އެމެރިކާއިން އިރާޤުގައި ދަމަހައްޓަމުން އައި އަސްކަރީ ހާޒިރުވުން ނިމުމަކަށް

އިރާޤުގައި ތިބި އެމެރިކާގެ ސިފައިން އެ ޤައުމުގައި ބާކީ ހުރި އަސްކަރީ މަރުކަޒުތަކުން ފޭބުމުގެ މަސައްކަތް ފަށައިފި އެވެ.

މިއާއެކު، ވޭތުވެދިޔަ ވިހި އަހަރު ދުވަހު އެމެރިކާއިން އިރާޤުގައި ދަމަހައްޓަމުން އައި އަސްކަރީ ހާޒިރުވުން ނިމުމަކަށް އަންނާނެ އެވެ.

އިޝްތިހާރު

އިރާޤުން ސިފައިން ބޭލުމުގެ މި މަސައްކަތް ކުރިއަށް ގެންދަނީ ޓްރަމްޕްގެ ސަރުކާރުންނެވެ. މިއީ ކުރީގެ ސަރުކާރުން އިރާޤުން ސިފައިން ބޭލުމަށް އެއްބަސްވެ، އެކަށައަޅާފައިވާ މަގުޗާޓާ އެއްގޮތަށް ކުރިއަށްދާ މަސައްކަތެކެވެ.

އިރާޤުގެ އެކި ސަރަހައްދުތަކުގައި ހުރި އަސްކަރީ މަރުކަޒުތަކުން އެމެރިކާ ސިފައިން ފޭބުމުގެ އެންމެ ފަހުގެ މަރުހަލާ މިހާރު ވަނީ ފަށާފަ އެވެ.

އެމެރިކާއިން އިރާޤަށް އަރައިގަތްތާ 20 އަހަރަށްވުރެ ގިނަ ދުވަސްވެފައިވާއިރު، މި ނިންމުމާއެކު ކުރިއަށް އޮތް ތަނުގައި އެ ޤައުމުގެ ސަލާމަތީ ކަންކަން ތަރުތީބުވެގެންދާނެ ގޮތަކާމެދު މިހާރު ވަނީ ސުވާލު އުފެދިފަ އެވެ.

ވޮޝިންގޓަނާއި ތެހެރާނާ ދެމެދު ސަރަހައްދީ ހަމަނުޖެހުންތަކާއި ކުރިމަތިލުންތައް ހިނގަމުންދިޔަ ނަމަވެސް، 2024 ވަނަ އަހަރު ރައީސް ޖޯ ބައިޑަންގެ ދައުރުގައި އެއްބަސްވެފައިވާ ގޮތަށް ސިފައިން ބޭލުމުގެ ކަންކަން ޓްރަމްޕްގެ ސަރުކާރުން ދަނީ ތަންފީޒު ކުރަމުންނެވެ.

ވޭތުވެދިޔަ ވިހި އަހަރުގެ ތެރޭގައި އެމެރިކާ ސިފައިން އިރާޤަށް އަރައިގަނެ ހިންގި އަސްކަރީ ހަރަކާތްތަކުގައި އެމެރިކާގެ 4،500 އަށްވުރެ ގިނަ ސިފައިން ވަނީ މަރުވެފަ އެވެ.

އެމެރިކާ އިސްވެ އޮވެ 2003 ވަނަ އަހަރު ފެށި ހަނގުރާމައާއެކު އެމެރިކާ ސިފައިން އިރާޤަށް ވަދެ، ދާޚިލީ ހަމަނުޖެހުންތަކާ ދެކޮޅަށް ހިންގި އެކި އޮޕަރޭޝަންތަކުގައި ގިނަ އަހަރުތަކެއް ވަންދެން އެ ޤައުމުގައި މަޑުކުރި އެވެ. ނަމަވެސް 2011 ވަނަ އަހަރުގެ ނިޔަލަށް ސިފައިން ވަނީ އެ ޤައުމުން ފައިބާފަ އެވެ.

އޭގެ ތިން އަހަރު ނުވަނީސް، 2014 އާއި 2017 އާ ދެމެދު އައިސިސް ބަލިކުރުމަށް އިރާޤުގެ އަސްކަރިއްޔާއަށް އެހީތެރިވުމަށް އެމެރިކާ ސިފައިން އަލުން އެ ޤައުމަށް އެނބުރި ދިޔަ އެވެ.

2021 ވަނަ އަހަރު ހާލަބޮލިކަމުގެ ތެރޭގައި އެމެރިކާ ސިފައިން އަފްޣާނިސްތާނުން ފޭބިއިރު، އެ ޤައުމުގައި މަރުވި ސިފައިންގެ އަދަދާ އަޅާބަލާއިރު އިރާޤުގައި މަރުވި އެމެރިކާ ސިފައިންގެ އަދަދު ގާތްގަނޑަކަށް ދެގުނަ އިތުރެވެ.