ކުރީގެ މިނިސްޓަރ މަލީހު ޕީޕީއެމް އާ ގުޅެނީ!
ކުރީގެ ކޮމިއުނިކޭޝަން އެންޑް ސައިންސް މިނިސްޓަރު މުހައްމަދު މަލީހު ޖަމާލް އިދިކޮޅު ޕީޕީއެމް އާ ގުޅިވަޑައިގަންވަން އުޅުއްވާކަމަށް އަޑުތައް ފެތުރެން ފަށައިފި އެވެ.
އިތުބާރުހުރި މަސްދަރަކުން މަޢުލޫމާތު ލިބިފައިވާ ގޮތުގައި މަލީހު ޕީޕީއެމް އާ ގުޅިވަޑައިގަންނަވާނީ އެ ޕާޓީން މިރޭ ބާއްވާ ޚާއްސަ ހަފުލާގަ އެވެ. މި ހަފުލާ ކުޑައިރުކޮޅެއްގެ ތެރޭގައި ފަށާނެ އެވެ.
ރައީސް އަބްދުﷲ ޔާމީން އަބްދުލްޤައްޔޫމްގެ ސަރުކާރުގެ ފުރަތަމަ ޔޫތު މިނިސްޓަރުކަން ކުރެއްވި މަލީހަށް މި ސަރުކާރުގެ ކޮމިއުނިކޭޝަން މިނިސްޓަރުކަން ލިބިވަޑައިގަތީ ސަރުކާރު ހިންގާ ކޯލިޝަނުގައި ހިމެނޭ ޖުމްހޫރީ ޕާޓީ (ޖޭޕީ)ގެ ސްލޮޓެއްގަ އެވެ.
ރައްޔިތުންގެ މަޖިލީހުން މަލީހުގެ އިތުބާރު ނެތްކަމަށް ފާސްކޮށް މަގާމުން ވަކިކޮށްފައިވަނީ މިދިޔަ މާރޗު މަހުގެ އެއްވަނަ ދުވަހު އެވެ. އަދި މާރޗު ދިހަވަނަ ދުވަހު މަލީހު ވަނީ ޖުމްހޫރީ ޕާޓީން އިސްތިއުފާ ދެއްވާފަ އެވެ.
އޭގެ ފަހުން މަލީހު ގެންދަވަނީ އެކިއެކި މަންސަތަކުގައި ސަރުކާރަށް ވަރަށް ބޮޑަށް ފާޑުވިދާޅުވަމުން ނެވެ.
އެގޮތުން މާލެއާއި، ހުޅުމާލޭގެ އިންޖީނުގެ ގްރޭޓަރ މާލެ ގްރިޑް މެދުވެރިކޮށް ސިންކްރޮނައިޒް ކުރުމުން ވެސް މަލީހު ވަނީ އެކަމަށް ޢިޝާރާތް ކުރައްވާ ޓްވީޓެއް ކުރައްވާފަ އެވެ.
އެ ޓްވީޓުގައި މަލީހު ވިދާޅުވެފައި ވަނީ ރިވެތި ގޮތަކީ މި ޕްރޮޖެކްޓުގެ މޭސްތެރި ރައީސް ޔާމީނަށް ހައްޤު ޝުކުރު މިޓުވީޓުގައިވެސް ހިމެނުން ކަމަށެވެ. އަދި ބުރިޖަކުން މާލޭ ރައްޔިތުން ރަށު ބަންދުން ވީއްލަދީ ފެނާ, ކަރަންޓާއި, ޕައިބާ ކަނެކްޓިވިޓީއިން ގްރޭޓާ މާލެ ސަރަހައްދު ގުޅުވުމަކީ ޕީޕީއެމްގެ ތަރައްޤީ ކަމަށާއި އެމްޑީޕީއިން ދައްކަނީ ހޮޅި ވާހަކަ ކަމަށެވެ.
ރިވެތި ގޮތަކީ މި ޕްރޮޖެކްޓުގެ މޭސްތެރި ރައީސް ޔާމީނަށް ހައްޤު ޝުކުރު މިޓުވީޓުގައިވެސް ހިމެނުން. ބުރިޖަކުން މާލޭ ރައްޔިތުން ރަށު ބަންދުން ވީއްލަދީ ފެނާ, ކަރަންޓާއި, ޕައިބާ ކަނެކްޓިވިޓީއިން ގްރޭޓާ މާލެ ސަރަހައްދު ގުޅުވުމަކީ ޕީޕީއެމްގެ ތަރައްޤީ. އެމްޑީޕީއިން ދައްކަނީ ހޮޅި ވާހަކަ. https://t.co/v93Zv1uRHH
— Mohamed Maleeh Jamal (@maleehjamal) July 18, 2021
މިލިޔުން ކިޔާލުމުން
