ފޮތްކިޔުމަކީ އިންސާނާގެ ސިކުނޑި ހުޅުވައިދޭ ކަމެއް: މިނިސްޓަރ ޔުމްނާ
ފޮތްކިޔުމަކީ އިންސާނާގެ ސިކުނޑި ހުޅުވައިދޭ ކަމެއް ކަމަށް ހެރިޓޭޖު މިނިސްޓަރ ޔުމްނާ މައުމޫން ވިދާޅުވެއްޖެ އެވެ.
އެކަމަނާ މިހެން ވިދާޅުވީ ދުނިޔޭގެ ފޮތާއި ކޮޕީރައިޓްގެ ދުވަހުގެ މުނާސަބަތުގައި ދެއްވި މެސެޖެއްގަ އެވެ.
މިނިސްޓަރުގެ މެސެޖުގައި ވިދާޅުވީ މި މައްސަރަކީ އައު ކަންކަމަށް އިންސާނާ ވިސްނާ ފިކުރުކުރަން ދަސްކޮށްދޭ މަސްދަރެއް ކަަމަށެވެ. އަދި ހަރު މީހުން ބުނެއުޅޭ ގޮތުގައި ފޮތެއް ހުޅުވާލުމަކީ އެހެން ދުނިޔެއަކަށް، އެހެން ތަޖުރިބާތަކަކަށް، އެހެން މާޙައުލަކަށް ހުޅުވާލެވޭ ދޮރެއް ކަމަށެވެ.
މީގެ އިތުރުން ކުދިންގެ ތަޢުލީމީ ބިންގާ ހަރުދަނާކުރުމަށްޓަކައި އެކުދިންނަކީ ފޮތް ކިޔާހިތްވާ، ފޮތްތެރިކަމަށް ލޯބިކުރާ ބައެއްގެ ގޮތުގައި ތަރުބިއްޔަތު ކުރެއްވުމަށް ވެސް މިނިސްޓަރ ވަނީ އެދިވަޑައިގެންފަ އެވެ.
“ މިފަދަ ދުވަސްވަރެއްގައި ފޮތް ކިޔުން އިތުރުކޮށް މިކަމުން އަރައިގަތުމަށް ހިތްވަރު ހޯއްދަވާ. ގޭގައި ތިއްބަވާއިރު އަމިއްލައަށް ފޮތް ކިޔުމުގެ އިތުރުން އާއިލާގެ އެހެން މެންބަރުންނަށްވެސް ފޮތް ކިޔުމަށް ބާރުއަޅުއްވާ. އާއިލާ އެކުގައި ހޭދަކުރާ މި ވަގުތުގައި މުޅި އާއިލާ އެކުގައި ތިއްބަވައިގެން ވާހަކަ ކިޔުއްވާ، ވާހަކަ ޙިއްޞާ ކޮށްލައްވާ.“ ޔުމްނާގެ މެސެޖުގައި ވެއެވެ.
މިނިސްޓަރުގެ މެސެޖުގައި އިތުރަށް ވިދާޅުވީ މި ދުވަސް މި އަހަރު އަޅުގަނޑުމެންނާއި މި ބައްދަލުކުރީ ބަރަކާތްތެރި ރަމަޟާންމަހުގައި ކަމަށެވެ. އަދި ރަމްޟާން މަހަކީ މާތްﷲ ކީރިތ ރަސޫލާ ﷺ މެދުވެރިކުރައްވައި އަޅުގަނޑުމެންނަށް ބާއްވައިލެއްވި ކީރިތި ޤުރުއާނުގެ މައްސަރު ކަމަށެވެ.
މި މައްސަރުގައި އެފޮތް ގިނަގިނައިން ކިޔަވައި އެ ފޮތުގައިވާ އާޔަތްތަކުގެ މާނައާއި މެދު ވިސްނާ ފިކުރުކުރުމަކީ ނުހަނު ބޭނުންތެރިކަމެއް ކަަމަށާއި ކޮވިޑް-19އާ މުޅި ދުނިޔެ ހަނގުރާމަ ކުރާ މި ބިރުވެރި ދުވަސްވަރު ފޮތް ކިޔުމާއި، ކިޔައިދިނުމާއި ފޮތްތެރިކަމުގެ މުހިންމުކަން އިހުނަށްވުރެ ބޮޑަށް އިޙުސާސް ކުރެވޭ ކަމަށް ވެސް ޔުމްނާގެ މެސެޖުގައި ވިދާޅުވެފައި ވެއެވެ.
މި އާލަމީ ވަބާއިން ރައްކާތެރިވުމުގެ ގޮތުން މީހުން އެއްވެއުޅޭ އާންމު ތަންތަނަށް ނިކުމެ ނޫޅުމުގެ ސަބަބުން އަޅުގަނޑުމެންނަށް ފޮތް ކިޔުމަށް ވަގުތު ލިބިގެންދާ ކަމަށާއި ފޮތް ކިޔުމަށާއި ފޮތުން މަޢުލޫމާތު އުނގެނުމަށް ލިބިފައިވާ މިފުރުޞަތުގެ ބޭނުން ރަނގަޅަށް ހޯއްދެވުމަށް ވެސް މިނިސްޓަރ ވަނީ އެދިވަޑައިގެންފަ އެވެ.
ފޮތާއި ކޮޕީރައިޓްގެ ދުވަހުގެ ގޮތުގައި ކޮންމެއަހަރަކުވެސް ފާހަގަ ކުރަނީ އޭޕްރިލް މަހުގެ 23 ވަނަ ދުވަހެވެ.
މި އަހަރުގެ ދުނިޔޭގެ ފޮތާއި ކޮޕީރައިޓްގެ ދުވަހުގެ ޝިޢާރަކީ ”ވާހަކައެއް ޙިއްޞާކޮށްލަމާ“ ނުވަތަ ”ޝެއާރ އަ ސްޓޯރީ“، އެވެ.
މިލިޔުން ކިޔާލުމުން
