މި ބަލަނީ އިޖްތިމާޢީ ކަންކަމުގައި ވީ އެންމެ ގާތުން ޚިދުމަތް ދެވޭތޯ: މައުމޫން

މި ބަލަނީ އިޖްތިމާޢީ ކަންކަމުގައި ވީ އެންމެ ގާތުން ޚިދުމަތް ދެވޭތޯކަމަށް މޯލްޑިވް ގޭސްގެ މެނޭޖިންގ ޑިރެކްޓަރ ޢަބްދުﷲ މައުމޫން ވިދާޅުވެއްޖެއެވެ.

އޭނާ މިހެން ވިދާޅުވީ ކ.ގުރައިދޫގައި ހުންނަ ޚާއްޞަ އެހީ އަށް ބޭނުންވާ މަރުކަޒަށް މޯލްޑިވް ގޭސްގެ ފަރާތުން ކައްކާ ގޭހާއި މެޑިކަލް އޮކްސިޖަން ހަދިޔާ ކުރުމަށް މިނިސްޓްރީ އޮފް ހެލްތާއެކު ފަހުމުނާމާގައި ސޮއިކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

އިޝްތިހާރު

އޭނާ ވިދާޅުވީ މި ސޮއިކުރި ފަހުމުނާމާގެ ސަބަބުން ކުރިއަށް އޮތް ތާނގައި ކުންފުނީގެ ފަރާތުންދޭ ޚިދުމަތްތައް އިތުރަށް ރަނގަޅު ވަމުންދާނެކަމަށް ޔަޤީން ކުރައްވާ ކަމަށެވެ. އަދި އިޖްތިމާޢީ ކަންކަމަށް އެހީ ފޯރުކޮށްދިނުމަކީ އެ ކުންފުނީގެ ވަރަށް ބޮޑު ޒިންމާ އެއް ކަމަށާއި ސަރުކާރުގެ މެންޑެޓަރީގައިވެސް ހިމެނޭ ކަމެއް ކަމަށް މައުމޫން ވިދާޅުވިއެވެ.

މައުމޫން އިތުރަށް ވިދާޅުވީ ދައުލަތުގެ ކުންފުނިތައް އިޖްތިމާޢީ ކަންކަމުގައި ބައިވެރިވުމަށް ސަރުކާރުންވެސް  ބާރުއަޅާ ކަމަށާއި މިއީ އަދުގެ ރައީސްވެސް އިސްކަންދެއްވާ ކަމެއް ކަމަށެވެ. ހަމަމިއާއެކު ހެލްތް މިނިސްޓްރީން ވެސް މިކަހަލަ ކަންކަމުގައި ދެއްވާ އެއްބާރުލުން ފާހަގަ ކުރާ ކަމަށާއި އެކަމަށްޓަކައި ޝުކުރު އަދާކުރާ ކަމަށްވެސް މައުމޫން ވިދާޅުވިއެވެ.

މި ރަސްމިއްޔާތުގައި ހެލްތް މިނިސްޓަރ ނާޒިމް އިބްރާހިމް ވިދާޅުވީ އިޖްތިމާޢީ ކަންކަމުގައި ކުންފުނިތަކުގެ އެއްބާރުލުން ލިބުމުން މިހާރަށްވުރެވެސް އިތުރަށް ބޭނުންވާ ކަމަށާއި އިޖްތިމާއީ ކަންކަމަށް އިސްކަން ދިނުމަކީ ރަނގަޅު ދުޅަހެޔޮ މުޖްތަމަޢެއްގައި ހުރުން ވަރަށް ރަނގަޅު ސިފައެއް ކަމަށެވެ.

އަދި ޚާއްޞަ އެހީ ބޭނުންވާ ފަރާތްތަކަށް ސަރުކާރުން ވަރަށް ބޮޑު އިސްކަމެއް ދީ ޚުދު ރައީސްވެސް މިކަންކަން ވަރަށް ގާތުން ބައްލަވަމުން ގެންދަވާ ކަމަށް މިނިސްޓަރ ވިދާޅުވިއެވެ.

168 ބަލިމީހުން ފަރުވާ ހޯދަމުންދާ ގުރައިދޫ ސިއްހީ މަރުކަޒުގައި އަމިއްލައަށް ކައްކާ، ކައި ހަދަމުންދާ އިރު، މޯލްޑިވް ގޭސް އިން އަންނަނީ 2013 އިން ފެށިގެން އެ މަރުކަޒަށް ކައްކާ ގޭސް ހިލޭ ފޯރުކޮށްދެމުންނެވެ.

ކ.ގުރައިދޫގައި ހުންނަ ޚާއްޞަ އެހީ އަށް ބޭނުންވާ މަރުކަޒަށް މޯލްޑިވް ގޭސްގެ ފަރާތުން ކައްކާ ގޭހާއި މެޑިކަލް އޮކްސިޖަން ހަދިޔާ ކުރުމުގެ ފަހުމުނާމާގައި މޯލްޑިވް ގޭސްގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރ ޢަބްދުﷲ މައުމޫން އެވެ. ހެލްތް މިނިސްޓްރީގެ ފަރާތުން ސޮއިކުރެއްވީ ހެލްތް މިނިސްޓަރ ނާޒިމް އިބްރާހިމް އެވެ.