މިޞްރުގެ މަޝްހޫރު ނޫހެއްގެ މުޅި ނިއުސް ޓީމު ”ދޮގު ޚަބަރު“ ފެތުރިކަމުގެ ތުހުމަތުގައި ހައްޔަރުކޮށްފި

މިޞްރުގައި ފެކްޓް-ޗެކް ކުރާ މަޝްހޫރު ނޫހެއްގެ މުޅި އެޑިޓޯރިއަލް ޓީމު ”ދޮގު ޚަބަރު“ ފެތުރިކަމުގެ ތުހުމަތުގައި ހައްޔަރުކޮށްފި އެވެ.

މިޞްރުގެ ކަމާބެހޭ ފަރާތްތަކުން އެޤައުމުގައި ހަރަކާތްތެރިވާ މިނިވަން ނޫސް އިދާރާއެއްގެ މުޅި އެޑިޓޯރިއަލް ޓީމު ހައްޔަރުކޮށްފި އެވެ.

އިޝްތިހާރު

އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން މި އަމަލު ސިފަކޮށްފައިވަނީ މިއީ މިފަދަ ގޮތަކަށް ހިންގި ފުރަތަމަ ކަންތައް ކަމަށާއި، މިއީ ޚިޔާލު ފާޅުކުރުމުގެ މިނިވަންކަމަށް އޮތް ބިރުވެރި ނުރައްކަލެއްގެ ގޮތުގަ އެވެ.

ސެޕްޓެމްބަރު މަހުގެ 28 އާއި 29 ވަނަ ދުވަހު، ސަލާމަތީ ބާރުތަކުން ވަނީ ”މަޞަދަޤްޝް“ ނަމަކަށް ކިޔާ ނޫހުގައި މަސައްކަތްކުރާ ހަ ނޫސްވެރިން ކަމަށްވާ މުޙައްމަދު އަޝްރަފް އަބޫ އަމީރާ، ޢަބްދުﷲ ޤާދްރީ، އިސްލާމް ބަރަކާތު، ޢުމަރު ހިލާލް، މުޙައްމަދު މަޙްމޫދު އަދި މުޙައްމަދު ޢާދިލްގެ ގެތަކަށް ވަދެ، އެމީހުން ހައްޔަރުކޮށްފަ އެވެ. މިއީ އެ ނޫހުގައި މަސައްކަތްކުރާ މުޅި ޓީމެވެ.

މި ހައްޔަރުކުރުންތަކާއެކު، މިޞްރުގައި ހައްޔަރުކޮށްފައި ތިބި ނޫސްވެރިންގެ އަދަދު މިހާރު ވަނީ 24 އަށް އަރާފަ އެވެ.

ނޫސްވެރިކަމުގެ މިނިވަންކަމަށް މަސައްކަތްކުރާ ”ރިޕޯޓާސް ވިތައުޓް ބޯޑާސް“ (RSF) އިން ބުނި ގޮތުގައި، މުޅި ނޫސް އިދާރާއެއްގެ އެންމެން ޖަލަށްލުމަކީ މިޞްރުގައި މިހާތަނަށް ހިނގި ފުރަތަމަ ހާދިސާ އެވެ. އަދި ނޫސްވެރިން ބޭތިއްބި ތަނެއް ހާމަނުކުރުމުން އެ ޖަމާޢަތުން ވަނީ ކަންބޮޑުވުން ފާޅުކޮށްފަ އެވެ.

އާރް.އެސް.އެފް އިން އިތުރަށް ބުނެފައިވަނީ، މިއީ މިޞްރުގެ ޤާނޫނުއަސާސީއާ ޚިލާފު ކަމެއް ނަމަވެސް، މިއީ އެޤައުމުގައި އާންމުކޮށް ހިނގާ ކަމެއް ކަމަށެވެ.

ގިނަ ފަހަރަށް ނޫސްވެރިން ހައްޔަރުކުރުމަށްފަހު، ރަސްމީކޮށް ދައުވާކޮށް ކޯޓަށް ހާޒިރުކުރުމުގެ ކުރިން އެތައް ދުވަހެއް ވަންދެން ވީނުވީއެއް ނޭނގި ގެއްލުވާލާފައި ބައިތިއްބާ ކަމަށް އެ ޖަމާއަތުން ފާހަގަކުރި އެވެ.

އިންސާނީ ޙައްޤުތަކަށް މަސައްކަތްކުރާ ޖަމާއަތްތަކުން މަޢުލޫމާތު ދޭ ގޮތުގައި، ސަލާމަތީ ބާރުތަކުން ވަނީ ނޫސްވެރިންނާއި އެމީހުންގެ ޢާއިލާގެ މެންބަރުންގެ ފޯނުތަކާއި ލެޕްޓޮޕްތައް އަތުލާފަ އެވެ. އަދި ހައްޔަރުކުރުމުގެ އެއްވެސް އަމުރެއް ދައްކާފައި ނުވާއިރު، އެމީހުން ގެންދަނީ ކޮންތަނަކަށް ކަމެއްވެސް ބުނެފައެއް ނުވެ އެވެ.

މިޞްރުގެ ދާޚިލީ ވުޒާރާއިން ފަހުން ނެރުނު ބަޔާނެއްގައި، އެ ނޫސްވެރިން ހައްޔަރުކުރިކަން ކަށަވަރުކޮށްދީފައިވެ އެވެ.

އެ ބަޔާނުގައި ބުނެފައިވަނީ އެމީހުން ހިންގަނީ ބޭރުން ކޮންޓްރޯލްކުރާ ހުއްދަ ނެތް ޕްލެޓްފޯމެއް ކަމަށާއި، އެމީހުން ދަނީ ”ދޮގު ޚަބަރު“ ފަތުރަމުން ކަމަށެވެ. އަދި އެ ނޫސްވެރިންނަކީ 2014 ވަނަ އަހަރުން ފެށިގެން ރައީސް ޢަބްދުލް ފައްތާޙް އަލް-ސީސީގެ ސަރުކާރުން މަނާކޮށްފައިވާ އިޚްވާނުލް މުސްލިމޫން ޖަމާޢަތާ ގުޅުން އޮންނަ ބައެއް ކަމަށްވެސް ތުހުމަތުކޮށްފައިވެ އެވެ.

މި ޕްލެޓްފޯމުގެ އެޑިޓަރަކު 2023 ވަނަ އަހަރުވެސް މިފަދަ ތުހުމަތުތަކެއްގައި ހައްޔަރުކުރި އެވެ. ނަމަވެސް ދެ ދުވަސް ފަހުން އޭނާ ވަނީ ދޫކޮށްލާފަ އެވެ.

2018 ވަނަ އަހަރު އުފެއްދި ”މަޞަދަޤްޝް“ އަކީ ސަރުކާރުގެ ރަސްމީ އިދާރާތަކުންނާއި އިދިކޮޅު މީޑިއާތަކުން ފަތުރާ މަޢުލޫމާތުތަކުގެ ތެދުދޮގު ބަލައި، ކުށްތައް އިޞްލާޙުކުރާ މިނިވަން ނޫހެކެވެ.

އިންސާނީ ޙައްޤުތަކަށް މަސައްކަތްކުރާ 80 އަށްވުރެ ގިނަ ޖަމާޢަތާއި މިނިވަން މީޑިއާތަކުން ނެރުނު ބަޔާނެއްގައި ބުނެފައިވަނީ، ކޮންމެ މިނިވަން މުޖުތަމަޢެއްގައިވެސް މިނިވަން ނޫސްވެރިކަމަކީ ކޮންމެހެން ބޭނުންތެރި އެއްޗެއް ކަމަށެވެ. އަދި މިޞްރު ސަރުކާރުން ދައްކާ ދެފުށް ފެންނަ ސިޔާސަތާއި، ކޮރަޕްޝަނާ ދެކޮޅަށް މަސައްކަތްކުރުމުގެ ވާހަކަތަކާ މި އަމަލު މުޅިން ޚިލާފު ކަމަށްވެސް އެ ބަޔާނުގައިވެ އެވެ.

މަޞަދަޤްޝްގެ ބާނީންގެ ތެރޭގައި ހިމެނޭ، އަދި މިހާރު މިޞްރުން ބޭރުގައި ދިރިއުޅޭ ޢަބްދުއްރަޙްމާން މަންޞޫރު ”އެސޯސިއޭޓެޑް ޕްރެސް“ އަށް މަޢުލޫމާތު ދެމުން ބުނެފައިވަނީ، ހައްޔަރުކުރި ނޫސްވެރިން ތިބި ތަނެއް އަދިވެސް ޢާއިލާތަކަށް ނޭނގޭ ކަމަށެވެ.