ކުވެއިތާއި ރާއްޖެއާ ދެމެދު ފަހުމުނާމާތަކެއްގައި ސޮއި ކޮށްފި

ކުވެއިތާއި ރާއްޖެއާ ދެމެދު ފަހުމުނާމާތަކެއްގައި ސޮއި ކޮށްފި އެވެ.

މި ފަހުމުނާމާތަކުގައި ސޮއި ކޮށްފައިވަނީ ފޮރިން މިނިސްޓަރު އަބްދުﷲ ޝާހިދު، ކުވައިތަށް ކުރައްވަމުން ގެންދަވާ ދަތުރުގެ ތެރެއިން ނެވެ.

އިޝްތިހާރު

ކުވައިތު ސިޓީގައި ހުންނަ ކުވެއިތުގެ މިނިސްޓްރީ އޮފް ފޮރިން އެފެއަރޒުގައި ބޭއްވި ރަސްމިއްޔާތެއްގައި ބޭއްވި ރަސްމިއްޔާތުގައި ދިވެހިރާއްޖޭގެ ފަރާތުން މި އެމް.އޯ.ޔޫތަކުގައި ސޮއިކުރެއްވީ މިނިސްޓަރ އޮފް ފޮރިން އެފެއަރޒު ޢަބްދުﷲ ޝާހިދެވެ. ކުވެއިތުގެ ފަރާތުން ސޮއިކުރެއްވީ އެޤައުމުގެ މިނިސްޓަރ އޮފް ފޮރިން އެފެއާޒް އަދި މިނިސްޓަރ އޮފް ސްޓޭޓް ފޮރ ކެބިނެޓް އެފެއަރޒް ޑރ. އަޙްމަދު ނާސިރު އަލް މުޙައްމަދު އަލް އަޙްމަދު އަލް ޖާބިރް އަލް ސަބާޙެވެ.

މި އެއްބަސްވުންތަކަކީ ”މެމޮރެންޑަމް އޮފް އަންޑަރސްޓޭންޑިން އޮން ކޯޕަރޭޝަން ބިޓްވީން މިނިސްޓްރީ އޮފް ފޮރިން އެފެއާޒް އޮފް ދަ ރިޕަބްލިކް އޮފް މޯލްޑިވްސް އެންޑް ދަ މިނިސްޓްރީ އޮފް ފޮރިން އެފެއާޒް އޮފް ދަ ސްޓޭޓް އޮފް ކުވައިތު“ އާއި ”މެމޮރެންޑަމް އޮފް އަންޑަސްޓޭންޑިން ބިޓްވީން ދަ ގަވާމަންޓް އޮފް މޯލްޑިވްސް އެންޑް ދަ ގަވާމަންޓް އޮފް ދަ ސްޓޭޓް އޮފް ކުވައިތު އިން ދަ ފީލްޑް އޮފް ޓޫރިޒަމް“ އެވެ.

ކުވައިތަށް ކުރައްވަމުން ގެންދަވާ ރަސްމީ ދަތުރުގެ ތެރެއިން އެ ގައުމުގެ ފޮރިން މިނިސްޓަރާ، ޝާހިދު ބައްދަލުކުރެއްވައި، ވިޔަފާރީގެ ގުޅުންތަކާ ބެހޭ ގޮތުން ވެސް ވަނީ މަޝްވަރާ ކުރައްވާފަ އެވެ.

މީގެ އިތުރުން ކޮވިޑް-19 ގެ ސަބަބުން ލިބުނު ގެއްލުންތަކާއި، އެ ގެއްލުންތަކުން އަރައިގަތުމަށް ކުރެވިދާނެ މަސައްކަތްތަކާ ބެހޭ ގޮތުން ދެ ވަޒީރުން މަޝްވަރާކުރެއްވި އެވެ.

އެ މަޝްވަރާތަކުގައި، ރާއްޖޭގެ އިގްތިސޯދު ޑައިވަރސިފައިކޮށް، އިޖްތިމާއީ އަދި ހިންގުމުގެ ދާއިރާތައް ހަރުދަނާކުރުމަށް ހަދާފައިވާ ނޭޝަނަލް ރިޒިލިއަންސް އެންޑް ރިކަވަރީ ޕްލޭންއާއި ބެހޭ މައުލޫމާތު ވެސް ވަނީ ކުވައިތުގެ ވަޒީރަށް ޝާހިދު މައުލޫމާތު ދެއްވާފަ އެވެ.

މިމަހުގެ 14 ވަނަ ދުވަހު ފެއްޓެވި ދަތުރުގައި ޝާހިދު އެންމެ ފުރަތަމަ ވަޑައިގަތީ އިންޑިއާ އަށެވެ. އޭގެ ފަހުން، ކުވައިތަށް ވަޑައިގެންނެވީ އިންޑިއާ މަގުންނެވެ.

މި ބައްދަލުވުމުގައި މިނިސްޓަރ ޝާހިދުގެ އަރިހުގައި މިނިސްޓްރީގެ ސެކްރެޓަރީ މަލްޓިލޭޓަރަލް ޑރ. ހާލާ ހަމީދު އާއި ޑިރެކްޓަރ މޫމިނާ އިބްރާހިމް އާއި އެސިސްޓަންޓް ޑިރެކްޓަރ އަހްމަދު ސަލްމާން ޒަކީ ބައިވެރިވެ ވަޑައިގެންނެވިއެވެ.