މި އަހަރު ވެސް މާލެ ސަރަޙައްދުގެ މިސްކިތްތަކުގައި ފިތުރު ޢީދު ނަމާދު ނުކުރާނެ
މި އަހަރު ވެސް މާލެ ސަރަޙައްދުގެ މިސްކިތްތަކުގައި ފިތުރު ޢީދު ނަމާދު ޖަމާއަތް ހަދައިގެން ނުކުރާގޮތަށް ހަމަޖައްސައިފިއެވެ. މިކަން މިގޮތަށް ހަމަޖައްސާފައިވަނީ ރާއްޖޭގެ އިސްލާމިކް މިނިސްޓްރީންނެވެ.
އިސްލާމިކް މިނިސްޓްރީން ކުރިން ނިންމާފައިވަނީ ރާއްޖޭގައި ކޮވިޑް-19ގެ ހާލަތު ގޯސްވެފައިވުމާ ގުޅިގެން ފިތުރު ޢީދު ނަމާދު ބޮޑު ޖަމާޢަތުގައި ނުކޮށް މިސްކިތްތަކުގައި ކުރާގޮތަށެވެ. އެހެން ނަމަވެސް އިއްޔެ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އަންގާފައިވަނީ މިއަދުން ފެށިގެން އެއް ހަފްތާގެ މުއްދަތަށް މާލޭ ސަރަހައްދުގެ މިސްކިތްތަކުގައި ޖަމާއަތުގައި ނަމާދު ނުކުރުމެށެވެ.
އެޗްޕީއޭގެ އެ އެންގުމާއި ގުޅިގެން މާދަމާ ގެ ޢީދު ނަމާދު މާލެ ސަރަޙައްދުގެ މިސްކިތްތަކުގައި ކުރިއަށް ދާނެތޯ ”ދެން“ އިން ކުރި ސުވާލަކަށް ޖަވާބު ދެއްވަމުން އިސްލާމިކް މިނިސްޓްރީގެ މީޑިއާ އޮފިޝަލު އިސްމާއިލް އަފްރާޙް ވިދާޅުވީ މާދަމާގެ ފިތުރު ޢީދު ނަމާދު މިސްކިތްތަކުގައި ކުރުމެއް ނޯންނާނެ ކަމަށެވެ.
އަދި މިކަމާއި ގުޅޭ އިތުރު ތަފްސީލު މިއަދު ނެރޭ ސާކިއުލާއެއްގައި ހާމަކުރައްވާނެ ކަމަށް ވެސް އަފްރާޙު ވިދާޅުވިއެވެ.
ރާއްޖޭގައި ކޮވިޑްގެ ހަލަތު ގޯސްވެ 2020 ވަނަ އަހަރުގައި ވެސް މާލެ ސަރަޙައްދުގެ މިސްކިތްތަކުގައި ފިތުރު ނަމާދު ކުރެވޭގޮތް ވަނީ ނުވެފައެވެ. މިއީ މިގޮތަށް މިކަން ކުރިޔައްދާތާ ދެވަނަ އަހަރެވެ.
މިލިޔުން ކިޔާލުމުން
