ފިތުރު ޒަކާތް ދެއްކުމުން ނޫނީ ރަމަޟާންމަހުގައި ހިފި ރޯދަ ޤަބޫލު ނުކުރައްވަވާނެ: ޚުތުބާ

މިއަދުގެ ހުކުރު ޙުތުބާގައި އަލިއަޅުވާލައްވާ ވާހަކަދައްކަވާފައިވަނީ ފިތުރު ޒަކާތާއި ގުޅޭގޮތުންނެވެ.

ފިތުރު ޒަކާތަކީ ރަމަޟާން މަހާ ގުޅިގެން ރަސޫލާ ފަރުޟު ކުރައްވާފައިވާ ޒަކާތެކެވެ. އެކަން ފަރުޟު ކުރައްވާފައިވަނީ އެންމެންގެ މައްޗަށެވެ. ބޮޑެތި މީހުންނާއި ކުޑަކުދިންނާއި މިނިވަނުންނާއި އަޅުން، އެންމެން ޝާމިލުވާ ގޮތަށެވެ. ކުޑަކުދިންގެ މަތިން މި ޒަކާތް ނެރެން ޖެހޭނީ އޭނާގެ ބަލަދުވެރިޔާ އެވެ. ބަނޑުގަ އޮންނަ ދަރިފުޅުގެ މަތިން ފިތުރު ޒަކާތް ނެރުމަކީ ވެސް ހެޔޮ ކަމެއް ކަމަށް ބައެއް އިލްމްވެރިން ވިދާޅުވެފައިވެ އެވެ. ނަމަވެސް އެއީ ވާޖިބު ކަމެއް ނޫނެވެ.

އިޝްތިހާރު

ފިތުރު ޒަކާތް ފަރުޟު ކުރެއްވުމުގެ އެއް ހިކުމަތަކީ އެކަމަކީ ރޯދަވެރިޔާއަށް އޮތް ތާހިރު ކަމެއްގެ ގޮތުގައި ލެއްވުމެވެ. އެއީ ރޯދައަށް ހުންނަ މީހާއަށް ވެސް ކުށެއް ކުރެވިދާނެ އެވެ. ފިތުރު ޒަކާތް ދެއްކުމުން އެގޮތަށް ކުރެވިފައި ހުންނަ ކުދި ކުށްތަކުން މީހާ ތާހިރުވެގެންދެ އެވެ.

އީދު ދުވަހަކީ ހުރިހާ މުސްލިމުން އުފާ ފާޅުކުރުމަށް އަންނަ ދުވަހެކެވެ. އެ ދުވަހުގެ އުފަލުގައި ހުރިހާ މުސްލިމުން ވެސް ބައިވެރިވާން ޖެހެ އެވެ. ފިތުރު ޒަކާތުގެ އަނެއް ހިކުމަތަކީ މިއީ އެވެ. ފިތުރު ޒަކާތް ދެވެނީ މުޖުތަމައުގައި ތިބޭ ފަގީރުންނާއި ނިކަމެތިންނެށެވެ. އޭގެ ސަބަބުން އެމީހުންނަށް ވެސް އީދުގެ އުފަލުގައި ބައިވެރިވެ އެވެ. ކާނެ އެއްޗެހި، ލާނެ އެއްޗެހި ލިބޭނެ އެވެ.

އީދު ނަމާދުގެ ކުރިން ފިތުރު ޒަކާތް އަދާކުރުމަށް އިލްމްވެރިން އަންގަވާފައިވަނީ އެހެންވެ އެވެ. ފިތުރު ޒަކާތަކަށް ވަނީ ވެސް އީދު ނަމާދުގެ ކުރިން އަދާކޮށްފިނަމަ އެވެ. އޭގެ ފަހުން އަދާކުރާނަމަ އެ ވާނީ ޞަދަގާތަކަށެވެ.

ފިތުރު ޒަކާތަކީ އަތްމަތި ދަތި ޙާލުގައި ވެސް ހޭދަކުރުމަށް މުސްލިމުންނަށް ދެވޭ ތަމްރީނެކެވެ. މުސްލިމުންގެ އަތްތައް އަބަދުވެސް ވާން ޖެހޭނީ ހޭދަކުރާ އަތްތަކަކަށެވެ. މި ޒަކާތުގެ ސަބަބުން އަހަރު ތެރޭގައި އެންމެ ދުވަހަކު ނަމަވެސް ހޭދަކުރާ މީހަކަށް ވުމުގެ މާތްކަން ކޮންމެ މުސްލިމަކަށްމެ ޙާޞިލު ވެގެންދެއެވެ.

ފިޠުރު ޒަކާތުގެ ސަބަބުން މުޖްތަމަޢުގެ އަފްރާދުންގެ މެދުގައި ލޯތްބާއި، ކުލުނާއި، އެކުވެރިކަން ޤާއިމު ވެގެންދާނެއެވެ. ޢީދުގެ އުފަލުގައި އެންމެންނަށް ބައިވެރި ވެވޭނެއެވެ. ބައިވެރި ވެވޭނެއެވެ. ޢީދަކީ ހުރިހާ އެންމެންނަށް އުފާވެރި މުނާސަބަތަކަށް ވާނެއެވެ. ކީރިތި ރަސޫލާ ސިފަކުރައްވާފައިވާ ފަދަ އެއްބަނޑުއެއްބަފައި މުޖްތަމަޢަކަށް އިސްލާމީ މުޖްތަމަޢު ވާނީ އުފަލާއި ހިތާމާގައި މުޖްތަމަޢުގެ އެންމެންނަށް ބައިވެރިވެވިގެންނެވެ.

ފިޠުރު ޒަކާތުގެ ގޮތުގައި ނެރެންޖެހެނީ، ރަށުގައި ޢާއްމުކޮށް، ކައިބޮއެ އުޅޭ ބާވަތަކުން ޞާޢެއްގެ މިންވަރެވެ.  (صَاع) އަކީ، މިޒަމާނުގެ މިނެކިރުމުގެ ހިސާބުން ބަލާނަމަ، ގާތްގަނޑަކަށް، 2.4 ކިލޯ ގުރާމެވެ. ފިޠުރު ޒަކާތް ނެރުން ވާޖިބު ވަޤުތަކީ، ރަމަޟާންމަހުގެ ފަހު ދުވަހުގެ އިރު އޮއްސުނީއްސުރެ، ޢީދު ނަމާދަށް ދިއުމާއި ދެމެދުގައެވެ.

އަޅުގަނޑުމެންނަށް، ﷲ ދެއްވާފައިވާ ނިޢުމަތްތަކަށް ޝުކުރުކުރުމުގެ ގޮތުން، ﷲގެ މަގުގައި، ގިނަގިނައިން ހޭދަކުރަމާތޯއެވެ؟ ﷲގެ މަގުގައި ހޭދަކުރުމުގައި، ދަހިވެތި ނުވަމާތޯއެވެ؟ އެއިރުން، އެކަލާނގެ އަޅުގަނޑުމެންނަށް އިތުރަށް ދެއްވާނެއެވެ. މުދަލުގައި ބަރަކާތް ލައްވާނެއެވެ. އަޅުގަނޑުމެންގެ ނަފްސުތައް ޠާހިރުވުމަށް މަގު ފަހިވާނެއެވެ. އަދި ދަހިވެތިކަމުގެ ސުންޕާ ބަލިން، އަޅުގަނޑުމެންނަށް ސަލާމަތް ވެވޭނެއެވެ.

އިތުރަށް ހުތުބާގައި ވިދާޅުވީ ތިބާ ހިފާ ރޯދަ ވަނީ އުޑާއި މިބާއި ދެމެދުގައި ކަމަށާއި ފިތުރު ޒަކާތް ދެއްކުމުން ނޫނީ އެ ރޯދަތައް ޤަބޫލް ނުކުރެވޭނެ ކަމަށެވެ.