މަގުމަތީ ފޮތްހަރުގެ ޚިދުމަތް އިފްތިތާޙުކޮށްފި
މަގުމަތީ ފޮތްހަރުގެ ޚިދުމަތް އިފްތިތާޙުކޮށްފި އެވެ.
މިއީ ދުނިޔޭގެ ފޮތާއި ކޮޕީރައިޓްގެ ދުވަހުގެ މުނާސަބަތާއި އަދި ޤައުމީ ކުތުބުޚާނާއަށް 75 އަހަރު ފުރުމުގެ ޚާއްސަ ހަރަކާތްތަކުގެ ތެރެއިން އަލަށް ތައާރަފް ކުރި ހަރަކާތެކެވެ.
މި ހަރަކާތް މިއަދު ބޭއްވި ޚާއްސަ ރަސްމިއްޔާތެއްގައި އިފްތިތާޙު ކޮށްދެއްވީ މިނިސްޓްރީ އޮފް އާރސް ކަލްޗަރ އެންޑް ހެރިޓެޖް ޔުންމާ މައުމޫނާއި މާލެ ސިޓީގެ މޭޔަރު ޞިފާ މުޙައްމަދު އެވެ.
ކަޅުވަކަރު މިސްކިތް މައިޒާނާއި ހިއްތަން މައިޒާނުގައި މި އިފްތިތާޙުކުރެވުނު ”މަގުމަތީ ފޮތްހަރު“ މިއީ އަވަށްޓެރީންނަށް ފަސޭހައިން ފޮތް ނަގާ ހެދޭނެ ކުޑަ ފޮތް ހަރެކެވެ. އަދި މީގެ ސަބަބުން ކުޑަކުދިންނަށާއި ބޮޑެތި މީހުނަށް ފޮތްކިޔުމުގެ ޝައުޤުވެރިކަން އާލާވެގެން ދާނެކަމެކެވެ.
މި ފޮތް ހަރުން ފޮތް ދޫކޮށް އަދި ބަލައިގަތުމަށް އެއްވެސް ފަރާތެއް ނުވަތަ މެދުވެރިއަކު ނުހުންނާނެއެވެ. ފޮތް ގެންދިއުމާ އަދި ފޮތް ކިޔާ ނިމުމުން އެ ފޮތް، އަނބުރާ ފޮތް ހަރަށް ގެނެސްދިނުމަކީވެސް ފޮތް ގެންދިޔަ ފަރާތުގެ ޒިންމާއެކެވެ. މިއަދު ބެހެއްޓި ފޮތް ހަރުތަކަށް ފޮތް ހަދިޔާ ކުރުމުގެ ފުރުޞަތުވެސް ޤައުމީ ކުތުބުޚާނާއިން ވަނީ ހުޅުވާލާފައެވެ.
މިފޮތްހަރު ބޭނުންކުރުމުގެ އިރުޝާދު ފޮތް ހަރުގައި ވަނީ ހަރުކުރެވިފައެވެ.
ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑްގެ އެހީތެރިކަމާއެކު ތައްޔާރުކުރެވި ފޮތް ހަރަކީ މާލެސިޓީގައި ބެހެއްޓުމަށް ހަމަޖެހިފައިވާ މިކަހަލަ ފޮތް ހަރުތަކުގެ ތެރެއިން ފުރަތަމަ ދެ ފޮތް ހަރެވެ.
މުސްތަޤްބަލްގައި މީގެ އިތުރު ފޮތް ހަރުތައް ތަފާތު އެކި މައިޒާންތަކުގައި ބެހެއްޓުމަށް ޤައުމީ ކުތުބުޚާނާއިން ވަނީ ނިންމާފައެވެ.
މިލިޔުން ކިޔާލުމުން
