ބާރަށު ޖެޓީ އަދި ބަނދަރު ތަރައްގީކުރުމުގެ މަޝްރޫއު އެމްޓީސީސީއާ ހަވާލުކޮށްފި

ހއ. ބާރަށު ޖެޓީ އަދި ބަނދަރު ތަރައްގީކުރުމުގެ މަޝްރޫއު ކުރިއަށް ގެންދިއުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ މިއަދު ހަވާލުކޮށްފިއެވެ.

މިނިސްޓްރީ އޮފް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމަންޓުގައި މިއަދު ބޭއްވި ރަސްމިއްޔާތެއްގައި މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އިސްމާއިލް ހަމީދެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު މުހައްމަދު ޖަމްޝީދެވެ.

އިޝްތިހާރު

މި މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތައް:

• ނެރު ފުންކުރުން

• އަލަށް ހަދާ ބަނދަރުގެ ފަޅު ފުންކުރުން
• ނެރުފައިކަށި ގާއިމުކުރުން

• އެއްގަމުތޮށިލުމުގެ މަސައްކަތް

• ރޭމްޕް ގާއިމުކުރުން
• ޑިންގީ އެޅުމަށް ކޮންކްރީޓް ޖެޓީ ގާއިމުކުރުން

• ގްރޮއިން ޖެހުން
• ބަނދަރު ދެފަރާތުގެ ވެލިގަނޑު ހިފެހެއްޓުމަށް ރިވެޓްމަންޓް ޖެހުން

• ސޭންޑް ފިލްޑް ބްރޭކްވޯޓާ ގާއިމުކުރުން
• މޫރިން ބޯއީ ހަރުކުރުން
• ބަނދަރު ބައްތި ހަރުކުރުން
• ނެރު ބައްތި ހަރުކުރުން

މި މަޝްރޫއުގެ މަސައްކަތް އެއްކޮށް ނިންމުމަށް އެމްޓީސީސީއަށް ދީފައިވަނީ 540 ދުވަހުގެ މުއްދަތެކެވެ.