ތަސްވީރު ސްޓޫޑިއޯގެ ފުރަތަމަ މަދަހަ މުބާރާތުގެ 1 ވަނަ މުޙައްމަދު ރަފީޢު ހޯދައިފި

ތަސްވީރު ސްޓޫޑިއޯ އިން މުޅި ރާއްޖެއަށް ހުޅުވާލައިގެން ބޭއްވި މަދަހަ މުބާރާތުގެ ނަތީޖާ ފާޅުކޮށްފި އެވެ.

”މަދަހަ ކިޔާލަމާ ޗެލެންޖު 1442“ ގެ ނަމުގައި އޮންލައިންކޮށް ކުރިއަށް ގެންދިޔަ މި މުބާރާތަށް ވަރަށް ބޮޑު ތަރުހީބެއް ލިބިފައިވާ ކަމަށް ތަސްވީރު ސްޓޫޑިއޯ އިން ބުންޏެވެ.

އިޝްތިހާރު

ދެ ބުރަކަށް ބަހާލައިގެން މި މުބާރާތް ކުރިއަށް ގެންގޮސްފައިވަނީ ވޮއިސް އޮފް މަދަހަ އެމްވީ ގެ ވައިބަރ ގްރޫޕު ގައެވެ.

އެގޮތުން ފުރަތަމަ ބުރު ކުރިއަށް ގެންދިޔައީ މުބާރާތް އިންތިޒާމުކުރާ ފަރާތުން އެދުވަހަކަށް ކަނޑައަޅާފައިވާ މަދަހައެއް، އެދުވަހަކު ކިޔާ ގޮތަށެވެ. މި ބުރުގައި މަދަހަ ކީ ފަރާތްތަކުގެ މެދުގައި ގުރުއަތުލައިގެން އަގުހުރި އިނާމުތަކެއް ވަނީ ދީފައެވެ.

ދެވަނަ ބުރު ކިޔުންތެރިންނަށް މާކްސް ދޭގޮތަށް ކުރިއަށް ގެންދިޔަ އިރު، މިބުރުގައި 80 ފަރާތަކުން ވަނީ ބައިވެރިވެފަ އެވެ.

މި މުބާރާތުގެ އެންމެ އިސްފަރާތްކަމަށްވާ ޢަބްދުﷲ އަމްޒަލް އެޓޯލްނިއުސް އަށް ވިދާޅުވީ މިއީ މި ފުރަބަންދުގައި ގޭގައި ތިބެގެން މަދަހަ ކިޔުމުގެ ހުނަރު ދައްކާލުމަށް ލިބުނު ރަނުގެ ފުރުސަތެއް ކަމަށް ބައިވެރިން ބުނެފައިވާ ކަމަށެވެ.

”އަޅުގަނޑުމެންނަށް ވަރަށް ބޮޑު ތަރުހީބެއް ލިބުނު މި މުބާރާތަށް. ރާއްޖޭގެ އެކި ކަންކޮޅުތަކުގައި ތިބި ހުނަރުވެރި މަދަހަ ކިޔުންތެރިންނާ ބައްދަލުވި. މިއީ މުޅި ރާއްޖެއަށް ހުޅުވާލައިގެން އަދި އޮންލައިންކޮށް ލައިވް ޕަރފޯމެންސް ޗެލެންޖުގެ ގޮތުގަ ބޭއްވި މިފަދަ ފުރަތަމަ މުބާރާތް.“ އަމްޒަލް ވިދާޅުވި އެވެ.

އޭނާ އިތުރަށް ވިދާޅުވީ މިކަމުގައި އެހީތެރިވެދެއްވި ހުރިހާ ފަރާތްތަކަށް ވަރަށް ޚާއްސަ ޝުކުރެއް އަދާކުރާ ކަމަށާއި މިއީ ފެށުމެއް ކަމަށެވެ. އަދި މިފަދަ އިތުރު މަދަހަ މުބާރާތްތައް ހިންގުމަށް ރާވަމުން އަންނަ ކަމަށެވެ.

މި މުބާރާތުގެ 1 ވަނަ 2 ވަނަ އަދި 3 ވަނައަށް ދިޔަ ފަރާތްތަކަށް ފައިސާގެ އިނާމު ވަނީ ދީފައެވެ. އަދި އެންމެ ގަދަ 5 ފަރާތާއި އެންމެ މޮޅު 10 ފަރާތް ފާހަގަކޮށް، އެފަރާތްތަކަށް ވަނީ ހަނދާނީ ފިލާ ދީފައެވެ.

މި މުބާރާތުގެ 1 ވަނަ އއ. ހިމެންދޫ، ނޫރާނީމާގެ / މުޙައްމަދު ރަފީޢު ހާސިލުކޮށްފައިވާ އިރު، 2 ވަނަ ހާސިލުކޮށްފައިވަނީ ގދ. ފޮއޮރީ، އެވަރ ގްރީން / އަޒްހީލް އަހްމަދު އެވެ. އަދި 3 ވަނަ ހާސިލުކޮށްފައިވަނީ ލ. ގަން، އޯކިޑު / ފާތުމަތު ލަތީފާ އެވެ.

ގަދަ ފަހަކަށް ދިޔަ ބައިވެރިން ހިމަނައިގެން މަދަހަ އަލްބަމެއް ނެރުމަށް ނިންމާފައިވާ ކަމަށް ވެސް ތަސްވީރު ސްޓޫޑިއޯ އިން ބުނެއެވެ.