ފުޑް އެންޑް ބެވަރެޖް އެކްސްޕޯ ވަރޗުއަލްކޮށް ބާއްވަން ތައްޔާރުވާން ފަށައިފި

ފުޑް އެންޑް ބެވަރެޖް އެކްސްޕޯ ވަރޗުއަލްކޮށް ބާއްވަން ތައްޔާރުވާން ފަށައިފި އެވެ.

މި އިވެންޓު ބާއްވާ ސަޕްލައި އެމް.ވީ އިންބުނީ އަންނަ ޖޫން މަހު ދިވެހިރާއްޖޭގެ ފުރަތަމަ ވަރޗުއަލް ފުޑް އެންޑް ބެވަރޭޖް އެކްސްޕޯ އަދި ކަލިނަރީ ޗެލެންޖް ބޭއްވުމަށް ތައްޔާރުވަމުން އަންނަކަމަށެވެ.

އިޝްތިހާރު

މިއިވެންޓުގައި ޝެފުން، އެފް އެންޑް ބީ މެނޭޖަރުން، ރިސޯރޓް މެނޭޖަރުން، ރެސްޓޯރަންޓް އަދި ފިހާރަވެރިން ބައިވެރިވާނެ ކަމަށް ވެސް އެފަރާތުން ބުންޏެވެ.

ސަޕްލައި.އެމްވީ އިން ބުނީ މި އިވެންޓް ބޭއްވުމުގެ މައިގަނޑު މަގްސަދަކީ ޕެންޑެމިކުގެ ދުނިޔޭގައިވެސް ދިވެހިރާއްޖޭގެ އިގްތިޞާދު ހުއްޓުމަކަށް އަޔަނުދީ ވިޔަފާރިތަކަށް ބާރުދީ ޑިޖިޓަލް ހަރަކާތްތައް ރައްކާތެރިކަމާއި ހިންގުމުގެ މަގުފަހިކޮށްދިނުން ކަމަށެވެ.

މިއިވެންޓަކީ ކާބޯތަކެތީގެ ވިޔަފާރި ކުރާ ކުންފުނިތަކަށް އެމީހުންގެ މުދާތައް ދައްކާލުމައް ލިބޭ ބޮޑު ފުރުޞަތެއް ކަމަށާއި އިވެންޓުގައި ހިމެނެނީ 3 ބައި ކަމަށެވެ.

އެގޮތުން ވަރޗުއަލް އެކްޒިބިޝަން 15 ޖޫން އިން ފެށިގެން 30 ޖޫން އާއި ހަމައަށް ސަޕްލައި.އެމްވީ ގެ ވެބްސައިޓުގައި އިވެންޓަށް ޚާއްސަ ޕޭޖެއްގައި ބައިވެރިވާ ކުންފުނިތަކުގެ މުދާތަށް ބަލާލެވެން ހުންނާނެ ކަމަށާއި މިޕޭޖުން ކަސްޓަމަރުންނަށް އޯޑަރުދެވޭނެ ކަމަށް ވެސް ބުންޏެވެ. އަދި ލައިވް އިވެންޓް ކުރިއަށް ދާނީ ޖޫން 27ން ޖޫން 30ށް ކަމަށް ވެސް ބުންޏެވެ.

ލައިވް އިވެންޓްގައި ދާއިރާގެ މުހިންމު ބޭފުޅުން ވާހަކަ ދައްކާނެ ކަމަށާއި ޕެނަލް ޑިސްކަޝަންތަކާއި ޕްރެސެންޓޭޝަންތަކެއް މި އިވެންޓުގައި ހިމެނޭ ކަމަށް އެފަރާތުން ބުންޏެވެ.

މި އެކްސްޕޯގައި ކުރިއަށްދާ ކުކިން ޗެލެންޖުގައި ކެއްކުމުގެ މުބާރާތުގައި ރާއްޖޭގެ އެކިހިސާބުތަކުން ފުންނާބުއުސް ޝެފުން ވާދަ ކުރާ އިރު، މޮޅުވާ ޝެފުންނަށް ޚާއްސަ އިނާމްތަކެއް ދިނުމަށް ނިންމާފައިވާ ކަމަށް ވެސް ބުންޏެވެ.

ސަޕްލައި އެމްވީ އިން ބުނީ އިވެންޓުގައި ބައިވެރިވުމަށް ފުރުޞަތު މޭމަހުގެ ނިޔަލަށް ހުޅުވިފައި އޮންނާނެ ކަމަށެވެ.

މި އިވެންޓާއި ބެހޭގޮތުން މައުލޫމާތު ސާފުކުރެއްވުމަށް ގުޅުއްވާނީ 9470004ށް ނުވަތަ 9466156؛ އީމެއިލް ކުރައްވާނީ jazlaan@supply.mv އަށް ގުޅުއްވުމަށް އެފަރާތުން އެދެއެވެ.