އަލަށް އިންތިޚާބުވި ކައުންސިލަރުން މި މަހު 17 ގައި ހުވާ ކުރާނެ: އެލްޖީއޭ

ލޯކަލް ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކަށް އަލަށް އިންތިޚާބުވި ފަރާތްތައް މި މެއި މަހު 17 ގައި ހުވާ ކުރާނެ ކަމަށް ލޯކަލް ގަވަރމެންޓް އޮތޯރިޓީ (އެލްޖީއޭ) އިން ބުނެފި އެވެ.

ދަރުބާރުގޭގައި އެޗްއީއޯސީން ރޭ ބޭއްވި ނޫސްވެރިންގެ ބައްދަލުވުމުގައި އެލްޖީއޭގެ ޑިރެކްޓަރ ޖެނެރަލް އާދަމް ޝަރީފް ވިދާޅުވީ ލޯކަލް ކައުންސިލް އިންތިޚާބުގައި އިންތިޚާބުވެފައިވާ ކައުންސިލަރުން ހުވާކުރުމުގެ ރަސްމިއްޔާތު ކުރިންވެސް ތާވަލު ކޮށްފައިވާ ގޮތަށް މިމަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ ކަމަށެވެ.

އިޝްތިހާރު

އޭނާ ވިދާޅުވީ ކައުންސިލަރުން ހުވާކުރުމުގެ އިންތިޒާމުތައް ހަމަޖެއްސުމުގެ ކަންކަން އެ އިދާރާއިން ކުރިއަށް ގެންދާކަމަށެވެ. އަދި މި ހާލަތުގައި އެ ރަސްމިއްޔާތު ކުރިއަށް ގެންދާނީ އޮންލައިންކޮށް ކަމަށެވެ.

”ހުވާކުރުމުގެ ރަސްމިއްޔާތުގައި ފަނޑިޔާރުން ކަނޑައެޅުމުގެ ކަންކަންވެސް ވަނީ ހަމަޖެހިފަ. އެރަށެއްގައި ފަނޑިޔާރަކު ނެތްނަމަ ކައިރީގައި ހުރި ރަށަކުން ފަނޑިޔާރަކު އޮންލައިންކޮށް ހުވާ ލައިދިނުމުގެ ކަންކަން ވަނީ ހަމަޖެހިފަ.“ އާދަމް ޝަރީފް ވިދާޅުވި އެވެ.

އޭނާ އިތުރަށް ވިދާޅުވީ މިފަހަރުގެ ރަސްމިޔާތުގައި އާންމުން ބައިވެރިވާނީ ސޯޝަލް މީޑިޔާ މެދުވެރިކޮށް ކަމަށާއި އޮންލައިންކޮށް މިރަސްމިއްޔާތުތައް ލައިވް ކުރާނެ ކަމަށެވެ.

ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި 3،814 ކެނޑިޑޭޓުން ވާދަކުރިއެވެ. އޭގެ ތެރޭގައި ހިމެނެނީ ލޯކަލް ކައުންސިލް އިންތިޚާބުގައި ވާދަކުރި 2234 ކެނޑިޑޭޓުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރާ 1580 ކެނޑިޑޭޓުންނެވެ.

ދެ އިންތިޚާބުގައި 1912 މަޤާމަށް ބޭފުޅުން ވަނީ އިންތިޚާބުކޮށްފައެވެ.

މިއިންތިޚާބުގައި އެމްޑީޕީން 400 ގޮނޑި ކާމިޔާބުކޮށްފައިވާއިރު، އިދިކޮޅު ޕްރޮގްރެސިވް ކޯލިޝަނަށް ކާމިޔާބު ކުރެވުނީ 325 ގޮނޑިއެވެ.

މި އިންތިޚާބުގައި ވޯޓު ދިނުމުގެ ހައްގު 2،73،128 މީހަކަށް ލިބިގެންވާއިރު، ވޯޓުލީ 1،86،253 މީހެކެވެ. މިއީ %68.19 އެވެ. މާލޭގައި ވޯޓުލާން ނުކުތީ ޝަރުތު ހަމަވާ މީހުންގެ %39 އެވެ.