ފާޑުކިޔުންތައް އަމާޒުވެފައިވާ އިލެކްޝަންސް ކޮމިޝަނުން ތަފާތު ދައްކާލައިފި

އިންޑިއާގެ އިލެކްޝަންސް ކޮމިޝަނުން ހާމަކުރި ގޮތުގައި، ޑިޖިޓަލް ދާއިރާއިން އަލަށް ފަށާ މަސައްކަތްތަކާ ގުޅޭގޮތުން ކުރިއަށް އޮތްތަނުގައި ނިންމާ ކޮންމެ ނިންމުމެއް ނިންމާނީ އިތުރު މަޝްވަރާތަކާއި ފުރިހަމަ ބެލުންތަކަށް ފަހުގަ އެވެ.

އިންޑިއާގެ އިލެކްޝަންސް ކޮމިޝަނުގެ ހިންގުމަށް އަމާޒުވަމުންދާ ފާޑުކިޔުންތަކާ ގުޅިގެން، އެ ކޮމިޝަނަކީ ބަދަހި ތަނެއްގެ ގޮތުގައި ދެއްކުމަށް ހޮނިހިރު ދުވަހު ވަނީ މަސައްކަތް ކޮށްފަ އެވެ.

އިޝްތިހާރު

އެގޮތުން، ޚާއްޞަ އިންޓެންސިވް ރިވިޝަނާ ގުޅޭ ހުރިހާ ނިންމުންތަކަކީވެސް ކޮމިޝަނުގެ ހުރިހާ މެންބަރުންގެ އިއްތިފާޤުން ނިންމާފައިވާ ނިންމުންތަކެއްކަން ފާހަގަކޮށް، ސަރުކާރާއި އިދިކޮޅު ފަރާތްތަކުން އުފައްދާފައިވާ މުހިންމު ސުވާލުތަކަށް ކޮމިޝަނުން ވަނީ ޖަވާބުދާރީވެފަ އެވެ.

މިދިޔަ ހަފުތާގެ ކުރީކޮޅު ފެށުނު ޚިޔާލު ތަފާތުވުންތަކަށްފަހު، ޗީފް އިލެކްޝަން ކޮމިޝަނަރު ގްޔަނޭޝް ކުމާރާއި، އިންޑިއާގެ އިލެކްޝަން ކޮމިޝަނަރުން ކަމަށްވާ އެސް.އެސް ސަންދޫ އަދި ވިވެކް ޖޯޝީ ބައިވެރިވެވަޑައިގެންނެވި ފުރަތަމަ ރަސްމީ ބައްދަލުވުމުގައި، ކޮމިޝަނުގެ ބެކްއެންޑް ސޮފްޓްވެއަރއަށް އަމާޒުވި ފާޑުކިޔުންތަކަށް ރައްދުދީ، އެކަން މުރާޖައާ ކުރުމަށް ވަނީ ނިންމާފަ އެވެ. އަދި ކުރިއަށް އޮތްތަނުގައި ޑިޖިޓަލް ދާއިރާއިން ނިންމާ ކޮންމެ ނިންމުމެއްގައި ފުޅާދާއިރާއެއްގައި މަޝްވަރާކޮށް، ކަންކަން ކަށަވަރު ކުރާނެ ކަމަށް ބުނެފައިވެ އެވެ.

މީގެ އިތުރުން، ގޯއާގެ އެސް.އައި.އާރް އާ ގުޅޭގޮތުން ފެންމަތިވެފައިވާ ތުހުމަތުތަކަށްވެސް އިންޑިއާގެ އިލެކްޝަންސް ކޮމިޝަނުން ވަނީ ތަފްޞީލީ މަޢުލޫމާތު ދީފަ އެވެ.

”މި ނޫސްބަޔާނަކީ 26 ސެޕްޓެމްބަރު 2026 ގައި ބޭއްވި ކޮމިޝަނުގެ ބައްދަލުވުމުގައި ނިންމާފައިވާ ނިންމުންތަކާ އެއްގޮތަށް، ކޮމިޝަނުގެ ހުރިހާ މެންބަރުންގެ ރުހުމާއެކު ނެރެފައިވާ ބަޔާނެއް،“ ކަމަށް ކޮމިޝަނުން ބުނެފައިވެ އެވެ.

މިކަން ސާބިތުކޮށްދިނުމަށްޓަކައި ޗީފް އިލެކްޝަން ކޮމިޝަނަރާއި ދެ ކޮމިޝަނަރުން އެކުގައި ތިއްބެވި ފޮޓޯއެއްވެސް ބަޔާނާއެކު އާންމުކޮށްފައިވެ އެވެ.

މިދިޔަ ހޯމަ ދުވަހު ’އިންޑިއަން އެކްސްޕްރެސް‘ އިން ކުރި ތަޙަޤީޤީ ރިޕޯޓެއްގައި ބުނެފައިވަނީ، ނޮވެމްބަރު 2025 އިން އޯގަސްޓް 2026 އަށް ހިނގި މުއްދަތުގައި ސަންދޫ އާއި ޖޯޝީ މަދުވެގެން 14 ފަހަރު ލިޔުމުން ޚިޔާލުތަފާތުވުން ފާޅުކޮށް، ކެބިނެޓް ސެކްރެޓަރީއަށް ސިޓީ ފޮނުއްވާފައިވާ ކަމަށެވެ. އަދި ކޮމިޝަނުގެ މަރުކަޒީ އައި.ޓީ ޓީމުން، އިންތިޚާބީ އޮފިޝަލުންނަށް ކޮމިޝަނުގެ ސޮފްޓްވެއަރ ބޭނުންކުރުމަށް ހުރަސްއަޅާފައިވާ ކަމަށްވެސް އެ ރިޕޯޓުގައި ތުހުމަތުކޮށްފައިވެ އެވެ.

ނަމަވެސް، އިންޑިއާގެ އިލެކްޝަންސް ކޮމިޝަނުން ބުނެފައިވަނީ ޚިޔާލުތަފާތުވުމަކީ މަޝްވަރާގެ މަރުހަލާގައި ހިނގާ ޢާންމު ކަމެއް ކަމަށާއި، ކޮމިޝަނުގެ ހުރިހާ ޑިޖިޓަލް ވަސީލަތްތަކަކީވެސް ހުއްދަނެތި އެއްވެސް ބަދަލެއް ނުގެނެވޭނެ ފަދަ ވަރުގަދަ ރައްކާތެރިކަމުގެ ފިޔަވަޅުތަކާއެކު ހިންގާ ވަސީލަތްތަކެއް ކަމަށެވެ.