އީރާނަށް އެމެރިކާގެ ޑްރޯނެއް އަތުލައެއް ނުގަނެވޭ – އެމެރިކާ

ހުރްމުޒް ކަނޑުއޮޅިން އެމެރިކާގެ ކަނޑުއަޑީގައި ދުއްވާ ޑްރޯނެއް އަތުލައިގަތްކަމަށް އީރާނުން ބުނި ނަމަވެސް، އެމެރިކާއިން އެކަން ދޮގުކޮށްފި އެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ކަނޑުގެ ސިފައިން ބުނާ ގޮތުގައި، ހުރްމުޒް ކަނޑުއޮޅީގައި ޖާސޫސީ މަސައްކަތެއް ކުރަމުންދިޔަ އެމެރިކާގެ ’ރީމަސް 600‘ މަރުކާގެ ކަނޑުއަޑީގައި ދުއްވާ އުޅަނދެއް ވަނީ ހިފަހައްޓާފަ އެވެ.

އިޝްތިހާރު

އީރާނުން ބުނި ގޮތުގައި މި އުޅަނދު އަތުލައިގަތީ އިންޓެލިޖެންސް އަދި އިލެކްޓްރޯނިކް ވޯފެއާގެ ވަރުގަދަ އޮޕަރޭޝަނެއްގެ ތެރެއިންނެވެ. އަދި އޭގައިވާ މަޢުލޫމާތުތައް ހޯދުމަށްޓަކައި އެ ޤައުމުގެ އަސްކަރީ މާހިރުންނާ މިހާރު ވަނީ އެ އުޅަނދު ހަވާލުކޮށްފަ އެވެ.

ނަމަވެސް، އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ ތަރުޖަމާނު ކެޕްޓަން ޓިމް ހޯކިންސް އަލްޖަޒީރާއަށް ދެއްވި ބަޔާނެއްގައި މިކަން ދޮގުކުރައްވައި ވިދާޅުވީ، އެމެރިކާގެ އަސްކަރީ ހުރިހާ ޑްރޯންތަކެއް މިހާރުވެސް ހުރީ އެމެރިކާގެ ފުރިހަމަ ކޮންޓްރޯލްގެ ދަށުގައި ކަމަށެވެ.

’ރީމަސް 600‘ އަކީ އެމެރިކާގެ ކަނޑުގެ ސިފައިންނާއި ނޭޓޯގެ ބައެއް ޤައުމުތަކުން ބޭނުންކުރާ، އަމިއްލައަށް ދަތުރުކުރުމުގެ ޤާބިލުކަން ލިބިފައިވާ ކަނޑުއަޑީގެ އުޅަނދެކެވެ.

ސެންސަރުތަކާއި، ކެމެރާ އަދި ސޯނާ ނިޒާމުތައް ހަރުކުރެވިފައިވާ މި އުޅަނދަކީ ކަނޑުގެ ސަރަހައްދުތައް ބެލެހެއްޓުމާއި، ކަނޑުގެ އަޑީގެ ޗާޓު ކުރެހުމާއި، މައިން ނައްތާލުން ފަދަ ކަންކަމަށް ބޭނުންކުރާ އުޅަނދެކެވެ.

މިއީ ހުރްމުޒް ކަނޑުއޮޅިން އެމެރިކާގެ ’ޑައިވް-އެލްޑީ‘ މަރުކާގެ އުޅަނދެއް އަތުލައިގަތް ކަމަށް އީރާނުން ދާދި ފަހުން ކުރި ދައުވާއަށް ފަހު، މިފަދަ އުޅަނދެއް ހިފެހެއްޓި ކަމަށް ބުނި ދެވަނަ ފަހަރެވެ.

ހުރްމުޒް ކަނޑުއޮޅި އަދިވެސް އޮތީ ބަންދުކޮށްފައި ކަމަށް އީރާނުގެ އައި.އާރު.ޖީ.ސީ އިން ތަކުރާރުކޮށް ބުނަމުން ދާއިރު، ހުއްދަ ނެތި އެ ސަރަހައްދުން ދަތުރުކުރާ އުޅަނދުތަކާއި އަސްކަރީ ހަރަކާތްތަކާ ދެކޮޅަށް ފިޔަވަޅު އަޅާނެ ކަމުގެ އިންޒާރު ވަނީ ދީފަ އެވެ.

އީރާނުގެ އަސްކަރިއްޔާގެ ކޮމާންޑަރު އިން ޗީފް މޭޖާ ޖެނެރަލް އަމީރު ހާތަމީ ވިދާޅުވީ އެ ކަނޑުއޮޅީގެ ފުރިހަމަ ބާރު އޮތީ ތެހެރާނަށް ކަމަށާއި، ގަލްފުގެ ޤައުމުތަކުން އެމެރިކާ ސިފައިން އެ ސަރަހައްދުން ބޭރުކުރުމަށް މަސައްކަތް ކުރަންޖެހޭ ކަމަށެވެ. އަދި ހަނގުރާމަ އަދި ނުނިމޭ ކަމަށާއި، މިހާރު މިއޮތީ ވަރަށް ނާޒުކު އަދި ގޮތް ނިންމަންޖެހޭ މަރުހަލާއެއްގައި ކަމަށް ސިފަކުރައްވައި، އީރާނުން ހޯދާފައިވާ ކާމިޔާބީތައް ދަމަހައްޓަންޖެހޭނެ ކަމަށް އޭނާ ވިދާޅުވި އެވެ.

މިކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ބުނީ، އީރާނުން ދޫދިނުމުންނާއި ހަނގުރާމަ ނިމުމާއެކު ތެލުގެ އަގު ދަށަށް ދާނެ ކަމަށާއި، އެކަން ވަރަށް އަވަހަށް ވާނެ ކަމަށެވެ.

ނަމަވެސް އީރާނުން ބުނަމުންދަނީ އެމެރިކާއިން އެ ޤައުމާ ދެކޮޅަށް ކުރަމުންދާ އިޤްތިޞާދީ ހަނގުރާމަ ހުއްޓާލަންދެން ހުރްމުޒް ކަނޑުއޮޅި ބަންދުކޮށްފައި ބާއްވާނެ ކަމަށެވެ.