ރެފިއުޖީންނާއި ހިޖުރަވެރިންނަށް ކަނޑައަޅާފައިވާ އެތައް މިލިއަން ޑޮލަރެއްގެ ފަންޑު ޓްރަމްޕް ކެންސަލް ކޮށްފި

ބަޖެޓުގެ ކަންކަމުގައި ކޮންގްރެސްއަށް އޮންނަ ބާރުތަކަށް ރައީސް އަރައިގަންނަ ކަމަށް ބުނެ، އެމެރިކާގެ ދެ ސިޔާސީ ޕާޓީގެ މެންބަރުން ވެސް ދަނީ މި ނިންމުމަށް ފާޑުކިޔަމުންނެވެ.

ރެފިއުޖީންނާއި ހިޖުރަވެރިންނަށް އަދި އެފަރާތްތަކާ ގުޅުންހުރި ޚިދުމަތްތަކަށް އެމެރިކާގެ ކޮންގްރެސްއިން ފާސްކޮށްފައިވާ 810 މިލިއަން ޑޮލަރުގެ ފަންޑު ކެންސަލް ކުރުމަށް ޓްރަމްޕްގެ ސަރުކާރުން ނިންމާފައިވާކަން އޮފީސް އޮފް މެނޭޖްމަންޓް އެންޑް ބަޖެޓުން މިދިޔަ ހަފުތާ ބަންދުގައި ވަނީ ހާމަކޮށްފަ އެވެ.

އިޝްތިހާރު

ކޮމާސް، އެޑިއުކޭޝަން، ހެލްތު އެންޑް ހިއުމަން ސާވިސަސް، ހޯމްލޭންޑް ސެކިއުރިޓީ، ހައުސިންގ އެންޑް އަރބަން ޑިވެލޮޕްމަންޓް އަދި ޖަސްޓިސް ޑިޕާޓްމަންޓަށް ކަނޑައަޅާފައިވާ ބައެއް ފަންޑުތައް އުވާލުމަށް ހުށަހަޅައި، ޓްރަމްޕްގެ ސަރުކާރުން ހުކުރު ދުވަހު ވަނީ މަޖިލީހުގެ ރައީސް މައިކް ޖޯންސަނަށް ސިޓީއެއް ފޮނުވާފަ އެވެ.

”ރެސިޝަން“ ނުވަތަ ފަންޑު އުވާލުމަކީ ކޮންގްރެސްއިން ކަނޑައަޅާފައިވާ ވަކި ޚާއްޞަ ބަޖެޓެއް ބާތިލްކުރުމަށް ރައީސްއެދު މެވެ.

ސީ.އެން.އެން އިން ރިޕޯޓްކޮށްފައިވާ މި ސިޓީގައި ބަޔާންކޮށްފައިވާ ގޮތުން، މި ފަންޑުތައް އުވާލުމަކީ އެމެރިކާގެ ރައްޔިތުންނަށް އިސްކަންދީ، އެމެރިކާގެ ޓެކްސް ފައިސާ ބޭރުގެ ރައްޔިތުންނަށް ހޭދަކުރުން ހުއްޓާލުމަށް ސަރުކާރުން ގެންގުޅޭ ސިޔާސަތާ އެއްގޮތް ނިންމުމެކެވެ.

ޤާނޫނު ހަދާ މަޖިލީހުގެ ބައެއް މެންބަރުން ދެކޭގޮތުގައި، މިއީ ކޮންގްރެސްގެ ބާރުތައް މުގުރާލައި، ރައީސްގެ ބާރު ނަހަމަ ގޮތުގައި ބޭނުންކުރުމުގެ އަމަލެކެވެ.

ކޮންގްރެސްގެ ރިޕަބްލިކަން މެންބަރެއް ކަމަށްވާ ސޫޒަން ކޮލިންސް ބުނީ، ކޮންގްރެސްގެ ހުއްދައާ ނުލައި ފާސްކޮށްފައިވާ ފައިސާއެއް އުވާލަން މަސައްކަތް ކުރުމަކީ ޤާނޫނާ ޚިލާފު ކަމެއް ކަމަށެވެ. އަދި މި ޣައިރު ޤާނޫނީ އަމަލުތަކާ ދެކޮޅަށް މަސައްކަތް ކުރާނެ ކަމަށްވެސް އޭނާ ފާހަގަކުރި އެވެ.

ޑިމޮކްރެޓިކް ސެނެޓަރ ޖެފް މާކްލީ ސޯޝަލް މީޑިއާގައި ބުނި ގޮތުގައި، މިއީ ރައީސް ބޭނުންވާ ގޮތަށް ބަޖެޓް ބަދަލުކުރަން ކުރާ ޣައިރު ޤާނޫނީ މަސައްކަތެކެވެ.

މި ފިޔަވަޅުތަކަކީ ހިޖުރަވެރިވުން ހުއްޓުވުމަށް ޓްރަމްޕްގެ ސަރުކާރުން ކުރަމުންދާ މަސައްކަތްތަކުގެ ބައެކެވެ.

އެމެރިކާގެ ބިމަށް އުފަންވާ ކުދިންނަށް އޮޓޮމެޓިކުން ރަށްވެހިކަން ލިބޭ އުސޫލު އުވާލުމަށް ވެސް ވައިޓް ހައުސްއިން ވަނީ މަސައްކަތް ކޮށްފަ އެވެ.

ނަމަވެސް ސުޕްރީމް ކޯޓުން ވަނީ އެ ނިންމުން ބާޠިލްކޮށްފަ އެވެ. މީގެ އިތުރުން، އެމެރިކާގައި ދާއިމީ ރަށްވެހިކަން އަދި ނުލިބޭ ރެފިއުޖީން ހައްޔަރުކުރުމުގެ ފުޅާ ބާރުތަކެއް އިމިގްރޭޝަން އޮފިސަރުންނަށް މިހާރު ވަނީ ދީފަ އެވެ. އަދި ވިސާގެ ހާލަތު ބަދަލުކުރަން ބޭނުންވާ ބޭރުގެ ފަރާތްތަކުން އެމެރިކާއިން ބޭރަށް ގޮސް، އެހެން ޤައުމެއްގައި ހުންނަ އެމެރިކާ އެމްބަސީއެއް މެދުވެރިކޮށް ކުރިމަތިލާންޖެހޭ ގޮތަށް ވެސް ވަނީ ހަމަޖައްސާފަ އެވެ.

ހިޖުރަވެރިންނާ ދެކޮޅަށް އަޅަމުންދާ ފިޔަވަޅުތަކުގެ ތެރެއިން، ފަލަސްޠީނަށް ތާޢީދުކުރާ ފަރާތްތަކަށާއި އިސްރާއީލަށް ފާޑުކިޔާ ފަރާތްތަކަށް ވެސް ޓްރަމްޕްގެ ސަރުކާރުން ދަނީ އަމާޒުކުރަމުންނެވެ.

އެގޮތުން ޣައްޒާ ހަނގުރާމައާ ދެކޮޅަށް އަޑުއުފުލި ކޮލަމްބިއާ ޔުނިވަރސިޓީގެ ދަސްވެނިވުމެއް ކަމަށްވާ މަހްމޫދު ޚަލީލް ވަނީ ސަރުކާރާ ދެކޮޅަށް ދަޢުވާ އުފުލާފަ އެވެ.