ފުޑް އެންޑް ބެވަރޭޖް ޝޯ 2026 ހުޅުވުމުގެ ރަސްމިއްޔާތުގައި ވަޒީރު އަޙްމަދު ޝިޔާމް ބައިވެރިވެވަޑައިގެންފި
ހުޅުމާލެ ސެންޓްރަލް ޕާކުގައި ބާއްވާ ”ފުޑް އެންޑް ބެވަރޭޖް ޝޯ 2026“ ގެ 9 ވަނަ އެޑިޝަން ހުޅުވުމުގެ ރަސްމިއްޔާތުގައި މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ބައިވެރިވެވަޑައިގެންފިއެވެ.
މި މަހުގެ 21 އިން 24 އަށް ކުރިއަށްދާ މި މައުރަޒު ހުޅުވައިދެއްވުމަށްފަހު، ވަޒީރު ވަނީ މައުރަޒުގެ އެކި ސްޓޯލްތަކަށް ޒިޔާރަތްކުރައްވާފައެވެ. މި ޒިޔާރަތުގައި، މިއަހަރުގެ މައުރަޒުގައި ބައިވެރިވި ފަރާތްތަކުން ދައްކާލާފައިވާ ކާބޯތަކެތީގެ އައު އަދި އީޖާދީ އުފެއްދުންތައް ވަޒީރު ބައްލަވާލައްވައި، އެ ތަކެތީގެ މަޢުލޫމާތު އޮޅުންފިލުއްވިއެވެ.
ހައިރައިޒްގެ ފަރާތުން އިންތިޒާމުކުރާ މި ހަރަކާތަކީ، ކާބޯތަކެތީގެ ސިނާއަތުގައި މަސައްކަތްކުރާ ފަރާތްތަކާއި ވިޔަފާރިވެރިން އެއްތަނަކުން ބައްދަލުވެ، އެ ދާއިރާގެ އުފެއްދުންތެރިކަމާއި ފެންވަރު ދައްކާލުމަށް މަގުފަހިކޮށްދޭ މުހިންމު މަންސައެކެވެ.
މި ސިނާއަތް އިތުރަށް ކުރިއަރުވައި، ވިޔަފާރިތަކަށް އައު ފުރުޞަތުތައް ހޯދައިދިނުމަށް ބާރުއަޅާ މިފަދަ ކާމިޔާބު ހަރަކާތެއް އިންތިޒާމުކުރި ކަމަށްޓަކައި، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވަނީ ހައިރައިޒް އަށް މަރުޙަބާ ދަންނަވާފައެވެ. މި މައުރަޒަކީ ރާއްޖޭގެ ކާބޯތަކެތީގެ ބާޒާރުގައި ހުރި ފުރުޞަތުތަކާއި، ދިވެހި އުފެއްދުންތައް އިޝްތިހާރުކުރުމަށް ލިބޭ ބޮޑު އެހީތެރިކަމެއްގެ ގޮތުގައި އެ ވުޒާރާއިން ފާހަގަކުރެއެވެ.
މިލިޔުން ކިޔާލުމުން
