މާންދޫ މޮނިޓަރިންއަށް ލައިފި
ހައްދުންމަތި (ލ. އަތޮޅު) މާންދޫ މޮނިޓަރިންގ އަށްލާ، އެރަށަށް އަރައި ފޭބުން މަނާ ކޮށްފި އެވެ.
ލ. ގަން ރީޖަނަލް ހޮސްޕިޓަލުން ބުނީ އެރަށް މޮނީޓަރިންގެ ހާލަތަށް ގެނެސްފައި މިވަނީ އެ ކޮމްޕްލެކްސް އިން ކޮވިޑަށް ޕޮޒިޓިވް ކޭސްތަކެއް ފެނުމުން ކަމަށެވެ.
ކޮވިޑުގެ އަލާމާތްތައް ކަމަށް ޝައްކު ކުރެވިގެން މާންދޫގައި މަސައްކަތް ކުރަމުންދާ 8 ފިރިހެނެއްގެ ސާމްޕަލް ރޭ ޓެސްޓު ކޮށްފައިވާ ކަމަށާއި އެ އެންމެންވެސް ކޮވިޑަށް ޕޮޒިޓިވްވެފައިވާ ކަމަށް ވެސް އެ ހޮސްޕިޓަލުން ބުނެއެވެ.
ކޮންޓެކްޓް ޓްރޭސިންގެ މަސައްކަތްތައް ކުރަމުން އަންނަ އިރު ލ. އަތޮޅުގެ ހުރިހާ ރަށެއްގެ ރައްޔިތުން ވެސް ރައްކާތެރިކަމުގެ ފިޔަވަޅު އެޅުމަށް އެ ހޮސްޕިޓަލުން ވަނީ އިލްތިމާސްކޮށްފަ އެވެ.
ލ. ގަމާއި އެ އަތޮޅު ފޮނަދޫ އަދި ކައްދޫއާ ކޯޒްވޭއަކުން ގުޅިފައި އޮންނަ މާންދޫއަކީ ހޮރައިޒަން ފިޝަރީޒް މޯލްޑިވްސްއަށް މަސް ފެކްޓަރީ ހިންގުމަށް ދޫކޮށްފައި އޮންނަ ރަށެކެވެ.
މާންދޫގެ އިތުރުން މަސް ފެކްޓަރީއެއް ހިންގަމުން އަންނަ ޅ. ފެލިވަރުވެސް މިވަގުތު އޮތީ މޮނީޓަރިންގެ ހާލަތަށް ގެނެސްފަ އެވެ. މިފްކޯއަށް ދޫކޮށްފައި އޮންނަ އެ ރަށް މޮނީޓަރިންގެ ހާލަތަށް ގެނެސްފައި އޮންނަތާ މާދަމާއަށް މަހެއްވާނެ އެވެ.
މިލިޔުން ކިޔާލުމުން
