މައިންބަފައިންނަށް އިޙްތިރާމްކުރުން 01

ކުރު ޖަވާބެއް:
ރަސޫލުﷲ ޞައްލަﷲ ޢަލައިހި ވަސައްލަމަ، މައިންބަފައިންނަށް ހެޔޮކޮށް ހިތުމުގެ މުހިންމުކަން ތަކުރާރުކޮށް ގެންނަވާފައިވަނީ ﷲ އަށް އަޅުކަންކުރުމަށްފަހު އެންމެ އިސްކަންދޭންޖެހޭ ކަންތަކުގެ ގޮތުގަ އެވެ. އަދި އެކަމަކީ ސީދާ ސުވަރުގެއާ ގުޅިފައިވާ ކަމެއްގެ ގޮތުގައި ބަޔާންކުރައްވާފައިވެ އެވެ.

މި ރިވާޔަތްތަކުން އެނގޭ ގޮތުގައި މިއީ ވަރަށް ބޮޑު މަސްއޫލިއްޔަތެކެވެ. އަދި ހަރުކަށި ނުވަތަ މުސްލިމް ނޫން މައިންބަފައިންނަށްވެސް އިޙްތިރާމްކޮށް ހެޔޮކޮށް ހިތުމަށް ޞަޙާބީންނަށް ވަނީ އުނގަންނައިދެއްވާފަ އެވެ.

އިޝްތިހާރު

ﷲ އަށް އަޅުކަންކުރުމާ ޖެހިގެން މައިންބަފައިންނަށް ހެޔޮކޮށް ހިތުން:
ޞަޙީޙް ބުޚާރީގައި ޢަބްދުﷲ އިބްނު މަސްޢޫދު ރަޟިޔަﷲ ޢަންހުގެ ކިބައިން ރިވާވެގެންވާ ގޮތުގައި، ﷲ ގެ ޙަޟްރަތުގައި އެންމެ ލޯބިވެތިވެގެންވާ ޢަމަލަކީ ކޮބައިތޯ އެކަލޭގެފާނު ރަސޫލާ ޞައްލަﷲ ޢަލައިހި ވަސައްލަމައާ ސުވާލުކުރެއްވި އެވެ.

ރަސޫލާ ޙަދީޘްކުރެއްވީ ”ވަޤުތުން ވަޤުތަށް ނަމާދުކުރުން“ ކަމަށެވެ. ދެން ކޮން ކަމެއްތޯ ސުވާލުކުރުމުން ”މައިންބަފައިންނަށް ހެޔޮކޮށް ހިތުން“ ކަމަށް ޙަދީޘްކުރެއްވި އެވެ. އަދި އޭގެ ފަހުން ކޮން ކަމެއްތޯ އެއްސެވުމުން ”ﷲ ގެ މަގުގައި ޖިހާދުކުރުން“ ކަމުގައި ޙަދީޘްކުރެއްވި އެވެ.

މި ތަރުތީބުން އެނގެނީ މައިންބަފައިންނަށް ހެޔޮކޮށް ހިތުމަކީ ނަމާދަށްފަހު އެންމެ މުހިންމު ކަންތައް ކަމާއި، އެއީ ޖިހާދުކުރުމަށްވުރެ ވެސް އިސްކަންދެވިފައިވާ ކަމެއް ކަމެވެ.

ޢިލްމުވެރިން ފާހަގަކުރައްވާ ގޮތުގައި މި ތަރުތީބަކީ ޙިކުމަތްތެރި ތަރުތީބެކެވެ. އިންސާނަކު މި ދުނިޔެއަށް އައުމުގެ ސަބަބަކީ އަދި ތަރުބިއްޔަތުކޮށް ބަލާބޮޑުކުރި ބަޔަކީ މައިންބަފައިން ކަމަށްވާއިރު، އެމީހުންނަށް ޝުކުރުވެރިވުމަކީ ﷲ އަށް ޝުކުރުވެރިވުމާ ގުޅިފައިވާ ކަމެކެވެ.

ކީރިތި ޤުރްއާނުގެ އިސްރާ ސޫރަތުގެ 23 ވަނަ އާޔަތުގައިވެސް ﷲ އަށް މެނުވީ އަޅުކަން ނުކުރުމަށް ކުރެއްވި އަމުރުފުޅާ ގުޅިގެން ވަޤުތުން އައިސްފައިވަނީ މައިންބަފައިންނަށް އިޙްސާންތެރިވުމުގެ ޢަމުރުފުޅެވެ.

ނުނިމޭ….