ސެޕްޓެންބަރު މަހު މީރާއަށް 1 ބިލިއަން ރުފިޔާ ބަލައިގެންފި

ވޭތުވެދިޔަ ސެޕްޓެންބަރު މަހު މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް 1.11 ބިލިއަން ރުފިޔާ ބަލައިގެންފައިވާކަމަށް އެ އޮތޯރިޓީން ހާމަކޮށްފިއެވެ.

މި އާއެކު މި އަހަރުގެ ސެޕްޓެންބަރު މަހުގެ ނިޔަލަށް ބަލައިގަތް ޖުމުލަ އާމްދަނީ އަކީ 11.39 ބިލިއަން ރުފިޔާއެވެ. މިއީ 2015 އަހަރުގެ މި މުއްދަތާ އަޅައިބަލާއިރު %8.1 އިތުރު އަދަދެކެވެ.

އިޝްތިހާރު

ސެޕްޓެންބަރު މަހު ބަލައިގަތް އާމްދަނީގެ އެންމެ ބޮޑު ބައެއް 40.6% ޙިއްޞާ ކުރާ އިރު، އެއީ 449.1 މިލިއަން ރުފިޔާއެވެ. ސެޕްޓެންބަރު މަހު ދެން އެންމެ ބޮޑު އާމްދަނީއެއް ލިބިފައިވަނީ ޓޫރިޒަމް ލޭންޑް ރެންޓް (328.38 މިލިއަން ރުފިޔާ ނުވަތަ %29.7) އިންނެވެ. އަދި ބީ.ޕީ.ޓީ (79.3 މިލިއަން ރުފިޔާ ނުވަތަ %7.2)، ޖޫރިމަނާ ފައިސާ (65.82 މިލިއަން ރުފިޔާ ނުވަތަ %6.0)، ގްރީން ޓެކްސް (54.74 މިލިއަން ރުފިޔާ ނުވަތަ %5.0) އާއި އެހެނިހެން ޓެކުހާއި ފީ (128.44 މިލިއަން ރުފިޔާ ނުވަތަ %11.6) ގެ ގޮތުގައި ލިބިފައިވާ އާމްދަނީ ފާހަގަކުރެވެއެވެ.

މީރާއިން މިއަދު ޢާންމުކުރި ތަފާސްހިސާބުގައި ވާގޮތުން މި އަހަރުގެ ސެޕްޓެންބަރު މަހު ބަލައިގަތް އާމްދަނީއަކީ 2015 ވަނަ އަހަރުގެ އެ މުއްދަތާ އަޅައިބަލާއިރު %24.6 އިތުރު ޢަދަދެކެވެ. އަދި މިއީ ސެޕްޓެންބަރު މަހު ލިބޭނެކަމަށް އަންދާޒާކޮށްފައިވާ ޢަދަދަށްވުރެ %0.3 އިތުރު ޢަދަދެއްވެސްމެއެވެ.

މި މަހުގެ އާމްދަނީ އިތުރުވި މައިގަނޑު އެއްސަބަބަކީ ރިސޯޓުތަކުގެ ކުލީގެ ގޮތުގައި ދައްކާފައިވާ ޢަދަދު އިތުރުވުން ކަމަށްވާ އިރު، ސެޕްޓެންބަރު 2016 ގައި ބަލައިގަތް އާމްދަނީގެ ތެރޭގައި އެމެރިކާ ޑޮލަރުން ބަލައިގަތް 51.9 މިލިއަން ޑޮލަރުވެސް ހިމެނެއެވެ.