއީލުން އަދިވެސް ދަނީ އެހީދޭ ޖަމާއަތްތަކުން ގައްޒާއަށް ތަކެތި އެތެރެކުރުމަށާއި ބައިނަލްއަޤްވާމީ މުވައްޒަފުން އެ ސަރަހައްދަށް ވަނުމަށް ހުރަސްއަޅަމުންނެވެ.

ނޯވޭޖިއަން ރެފިއުޖީ ކައުންސިލުން މިދިޔަ މަހު ރިޕޯޓުކޮށްފައިވާ ގޮތުގައި އިސްރާއީލުން ”ދެގޮތަކަށް ބޭނުންކުރެވިދާނެ“ ކަމަށް ބަލާ ތަކެތި ހިފައިގެން އުރުދުންއިން ގައްޒާއަށް ވަނުމުގެ ހުއްދަ ދެނީ ހަފުތާއަކު އެންމެ 15 ލޮރީއަށެވެ.

ފަލަސްތީނުގެ ބިންތަކަށް އދ. އިން ކަނޑައަޅާފައި ހުންނަ ހިއުމަނިޓޭރިއަން ކޯޑިނޭޓަރު ރާމިޒް އަލަކްބަރޯވް މި ހަފުތާގައި ވިދާޅުވީ އެހީގެ ތަކެތި ހިފައިގެންދާ ލޮރީތަކުގައި ހުރި 150,000 ފޭލިގެ ގައްޒާއަށް ނުވެއްދި ބޭރުގައި ތާށިވެފައިވާއިރު ގައްޒާގެ އެތެރޭގައި ހުރި ހިޔާވަހިކަމަށް ބޭނުންވާ އަސާސީ ތަކެއްޗާއި ފިނިމޫސުމަށް ބޭނުންވާ ސާމާނު މުޅިން ހުސްވެފައިވާ ކަމަށެވެ.

އިނގިރޭސި ޕާލަމެންޓަށް ހުށަހެޅި މި ގަރާރުގައި އިންސާނީ އެހީއާއި ހިޔާވަހިކަމަށް ބޭނުންވާ ތަކެއްޗާއި އަލުން އާބާދުކުރުމަށް ބޭނުންވާ ސާމާނު އެއްވެސް ހުރަހެއްނެތި ވަގުތުން ގައްޒާއަށް ވެއްދުމަށް ބާރުއެޅުމަށް ސަރުކާރަށް ވަނީ ގޮވާލާފަ އެވެ.

އަދި 2026 ވަނަ އަހަރުގެ ”ގްލޯބަލް ހިއުމަން ރައިޓްސް އެންޑް އިންޓަނޭޝަނަލް ހިއުމަނިޓޭރިއަން ލޯ ސެންކްޝަންސް ރެގިއުލޭޝަންސް“ ގެ ދަށުން ލިބިދޭ ބާރުގެ ބޭނުންކޮށް ގައްޒާއަށް އިންސާނީ އެހީ ފޯރުކޮށްދިނުމަށް ހުރަސްއަޅާ އިސްރާއީލުގެ އޮފިޝަލުންނާއި އެހެނިހެން ފަރާތްތަކާ ދެކޮޅަށް ދަތިކުރުމުގެ ފިޔަވަޅު އެޅުމަށް ލޭބަރ ސަރުކާރަށް މި ގަރާރުގައި ވަނީ ބާރުއަޅާފަ އެވެ.