އަލް އަބްރާރު ޙައްޖު އެންޑް ޢުމްރާ ކުންފުނީގެ ހުއްދަ ހިފަހައްޓައިފި
މި ރަމަޟާން މަހު ޢުމްރާއަށް މީހުން ގެންދިއުމަށް ފައިސާ ނެގުމަށްފަހު، މަޤުބޫލު އެއްވެސް ސަބަބެއް ނެތި ދަތުރު ކެންސަލްކޮށްފައިވާތީ އަލް އަބްރާރް ޕްރައިވެޓް ލިމިޓެޑުގެ ހުއްދަ ހިފަހައްޓައިފިއެވެ.
މި މައްސަލަ އިސްލާމީކަންތައްތަކާ ބެހޭ ވުޒާރާއަށް ހުށައެޅުމާއެކު ވުޒާރާއިން ވަނީ މި މައްސަލަ ބަލަން ފަށާފައެވެ. އަދި މިހާތަނަށް ބެލި ބެލުމުން މި ކުންފުނިން 3 މާރިޗު 2026 އިން 26 މާރިޗް 2026 ގެ ނިޔަލަށް ކުރުމަށް ހަމަޖައްސާފައިވާ ޢުމްރާ ދަތުރަށް ޢުމްރާވެރިން ފުރުމަށް އެންމެ ފަހުގެ ތައްޔާރީތައް ވަމުންދަނިކޮށް އެ ދަތުރު ކެންސަލްކޮށްފައިވަނީ މަޤުބޫލު އެއްވެސް ސަބަބެއް ނެތި އަދި ދިވެހިރާއްޖެއިން ޢުމްރާއަށް މީހުން ގެންދިއުމާއި ބެހޭ އުސޫލާ ޚިލާފަށެވެ.
އެހެންކަމުން ޢުމްރާއަށް މީހުން ގެންދިއުމަށް އެ ކުންފުންޏަށް ދީފައިވާ ހުއްދަ ވަގުތީ ގޮތުން ހިފަހައްޓާ، އަދި މިކަމާ ގުޅޭ ގޮތުން އިތުރަށް ސާފުކުރަން ޖެހޭ މަޢުލޫމާތުތަކާއި ބަލަންޖެހޭ ކަންކަން ބެލުމަށްފަހު އުސޫލުގެ ތެރެއިން އަޅަން ޖެހޭ ފިޔަވަޅުތައް ކުންފުންޏާ ދެކޮޅަށް އަޅުމަށް ވުޒާރާއިން ވަނީ ނިންމާފައެވެ.
މީގެ އިތުރުން މި މައްސަލައާއި ގުޅިގެން މިހާތަނަށް ޢުމްރާގެ އަޅުކަމަށް ނުފުރިތިބި ޢުމްރާވެރިންނަށް އެހީތެރިކަން ފޯރުކޮށްދެވެންހުރި ގޮތްތަކަކީ ބަލާ އެ ޚިދުމަތްތައް ފަހިކޮށްދިނުމުގެ މަސައްކަތް ވުޒާރާއިން އަންނަނީ ކުރަމުންނެވެ.
މިލިޔުން ކިޔާލުމުން
