ފޯރިގަދަ ކުރިމަތިލުމަކަށްފަހު، ކިނބިދޫ އިން ކަނޑޫދޫގެ މައްޗަށް ގަދަވެއްޖެ

ތ. ވަންދޫގައި މިހާރު ކުރިއަށްދާ އެމްޕީ ކަޕް 2018 ގެ ދެވަނަ މެޗު ފޯރިގަދަ ކުޅުމަކަށްފަހު، ކަނޑޫދޫގެ މައްޗަށް ކިނބިދޫއިން ކުރި ހޯދައިފިއެވެ.

ވަންދޫ ފުޓްބޯޅަ ދަނޑުގައި މިއަދު ހަވީރު ކުޅުނު މި މެޗު ކިނބިދޫއިން ކާމިޔާބުކުރީ 0-1 ލަނޑުންނެވެ.

އިޝްތިހާރު

ދެޓީމުންވެސް އެޓޭކިންގ ފުޓްބޯޅައެއް ކުޅުނު މި މެޗުގެ ހަމައެކަނި ގޯލު މެޗުގެ 37 ވަނަ މިނެޓުގައި ޖެހީ، މެޗުގެ މޮޅު ކުޅުންތެރިޔާގެ މަޤާމުވެސް ހޯދި ކިނބިދޫގެ ޖާދުﷲ މުޙައްމަދެވެ.

ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު ޢަބްދުﷲ ރިޔާޒު، އެދާއިރާގެ ރަށްތަކަށް ބާއްވަމުން އަންނަ މި މުބާރާތުގައި މާދަމާގެ މެޗުގައި ވާދަކުރާނީ މުބާރާތް ބާއްވާ ރަށް ކަމަށްވާ ވަންދޫ އާއި އޮމަދޫއެވެ.

އޮމަދޫ އިން ވަނީ މި މުބާރާތުގެ ފުރަތަމަ މެޗުގައި ހިރިލަންދޫ އާއިބައްދަލުކޮށް ބަލިވެފައެވެ. އެހެންކަމުން މާދަމާގެ މެޗަކީ އޮމަދޫއަށް މުހިންމު މެޗެކެވެ.

އެމްޕީ ކަޕަކީ ޢަބްދުﷲ ރިޔާޒް މަޖިލީހުގެ މެމްބަރުކަމަށް ކުރިމަތިލައްވާ ވެވަޑައިގެންނެވި ވަޢުދުތަކުގެ ތެރޭގައި ހިމެނޭ ވަޢުދުގެ ތެރޭގައި ހިމެނޭ ވަޢުދެކެވެ.

އެދާއިރާގެ 5 ރަށުގެ މެދުގައި ފުޓްބޯޅަ މުބާރާތެއް ކޮންމެއަހަރަކުވެސް ބޭއްވުމަށް ވަޢުދުވެވަޑައިގަތުމަށް ފަހު، ކޮންމެ އަހަރަކުވެސް މި މުބާރާތް އަންނަނީ ބާއްވަމުންނެވެ. އަދި މިއީ މިގޮތުން ބާއްވާ އެންމެ ފަހު މުބާރާތެވެ.

މި މުބާރާތް އެންމެފުރަތަމަ މުބާރާތް ކިނބިދޫގައި ބާއްވާފައިވާ އިރު، އެމުބާރާތް ކާމިޔާބުކޮށްފައިވަނީވެސް އެރަށުންނެވެ. އަދި ދެވަނަ މުބާރާތް ހިރިލަންދޫގައި ބޭއްވި އިރު، އެ މުބާރާތް ކާމިޔާބުކުރީ ހިރިލަންދޫއިންނެވެ.

މީގެ އިތުރުން ތިންވަނަ މުބާރާތްވެސް ހިރިލަންދޫގައި ބޭއްވި އިރު، މި މުބާރާތުގެ ޗެމްޕިއަންކަން ވަންދޫ އިން ވަނީ ހޯދާފައެވެ. އަދި ހަތަރުވަނަ މުބާރާތް ބާއްވާފައިވަނީ ވަންދޫގައެވެ. މި މުބާރާތް ކާމިޔާބުކުރީ ކިނބިދޫ އިންނެވެ.

އެހެންކަމުން އެމްޕީ ކަޕްގެ މިއަހަރުގެ މުބާރާތް ހިރިލަންދޫ އަދި ކިނބިދޫ ކާމިޔާބުކޮށްގެން އެމްޕީ ކަޕްގެ އެންމެ ކާމިޔާބު ޓީމުގެ ޝަރަފް ހޯދުމުގެ ދޮރު ވަނީ ހުޅުވިފައެވެ.