7 އޮކްޓޫބަރުގެ އިންޒާރު ލިބުނުކަން ދޮގުކުރުމަށް ޔޫއޭއީގެ ރައީސްގެ ކިބައިން ނަތަންޔާހޫ އެދިއްޖެ

7 އޮކްޓޫބަރުގެ އިންޒާރު ލިބުނުކަން ދޮގުކުރުމަށް ޔޫއޭއީގެ ރައީސްގެ ކިބައިން ނަތަންޔާހޫ، އެދިއްޖެ ކަމަށް ރިޕޯޓްތައް ބުނެފިއެވެ.

އިސްރާއީލުގެ ދެކުނަށް ދެވުނު ހަމަލާތަކުގެ ކުރިން ޢަރަބި ޤައުމުތަކުން އިންޒާރު ދީފައިވާ ކަމަށް ބުނާ ޚަބަރުތައް ދޮގުކުރުމަށްޓަކައި، އިސްރާއީލުގެ ބޮޑުވަޒީރު އާދީއްތަ ދުވަހު ޔޫއޭއީއަށް ދަތުރެއް ކޮށްފި އެވެ.

އިޝްތިހާރު

އެސޯސިއޭޓެޑް ޕްރެސް (އޭޕީ) އިން ރިޕޯޓްކޮށްފައިވާ ގޮތުގައި، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޔޫއޭއީއަށް ދިޔައީ، 7 އޮކްޓޫބަރު 2023 ގައި ހަމާސްއިން ދިން ހަމަލާގެ ކުރިން އެ ޤައުމުން އިންޒާރު ދީފައިވާ ކަމަށް ބުނާ ވާހަކަތައް ދޮގުކޮށްދިނުމަށް ޔޫއޭއީގެ ރައީސް މުޙައްމަދު ބިން ޒައިދު އަލް ނަޙްޔާންގެ ކިބައިން އެދުމަށެވެ.

އިސްރާއީލުގެ މީޑިއާތަކުން ބުނާ ގޮތުގައި، ހަމާސްއިން ބޮޑު އޮޕަރޭޝަނެއް ރާވަމުންދާ ކަމުގެ އިންޒާރު ލިބިފައިވާ ކަމަށް ”ހާއާރެޓްޒް“ ނޫހުން ޝާއިއުކުރި ރިޕޯޓް ދޮގުކުރުމަށް އެދި، ނަތަންޔާހޫ ވަނީ ޔޫއޭއީގެ ރައީސާ އެކު ގަޑިއިރެއްހާއިރުގެ ބައްދަލުވުމެއް ބާއްވާފަ އެވެ.

ހާއާރެޓްޒްއިން ޝާއިއުކުރި އަދި ވަރަށް އަވަހަށް ނެރުމަށް ހަމަޖެހިފައިވާ ފޮތެއްގެ މައްޗަށް ބިނާކޮށްފައިވާ މި ރިޕޯޓުގައި ބުނެފައިވަނީ، ހަމާސްއިން ދީފާނެ ހަމަލާއަކަށް ތައްޔާރުވެ އޮތުމަށް ރައީސް ޒައިދު ނަތަންޔާހޫއަށް ލަފާދިންކަމަށެވެ.

މީގެ އިތުރުން، ޣައްޒާއަށް އިޤްތިޞާދީ ހައްލެއް ހޯދުމަށާއި، އިސްރާއީލުގެ ވަޒަންވެރިން ފަލަސްޠީނުގެ ރައްޔިތުންނަށް ހަމަލާދީ ޣައިރު ޤާނޫނީ އާބާދީތައް ފުޅާކުރަމުންދާ ހުޅަނގު އައްސޭރީގެ މަސްލަހަތު ފިނިކުރުމަށް ވެސް  ބާރުއެޅި ކަމަށް އެ ރިޕޯޓުގައިވެ އެވެ.

ޔޫއޭއީގެ ރަސްމީ ޚަބަރު ފަތުރާ އެޖެންސީ ”ވާމް“ އިން ހޯމަ ދުވަހުގެ ރޭ ނެރުނު ބަޔާނެއްގައި، ރައީސް ޒައިދު ނަތަންޔާހޫއާ ބައްދަލުކުރެއްވިކަން ކަށަވަރުކޮށްދީފައިވާއިރު، އެ ބައްދަލުވުމުގައި ދެ ޤައުމުގެ ގުޅުން ބަދަހިކުރުމާ ބެހޭގޮތުން މަޝްވަރާކުރެވުނު ކަމަށް ބުނެފައިވެ އެވެ.

ނަތަންޔާހޫ ކުއްލި ގޮތަކަށް ޔޫއޭއީއަށް މި ކުރި ދަތުރަކީ، އޭނާގެ ސިޔާސީ މުސްތަޤްބަލާ ގުޅިފައިވާ އިސްރާއީލުގެ އިންތިޚާބަށް މަހެއްހާ ދުވަސް އޮއްވައި ކުރެއްވި ދަތުރެކެވެ.

އިދިކޮޅު ފަސް ޕާޓީއަކުން ވަނީ ނަތަންޔާހޫ ބަލިކުރުމަށް ގުޅިގެން މަސައްކަތްކުރުމަށް އެއްބަސްވެފަ އެވެ.

މި އިންތިޚާބާ ދިމާކޮށް، އިސްރާއީލުގައި ދިރިއުޅޭ ފަލަސްޠީނު ރައްޔިތުންނާ ދެކޮޅަށް ހަރުކަށި ފިޔަވަޅުތަކެއް ދަނީ އަޅަމުންނެވެ.

އެގޮތުން، އިސްރާއީލުގެ ސެންޓްރަލް އިލެކްޝަންސް ކޮމިޓީން ވަނީ ޢަރަބިންގެ މެޖޯރިޓީ އޮންނަ މައި ދެ ޕާޓީއަކާއި ބައެއް ކެންޑިޑޭޓުން އިންތިޚާބުގައި ބައިވެރިވުން މަނާކޮށްފަ އެވެ.

ނަމަވެސް، އިސްރާއީލުގެ ސުޕްރީމް ކޯޓަށް މި ނިންމުން ބަދަލުކުރުމުގެ ބާރުއޮވެ އެވެ.

ހަމާސްއިން ހަމަލާއަކަށް ތައްޔާރުވަމުންދާ ކަމުގެ އިންޒާރުތަކަށް ނަތަންޔާހޫ އިހުމާލުވި ކަމުގެ ތުހުމަތުތައް އޭނާއަށް ވަނީ ވަރަށް ބޮޑަށް އަމާޒުވެފަ އެވެ.

އޮކްޓޫބަރު 7 ގެ ހަމަލާއަށް ފަހު ހަފުތާއެއް ނުވަނީސް، އެމެރިކާގެ ކޮންގްރެސް މެންބަރު މައިކަލް މެކޯލް ބުނީ، ހަމަލާގެ ތިން ދުވަސް ކުރިން މިފަދަ ކަމެއް ހިނގައިދާނެ ކަމުގެ އިންޒާރު މިސްރުން އިސްރާއީލަށް ދީފައިވާ ކަމުގެ މަޢުލޫމާތު ލިބިފައިވާ ކަމަށެވެ.

އަދި އޮކްޓޫބަރު މަހުގެ ކުރީކޮޅު އޭޕީއިން ވެސް ވަނީ ޣައްޒާގައި ”ބޮޑު ކަމެއް“ ހިނގަން އުޅޭ ކަމުގެ އިންޒާރު މިސްރުން އިސްރާއީލަށް ދިން ކަމަށް ރިޕޯޓްކޮށްފަ އެވެ.

ވޯލް ސްޓްރީޓް ޖާނަލް އާއި ދަ އެޓްލާންޓިކް އިން ވެސް ވަނީ މި ވާހަކަތައް އަލުން ތިލަކޮށް، މިސްރުގެ ޖާސޫސީ އިދާރާގެ ކުރީގެ ވެރިޔާ އައްބާސް ކާމިލް މެދުވެރިކޮށް ނަތަންޔާހޫއަށް އެ މަޢުލޫމާތު ފޯރުކޮށްދިން ކަމަށް ބުނެފަ އެވެ.

ނަތަންޔާހޫ އާއި އޭނާގެ ސަރުކާރުން މި ހުރިހާ ރިޕޯޓްތަކެއް ތަކުރާރުކޮށް ދޮގުކުރެ އެވެ.

ސެޕްޓެމްބަރު މަހު ހާއާރެޓްޒްއިން ޝާއިއުކުރި ރިޕޯޓަށް ރައްދު ދެއްވަމުން ނަތަންޔާހޫ ވިދާޅުވީ އެއީ މުޙައްމަދު ދަހްލާން ފެތުރި ދޮގު ޚަބަރެއް ކަމަށެވެ.

ދަހްލާނަކީ ޔޫއޭއީއާ ގާތް ގުޅުމެއް އޮންނަ، އަދި ޔޫއޭއީގެ ތާއީދާއެކު ޣައްޒާގެ ވެރިކަމަށް އަތުވެދާނެ ކަމަށް ބެލެވޭ ފަލަސްޠީނުގެ ސިޔާސީ ފަރާތެކެވެ.

ޔޫއޭއީ އާއި އިސްރާއީލަކީ އަސްކަރީ އަދި ޖާސޫސީ ދާއިރާއިން ގާތް ގުޅުމެއް ބާއްވާ ދެ ޤައުމު ކަމަށް ވިޔަސް، ނަތަންޔާހޫގެ ބައެއް އަމަލުތަކުގެ ސަބަބުން މި ގުޅުމަށް ވަނީ ބައެއް ގޮންޖެހުންތައް ކުރިމަތިވެފަ އެވެ.

މިދިޔަ މެއި މަހު، ނަތަންޔާހޫ ޔޫއޭއީއަށް ދިއުމުން އެ ޤައުމުގެ ރައީސާ ސިއްރު ބައްދަލުވުމެއް ބޭއްވި ކަމަށް އޭނާގެ އޮފީހުން ބުނި ވާހަކަ ޔޫއޭއީގެ ފޮރިން މިނިސްޓްރީން ވަނީ ދޮގުކޮށްފަ އެވެ.

އެ ޤައުމުން ބުނެފައިވަނީ ރަސްމީކޮށް އިއުލާނު ނުކުރާ އެއްވެސް ދަތުރުފުޅެއް ނުވަތަ އެއްބަސްވުމެއްގެ ވާހަކައަކީ އެއްވެސް އަސާސެއް ނެތް ވާހަކަތަކެއް ކަމަށެވެ.

ނަމަވެސް ނަތަންޔާހޫގެ އޮފީހުން އޭރު ބުނެފައިވަނީ އެ ބައްދަލުވުމަކީ ދެ ޤައުމުގެ ގުޅުމުގައި ލިބުނު ”ތާރީޚީ ކުރިއެރުމެއް“ ކަމަށެވެ.