މެންޗެސްޓަރ ސިޓީން މާލީ މައްސަލަ: އެއީ“ރޭވުމެއް“ ކްލަބުގެ އިސްވެރިޔަކު

ޔޫއޭއީގެ މިލްކުވެރިކަމުގައި އޮންނަ މެންޗެސްޓަރ ސިޓީން މާލީ ޤަވާޢިދުތަކާ ޚިލާފުވެފައިވާކަން ސާބިތުވުމާ ގުޅިގެން، އެ ކްލަބުގެ އިސްވެރިޔަކު އެއީ ”ރޭވުމެއް“ ކަމަށް ސިފަކުރައްވައިފި އެވެ.

މިނިވަން ކޮމިޝަނަކުން ނިންމާފައިވާ މި ނިންމުންތައް އިސްތިއުނާފު ކުރުމަށް އަންނަ ހުކުރު ދުވަހުގެ ނިޔަލަށް އެ ކްލަބަށް ފުރުސަތު އޮންނާނެ އެވެ.

އިޝްތިހާރު

އަންގާރަ ދުވަހު މިނިވަން ކޮމިޝަނުން ހާމަކުރި ގޮތުގައި، މާލީ ޤަވާޢިދުތަކާ ޚިލާފުވި ކަމަށް ބުނާ 115 ދަޢުވާވެސް މެންޗެސްޓަރ ސިޓީގެ މައްޗަށް ވަނީ ސާބިތުވެފަ އެވެ.

ކޮމިޝަނުގެ ހޯދުންތަކުން ދައްކާ ގޮތުގައި، އެ ކްލަބުން ވަނީ އާމްދަނީ އޮޅުވާލައިގެން އިތުރުކުރުމަށާއި، ޚަރަދުތައް ކުޑަކުރުމަށްޓަކައި 1 ބިލިއަން ޑޮލަރަށްވުރެ ގިނަ އަދަދެއްގެ ”އޮޅުވާލުން އެކުލެވޭ“ ވިޔަފާރި އެއްބަސްވުންތަކެއް ހަދާފަ އެވެ.

ކޮމިޝަނުން ފާހަގަކުރި ގޮތުގައި، ކްލަބުގެ މާލީ ބަޔާންތައް ތައްޔާރުކޮށް އޮޑިޓްކޮށްފައިވަނީ ކަނޑައެޅިފައިވާ ޤާނޫނީ އަދި ރެގިއުލޭޓަރީ އުސޫލުތަކާ އެއްގޮތަކަށް ނޫނެވެ. އަދި އެއީ ފަރުވާކުޑަ އަމަލެއް ކަމަށާއި، އެ ކްލަބުން އަމަލުކޮށްފައިވަނީ އިޚްލާޞްތެރިކަމެއް ނެތި ކަމަށްވެސް ކޮމިޝަނުން ބުނެފައިވެ އެވެ.

ސްކައި ސްޕޯޓްސް ނިއުސްއަށް ލިބިފައިވާ، ކްލަބުގެ މުވައްޒަފުންނާއި ކުޅުންތެރިންނަށް ފޮނުވި ވީޑިއޯއެއްގައި ސިޓީގެ ޗީފް އެގްޒެކެޓިވް ފެރަން ސޮރިއާނޯ ވަނީ މި ތަޙްޤީޤަކީ ޕްރިމިއާ ލީގުން ރާވައިގެން ހިންގާ ”ކޮންސްޕިރަސީ ތިއަރީ“ އެއްގެ ގޮތުގައި ސިފަކުރައްވާފަ އެވެ.

ޕްރިމިއާ ލީގުން ސިޓީގެ މައްޗަށް ދަޢުވާ އުފުލާފައިވަނީ 2009 އާއި 2018 އާ ދެމެދު ހިންގާފައިވާ ކަމަށް ބުނާ ޤަވާޢިދާ ޚިލާފު އަމަލުތަކެއް 2023 ވަނަ އަހަރު ތަޙްޤީޤް ކުރުމަށްފަހު އެވެ.

އެ ކްލަބުގެ މައްޗަށް ތުހުމަތު ކުރެވިފައިވަނީ ޞައްޙަ މާލީ މަޢުލޫމާތާއި، ކުޅުންތެރިންނާއި ކޯޗުންނަށް ދިން ފައިސާގެ ތަފްސީލު ފޯރުކޮށްދީފައި ނުވުމުގެ އިތުރުން، މާލީ ދެމެހެއްޓެނިވިކަމުގެ ޤަވާޢިދުތަކާ ޚިލާފުވުމުގެ ތުހުމަތެވެ.

ޕްރިމިއާ ލީގުން ނެރުނު ބަޔާނެއްގައި ބުނެފައިވަނީ، މިއީ އެ ލީގުގެ ތާރީޚުގައިވެސް ހިންގުނު އެންމެ މުހިންމު އަދަބީ މައްސަލަ ކަމަށެވެ.

އަދި މި ނިންމުމުގެ ސަބަބުން މެންޗެސްޓަރ ސިޓީއާ ދެކޮޅަށް މި މައްސަލަ ކުރިއަށް ގެންދިއުމަށް ޕްރިމިއާ ލީގުން ނިންމި ނިންމުމަކީ ރަނގަޅު ނިންމުމެއްކަން ސާބިތުވެފައިވާ ކަމަށްވެސް ބުނެފައިވެ އެވެ.

މީގެ އިތުރުން، ލީގަކީ ހުރިހާ ކްލަބުތަކަށާއި ސަޕޯޓަރުންނަށް އިންސާފުވެރި އަދި ވާދަވެރި ތަނަކަށް ހެދުމަކީ އެންމެ އިސްކަންދޭ ކަންތައް ކަމަށްވެސް ބަޔާނުގައިވެ އެވެ.

މި މައްސަލައިގައި ދޭނެ އަދަބުތައް އަދި ކަނޑަނޭޅި ނަމަވެސް، ބޮޑެތި ޖޫރިމަނާތަކުގެ އިތުރުން، ޕޮއިންޓް އުނިކޮށް ދަށް ޑިވިޜަނަކަށް ރެލިގޭޓް ކުރުމުގެ ފުރުސަތު އެބައޮތެވެ.

މި ކްލަބަކީ ޔޫއޭއީގެ ޑެޕިއުޓީ ޕްރައިމް މިނިސްޓަރ އަދި ވައިސް ޕްރެޒިޑެންޓް ޝައިޚް މަންސޫރު ބިން ޒައިދު އަލް ނަހްޔާންގެ މިލްކެކެވެ.

އެމަނިކުފާނު މި ކްލަބު ބައްލަވައިގަތީ 2008 ވަނަ އަހަރުގެ ސެޕްޓެމްބަރު މަހު 265 މިލިއަން ޑޮލަރަށެވެ.

ޝައިޚް މަންސޫރުގެ މިލްކުވެރިކަމުގެ ދަށުން، ފާއިތުވި 15 އަހަރު ތެރޭގައި ސިޓީން ވަނީ 8 ޕްރިމިއާ ލީގު ތަށި، 4 އެފްއޭ ކަޕް، 7 ލީގު ކަޕް އަދި އެއް ޗެމްޕިއަންސް ލީގު ކާމިޔާބުކޮށް، އިނގިރޭސި ފުޓްބޯޅައިގެ އެންމެ ވަރުގަދަ ބާރަށް ވެފަ އެވެ.

ސިޓީގެ މާލީ މައްސަލަތަކުގެ ތަޙްޤީޤް ފެށުނީ ޖަރުމަނުގެ ”ޑިއަރ ޝްޕީގަލް“ ނޫހުން ލީކުވި ލިޔެކިޔުންތަކެއް ޝާއިޢުކުރުމާ ގުޅިގެންނެވެ.