ބޭހުގެ ބާވަތްތައް ނަހަމަގޮތުގައި ބޭނުންކުރުމާބެހޭ ތަމްރީން ޕްރޮގްރާމް ފަށައިފި
ޔުނައިނެޓް ނޭޝަންސް އޮފިސް އޮން ޑްރަގްސް އެންޑް ކްރައިމްސް (ޔޫ.އެން.އޯ.ޑީ.ސީ) އާއި ކަސްޓަމްސް ގުޅިގެން ކުރިއަށް ގެންދިއުމަށް ހަމަޖެހިފައިވާ ”ނޭޝަނަލް ޓްރެއިނިންގ ފޯރ ލޯ އެންފޯސްމެންޓް އޮފިސަރސް އޮފް މޯލްޑިވްސް އޮން ފާމަސޫޓިކަލް ޑްރަގްސް“ ތަމްރީން ޕްރޮގްރާމް ފަށައިފިއެވެ.
ކަސްޓަމްސް ބިލްޑިންގގައި ބޭއްވި ޚާއްޞަ ރަސްމިއްޔާތެއްގައި މި ތަމްރީން ޕްރޮގްރާމް އިފްތިތާހު ކޮށްދެއްވީ މިނިސްޓަރ އޮފް ހޯމް އެފެއަރޒް އަޒްލީން އަޙްމަދު އެވެ.
ދެ ދުވަހުގެ މުއްދަތަށް ކުރިއަށް ގެންދާ މި ތަމްރީން ޕްރޮގްރާމްގެ ބޭނުމަކީ ރާއްޖޭގައި ބޭހުގެ ބާވަތްތައް ނަހަމަގޮތުގައި ބޭނުންކުރާ މިންވަރާއި ބާވަތްތައް ދެނެގަތުމެވެ. އަދި ޤާނޫނާއި ޤަވާޢިދުތައް ތަންފީޒުކުރެވޭ މިންވަރު ދެނެގަތުމާއިމިކަންކަން ޙައްލުކުރުމަށް ހުރި ދަތިތަކާއި ގޮންޖެހުންތައް ދެނެގަނެ ކުރިއަށް ކުރަންހުރި ކަންކަން ދެނެގަތުމެވެ.
މިރަސްމިއްޔާތުގައި ވާހަކަ ދައްކަވަމުން ހޯމް މިނިސްޓަރ އަޒްލީން އަޙްމަދު ވިދާޅުވީ ރާއްޖޭގައި ފަރމަސޫޓިކަލް ޑްރަގް ނަހަމަގޮތުގައި ބޭނުންކުރާ މިންވަރު މަދުކުރުމަށް ވަރަށް ގިނަ ގޮންޖެހުންތައް ހުރި ކަމަށެވެ. އަދި އޭގެތެރޭގައި އެކަށީގެންވާ މިންވަރަށް ވަސީލަތްތައް ނެތުމާއި ކަމާއިގުޅޭ މާހިރުންގެ ދަތިކަމާއި ރާއްޖޭގެ ކަމާގުޅޭ ޤާނޫނާއި ޤަވާޢިދުތައް ފުރިހަމަވެފައިނެތުން ހިމެނޭކަމަށް އަޒްލީން ވިދާޅުވިއެވެ.
މީގެސަބަބުން ބޭހުގެ ބާވަތްތައް ނަހަމަގޮތުގައި ރާއްޖޭގައި ބޭނުންކުރާ ކަމަށާއި މިކަމަކީ ކަމާގުޅޭ އިދާރާތަކުން އިތުރަށް މަސައްކަތްކޮށް ހުއްޓުވަންޖެހިފައިވާ ކަމެއްކަމުގައި ފާހަގަކުރައްވާ މިނިސްޓަރ ވިދާޅުވީ މި ވޯކްޝޮޕްގެ ސަބަބުން ރާއްޖޭގައި މިކަންއޮތް މިންވަރު ދެނެގަނެވޭނެ ކަމަށެވެ. އަދި ކަމާއިގުޅޭ މުއައްސަސާތަކުގެ މެދުގައި ގުޅުން ބަދަހިކުރުމާއި އެކަށީގެންވާ ވިއުގައެއް ޤާއިމްކުރުމަށް މަގުފަހިވެގެންދާނެކަމަށްވެސް ވިދާޅުވިއެވެ.
ޔޫ.އެން،އޯ.ޑީ.ސީ ގެ ޕްރޮޖެކްޓް ކޯޑިނޭޓަރ ޕްރަބްޖީތް އެސް. ގުލާޓީ ދެއްކެވި ވާހަކައިގާ ވިދާޅުވީ ޔޫ.އެން.އޯ.ޑީ.ސީގެ ފަރާތުން ވަރަށް ގިނަ ޕްރޮގްރާމްތައް ރާއްޖޭގެ ތަންފީޒީ މުވައްސަސާތަކުގެ މުވައްޒަފުންނަށް ހިންގަމުންދާ ކަމަށެވެ.
އެގޮތުން ބޭހުގެ ބާވަތްތައް ނަހަމަގޮތުގައި ބޭނުންކުރުން ހުއްޓުވުމަށް އަދިވެސް ގިނަ މަސައްކަތް ކުރެވިގެންދާނެ ކަމަށާއިމޯލްޑިވްސް ކަސްޓަމްސް ސަރވިސްގައި ޤާއިމްކުރެވިފައިވާ ޔޫ.އެން.އޯ.ޑީ.ސީ ކޮމްޕިއުޓަރ ބޭސްޑް ޓްރެއިނިންގ ފެސިލިޓީގެ ޒަރިއްޔާއިންވެސް ކަމާގުޅޭ އިދާރާތަކުގެ މުވައްޒަފުން ތަމްރީން ކުރުމުގެ ކަންތައްތައްވެސް ކުރިއަށް ގެންދާނެ ކަމަށް އޭނާ ވިދާޅުވިއެވެ.
މި ތަމްރީން ޕްރޮގްރާމްގައި ރާއްޖޭގެ މިކަމާ ގުޅުންހުރި ތަންފީޒީ އިދާރާތަކާއި ސަރުކާރުގެ ކަމާގުޅޭވުޒާރާތަކުން8 އިދާރާއަކުން 45 ފަރާތް ބައިވެރިވެއެވެ.
މިރަސްމިއްޔާތުގައި ޑެޕިއުޓީ ކޮމިޝަނަރ އޮފް ކަސްޓަމްސް އިސްމާޢިލް ޢަބްދުﷲ ވެސް ބައިވެރިވެވަޑައިގެންނެވިއެވެ.
މިލިޔުން ކިޔާލުމުން
