ނަތަންޔާހޫގެ ސިޔާސީ ދައުރު ނިމެނީބާ؟

މިއަދު ’އިސްރާއީލު’ގައި ބާއްވާ ބަރުލަމާނީ އިންތިޚާބަކީ ބޮޑުވަޒީރު ބެންޖަމިން ނަތަންޔާހޫގެ ސިޔާސީ ކުރިމަގު ކަނޑައެޅިގެންދާނެ މުހިންމު އިންތިޚާބެކެވެ.

މި އިންތިޚާބު ކުރިމަތިވެފައިވަނީ އެ ޤައުމުގެ ދާޚިލީ މަސްލަހަތު ގޯސްވެ ސަރަހައްދީ ހަނގުރާމަތައް ދިގުލައިގޮސް ބައިނަލްއަޤްވާމީ މުޖުތަމައުގެ ފާޑުކިޔުންތައް އަމާޒުވެފައިވާ ދަނޑިވަޅެއްގަ އެވެ.

އިޝްތިހާރު

މިއީ 7 އޮކްޓޫބަރު 2023 ގެ ފަހުންނާއި ޣައްޒާ ލުބުނާން އަދި އީރާނާ ދެކޮޅަށް ކުރަމުންދާ ހަނގުރާމަތަކަށް ފަހު ބާއްވާ ފުރަތަމަ އިންތިޚާބެވެ.

މި އިންތިޚާބުން 120 ގޮނޑި ހިމެނޭ ކްނެސެޓް އެކުލެވިގެންވާ ގޮތް ކަނޑައެޅުނު ނަމަވެސް ސިޔާސީ މަސްލަހަތުތައް ބެހިފައިވާ ގޮތުން އެންމެ ގިނަ ގޮނޑި ކާމިޔާބު ކުރާ ފަރާތަކަށް ވެސް ސަރުކާރެއް އެކުލަވައިލުމުގެ ފުރުސަތު ނުލިބިދާނެ ކަމުގެ ބިރު އެބައޮތެވެ.

މި އިންތިޚާބުގައި ވާދަކުރަނީ ބޮޑުވަޒީރު ނަތަންޔާހޫގެ އިއްތިހާދާއި އަސްކަރީ އަދި ސިޔާސީ ގޮތުން ކުރިން އިސްކޮށް އުޅުނު ބަޔަކު ހިމެނޭ އިދިކޮޅު ފަރާތްތަކެވެ.

ނަތަންޔާހޫއާ އެންމެ ބޮޑަށް ވާދަކުރާ ފަރާތްތަކުގެ ތެރޭގައި ގާޑީ އައިޒަންކޮޓް އާއި ކުރީގެ ބޮޑުވަޒީރު ނަފްތާލީ ބެނެޓް ހިމެނެ އެވެ.

ނަތަންޔާހޫ މަގާމުން ދުރުކުރުމަށް އިދިކޮޅު ފަރާތްތަކުން ކުރާ މަސައްކަތް ކާމިޔާބުވާނީ ސަރުކާރެއް އެކުލަވައިލެވޭ ވަރަށް އެ ފަރާތްތަކަށް ގޮނޑި ކާމިޔާބު ކުރެވިގެންނެވެ.

ނަތަންޔާހޫގެ ލިކޫޑް ޕާޓީން އިސްވެ އޮންނަ އިއްތިހާދުގައި ހިމެނެނީ ހަރުކަށި ފިކުރުގެ އޮޓްޒްމާ ޔެހޫދީތު އާއި ރިލިޖަސް ޒަޔަނިޒަމްގެ އިތުރުން އުލްޓްރާ-އޯތޮޑޮކްސް ޕާޓީތައް ކަމަށްވާ ޝާސް އަދި ޔުނައިޓެޑް ތޯރާ ޖުޑައިޒަމް އެވެ.

’އިސްރާއީލު’ގެ އަސްކަރިއްޔާގެ ކުރީގެ ޗީފް އޮފް ސްޓާފް އައިޒަންކޮޓް އިސްވެ ހުންނަވަނީ މެދުމިނުގެ ފިކުރުގެ ޔަޝާރު ޕާޓީގަ އެވެ.

އޭނާގެ މައިގަނޑު އަމާޒަކީ 7 އޮކްޓޫބަރުގެ ހަމަލާތަކާ ގުޅިގެން ސަލާމަތީ ގޮތުން ވީ އިހުމާލުތަކަށް ޒިންމާދާރުކުރުވުމެވެ.

ބެނެޓް އިސްވެ ހުންނަނީ އިދިކޮޅު ލީޑަރު ޔައީރު ލަޕިޑް ވެސް ހިމެނޭ ’ޓުގެދަރ‘ އިއްތިހާދުގަ އެވެ.

މީގެ އިތުރުން ޔައީރު ގޯލާންގެ ’ޑިމޮކްރެޓްސް‘ އާއި އެވިގްޑޯ ލީބަރމަންގެ ’ޔިސްރާއީލް ބެއިޓެއިނޫ‘ ވެސް އިދިކޮޅު ފަރާތްތަކުގެ ތެރޭގައި ހިމެނެ އެވެ.

ޢަރަބި ލީޑަރުން އިސްކޮށް ތިބޭ ރާމް އަދި ޖޮއިންޓް ލިސްޓް ފަދަ ޕާޓީތަކުން ވެސް އިންތިޚާބުގައި ވާދަކުރެ އެވެ.

ނަމަވެސް މައިގަނޑު ދެ އިއްތިހާދަށް ވެސް މި ޕާޓީތަކާއެކު މަސައްކަތް ކުރުމުގައި ސިޔާސީ ހުރަސްތަކެއް ހުރުމުން ސަރުކާރެއް އެކުލަވައިލުމުގެ މަރުހަލާ އިތުރަށް ގޮންޖެހުންތަކާ ކުރިމަތިވުމަކީ އެކަށީގެންވާ ކަމެކެވެ.

ދައުލަތުގެ މީޑިއާ ’ކާން‘ އިން ނެގި ޚިޔާލު ހޯދުމުގެ ވޯޓަކުން ދައްކާގޮތުގައި އިދިކޮޅު އިއްތިހާދަށް 52 ގޮނޑި ލިބޭނެ ކަމަށް ލަފާކުރެވޭއިރު ނަތަންޔާހޫގެ އިއްތިހާދަށް ލިބޭނެ ކަމަށް ބެލެވެނީ 50 ގޮނޑި އެވެ.

ބާކީ ގޮނޑިތައް ލިބޭނީ އެހެނިހެން ޕާޓީތަކަށެވެ. މިއީ ހަމައެކަނި ލަފާކުރުމެކެވެ. ސަރުކާރެއް އެކުލަވައިލުމަށް ބޭނުންވާ 61 ގޮނޑީގެ އަޣުލަބިއްޔަތު އެއްވެސް ފަރާތަކަށް ކަށަވަރުވެފައި ނުވާއިރު ކުދި ޕާޓީތަކާއި އިންތިޚާބަށްފަހު ކުރެވޭ މަޝްވަރާތަކަކީ ސަރުކާރު ކަނޑައެޅުމުގައި ނިންމާ ފައިސަލާ ކުރަނިވި ކަންތައްތަކަށް ވެގެންދާނެ އެވެ.