އާދަޔާ ޚިލާފު ހިތްވަރަށް ޚާއްޞަ އެވޯޑެއް ދޭން މޯދީ އަށް އެދިއްޖެ

ޕައިލެޓް ސުމިތު މަޗާރަށް ކަނޑައެޅޭ ހާއްސަ ޝަރަފެއް ނުވަތަ ޤައުމީ ހިތްވަރުގެ އެވޯޑެއް ދިނުމަށް އެދި އިންޑިއާގެ ބޮޑުވަޒީރު ނަރެންދުރަ މޯދީއަށް ’ފެޑެރޭޝަން އޮފް އިންޑިއަން ޕައިލެޓްސް‘ (އެފް.އައި.ޕީ) އިން ސިޓީއެއް ފޮނުވައިފި އެވެ.

މިދިޔަ ސެޕްޓެމްބަރު މަހުގެ 30 ވަނަ ދުވަހު ފްލައި ދުބާއީގެ އުޅަނދެއްގައި ދިމާވި ކުއްލި ނުރައްކާތެރި ހާލަތުގައި ކެޕްޓަން ސުމިތު މަޗާރު ދެއްކެވި ހިތްވަރާއި ފަންނީ ޤާބިލުކަމަށްޓަކައި، އޭނާއަށް ޤައުމީ ފެންވަރުގެ ހިތްވަރުގެ އެވޯޑެއް ދިނުމަށް އެދި އެ ޖަމްޢިއްޔާއިން ބޮޑުވަޒީރަށް ހުށަހެޅީ މިދިޔަ ހުކުރު ދުވަހު އެވެ.

އިޝްތިހާރު

ޕައިލެޓުންގެ އެ ޖަމްޢިއްޔާއިން ހާމަކުރި ގޮތުގައި، ދުބާއީން ތެލް އަވީވަށް ދަތުރުކުރި ފްލައި ދުބާއީގެ އެފް.ޒެޑް 1073 ފްލައިޓުގެ ކޮމާންޑަރުގެ މަޤާމުގައި ހުރި މަޗާރަށް، އެ އުޅަނދުގެ ފަސްޓް އޮފިސަރު ކޮޅުތެޔޮބުރިއަކުން ހަމަލާދީ ބޮޑެތި އަނިޔާތަކެއް ދީފައިވެ އެވެ.

އެފް.އައި.ޕީ އިން ބުނި ގޮތުގައި، ލިބުނު އަނިޔާތަކާއެކުވެސް އެނާ ވަނީ އޭނާގެ މަސްއޫލިއްޔަތު އަދާކޮށް، އުޅަނދުގެ ކޮންޓްރޯލް ދަމަހައްޓައި، ސަޢޫދީ ޢަރަބިއްޔާގެ ތަބޫކަށް ރައްކާތެރިކަމާއެކު ބޯޓު ޖައްސާފަ އެވެ.

”މިފަދަ އާދަޔާޚިލާފު ހިތްވަރުގަދަ އަމަލުތަކަކީ އެންމެ މަތީ ފަންތީގައި ބަލައިގަނެ، ފާހަގަކުރަންޖެހޭ ކަންކަމެއް ކަމުގައި ފެޑެރޭޝަން އޮފް އިންޑިއަން ޕައިލެޓްސް އިން ޤަބޫލުކުރަމެވެ.

އެހެންކަމުން، ކަމާބެހޭ އިދާރާތަކުން ޙަޤީޤަތް ބަލައި ކަށަވަރުކުރުމަށްފަހު، އިންޑިއާ ސަރުކާރުގެ އުސޫލުތަކުގެ ތެރެއިން ކެޕްޓަން ސުމިތަށް ޤައުމީ ހިތްވަރުގެ އެވޯޑެއް ނުވަތަ މަދަނީ ޝަރަފެއް އެރުވުމަށް ބޮޑުވަޒީރުގެ އޮފީހަށް އިލްތިމާސްކުރަމެވެ،“ އެ ސިޓީގައި ބުނެފައިވެ އެވެ.

އަދި ކެޕްޓަން ސުމިތުގެ އަމަލުން ހާމަވެގެންދިޔައީ، ފުރާނައަށް ނުރައްކާވެ ބޮޑެތި އަނިޔާތަކެއް ލިބިފައިވާ ހާލަތުގައިވެސް، ޙަޤީޤީ ޕައިލެޓެއްގެ އެންމެ ބޮޑު އިސްކަމަކީ އޭނާއާ ހަވާލުކުރެވިފައިވާ ފަސިންޖަރުންގެ ސަލާމަތާއި ރައްކާތެރިކަން ކަމުގައިވެސް އެ ޖަމްޢިއްޔާއިން ފާހަގަކުރި އެވެ.

އެ އުޅަނދުގައި 174 ފަސިންޖަރުންނާއި 8 ފަޅުވެރިން ތިބިކަން ފާހަގަކުރަމުން އެ ޖަމްޢިއްޔާއިން ބުނީ، އަމިއްލަ ނަފްސަށް އޮތް ބޮޑު ނުރައްކަލުގެ ތެރޭގައިވެސް މަޗާރު ދެއްކެވި ހިތްވަރަކީ ބޯޓު ރައްކާތެރިކަމާއެކު އެއާޕޯޓަކަށް ޖެއްސުމަށް ލިބުނު އެންމެ ބޮޑު ބާރު ކަމަށެވެ.

އެފް.އައި.ޕީގެ އިތުރުން، ރާޖްޔާ ސަބާގެ މެންބަރު މިލިންދު ދިއޯރާވެސް ވަނީ މަޗާރަށް ’އަޝޯކާ ޗަކްރާ‘ އެވޯޑް އެރުވުމަށް އެދި ބޮޑުވަޒީރަށް ސިޓީއެއް ފޮނުއްވާފަ އެވެ. މުމްބާއީއަށް އުފަން މި ޕައިލެޓަކީ އާދަޔާޚިލާފު ހާލަތެއްގައި ”ހިތްވަރާއި، އަމިއްލަ އެދުމެއްނެތް މަސައްކަތުގެ ނަމޫނާއެއް“ ކަމަށް އޭނާ ވިދާޅުވި އެވެ.

ފްލައިޓް ދަތުރުކުރަމުން ދަނިކޮށް ކޯ-ޕައިލެޓް ދިން މި ހަމަލާއަށްފަހު، ފަސިންޖަރުންނާއި އެހެނިހެން ފަޅުވެރިން ވަނީ އެކަން ހުއްޓުވުމަށް މަސައްކަތްކޮށްފަ އެވެ.

އެ ވަގުތު އުޅަނދުން ކުއްލި ނުރައްކަލުގެ ސިގްނަލް ފޮނުވައި، އުޅަނދުގެ އުސްމިން ވަރަށް ބޮޑަށް ދަށަށް ދިޔުމަށްފަހު، ވަނީ ސަޢޫދީ ޢަރަބިއްޔާއަށް މިސްރާބު ބަދަލުކޮށްފަ އެވެ.

ޔޫ.އޭ.އީ އިން މިހާރު ދަނީ މި ހާދިސާ ހިނގަން މެދުވެރިވި ސަބަބާއި، އޭގެ ފަހަތުގައިވާ މަޤްޞަދާއި، އަދި މިއީ ޓެރަރިޒަމާ ގުޅުންހުރި ނުވަތަ ކުރިން ރޭވިގެން ހިންގާފައިވާ އަމަލެއްތޯ ބަލައި ތަޙްޤީޤު ކުރަމުންނެވެ.

ބޮޑުވަޒީރު މޯދީ ވަނީ ވީޑިއޯ ކޯލެއް މެދުވެރިކޮށް މަޗާރާ ވާހަކަދައްކަވައި، އެ ނުރައްކާތެރި ވަގުތުގައި އޭނާ ދެއްކެވި ހިތްވަރާއި ކެތްތެރިކަމަށް ތައުރީފު ކޮށްފަ އެވެ