މެލޭޝިއާގެ ކުރީގެ ބޮޑުވަޒީރު ގޭބަންދަށް ބަދަލުކޮށްފި

1 މެލޭސިޔާ ޑިވޮލެޕްމެންް ބްރަހާދު (1އެމްޑީބީ) ގެ ބޮޑު ޚިޔާނާތުގެ މައްސަލައިގައި ޖަލަށް ލާފައި ހުންނެވި މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާާގު އޭނާގެ ޖަލު ހުކުމުގެ ބާކީބައި ގޭބަންދުގައި ފުރިހަމަކުރެއްވުމަށް ޖަލުން ގެއަށް ބަދަލުކޮށްފި އެވެ.

ޢުމުރުން 73 އަހަރުގެ ނަޖީބު ކުއާލަލަމްޕޫރުގައި ހުންނަ އޭނާގެ ގެއަށް ވަޑައިގަތީ އަންގާރަ ދުވަހުގެ ރޭގަނޑުގެ ވަގުތެއްގައި ފުލުހުންނާއި ޖަލު ބަލަހައްޓާ ފަރާތްތަކުގެ ހާއްސަ ސަލާމަތީ ފިޔަވަޅުތަކާ އެކުގަ އެވެ.

އިޝްތިހާރު

ދައުލަތުގެ އިންވެސްޓްމަންޓް ފަންޑު 1އެމްޑީބީން ބިލިއަނުން ޑޮލަރު ވަގަށް ނެގި މައްސަލައިގައި ކުށް ސާބިތުވެ ނަޖީބު ޖަލަށް ލާފައިވަނީ 2022 ވަނަ އަހަރުގެ އޮގަސްޓް މަހުގަ އެވެ.

މިދިޔަ ސެޕްޓެމްބަރު މަހު ރަސްގެފާނު ދެއްވި މައާފުގެ ދަށުން ކޯޓުން ކަނޑައަޅާފައިވާ ޖޫރިމަނާ ދެއްކުމުން ހުކުމުގެ ބާކީބައި ގޭބަންދުގައި ހޭދަކުރުމުގެ ފުރުސަތު އޭނާއަށް ވަނީ ލިބިވަޑައިގެންފައެވެ.

މިއީ ކުރީގެ ރަސްގެފާނު އޭނާގެ 12 އަހަރުގެ ހުކުމް ދެބައިކުޅަ އެއްބަޔަށް ކުޑަކޮށްދެއްވި ފަހުން ލިބުނު ދެވަނަ ލުޔެވެ. ނަޖީބު ގޭބަންދުގައި ހުންނަވަން ޖެހޭނީ 2028 ވަނަ އަހަރުގެ އޮގަސްޓް މަހާ ހަމައަށެވެ.

މެލޭޝިއާގެ ސިޔާސީ މަސްރަހުގައި ނުފޫޒުގަދަ ބޭފުޅެއް ކަމަށްވާ ނަޖީބު އޭނާގެ މައްޗަށް ކުރެވޭ ތުހުމަތުތަކަށް އަބަދުވެސް އިންކާރު ކުރައްވަ އެވެ.

އޭނާ ވިދާޅުވާ ގޮތުގައި 4.5 ބިލިއަން ޑޮލަރުގެ މި ބޮޑު ޚިޔާނާތުގައި އޭނާއަކީ ބަޔަކު ރޭވުންތެރިކަމާއެކު ފްރޭމްކޮށްފައިވާ މީހެކެވެ. ނަމަވެސް ތަހުގީގީ އިދާރާތަކުން ބުނާ ގޮތުގައި 1 ބިލިއަނަށް ވުރެ ގިނަ ޑޮލަރު ވަނީ އޭނާއާ ގުޅުންހުރި ބޭންކް އެކައުންޓްތަކަށް ޖަމާކޮށްފައެވެ.

ނަޖީބުގެ ސިޔާސީ ޕާޓީން 50 މިލިއަން ރިންގިޓް (12.3 މިލިއަން ޑޮލަރު) ގެ ޖޫރިމަނާ ދެއްކުމާ ގުޅިގެން މިދިޔަ ހުކުރު ދުވަހު އޭނާ ޖަލުން ނެރުނު ނަމަވެސް އެޓާނީ ޖެނެރަލް ގާނޫނީ ބައެއް ކަންކަން ސާފުކުރަން އެދުމާ ގުޅިގެން އޭނާ އަލުން ޖަލަށް ގެންދެވުނެވެ.

ނަމަވެސް ކުއާލަލަމްޕޫރުގެ ހައިކޯޓުން އަންގާރަ ދުވަހުގެ ކުރީކޮޅު ވަނީ ނަޖީބު ބަދަލުކުރުމަށް ހުރި ގާނޫނީ ހުރަސްތައް ނައްތާލާފަ އެވެ.