މަސްވެރިންގެ ރައްކާތެރިކަމަކީ މިދާއިރާގައި ވިސްނަންޖެހޭނެ ކަމެއް: ޙުސައިން ނިޔާޒު

މަސްވެރިންގެ ރައްކާތެރިކަމަކީ މިދާއިރާގައި ވިސްނަންޖެހޭނެ ކަމެއްކަމަށް އުރީދޫ މޯލްޑިވްސްގެ އުރީދޫގެ ހެޑް އޮފް ސޭލްސް، ހުސައިން ނިޔާޒް ވިދާޅުވެއްޖެއެވެ.

މަޝްހޫރު މޮބައިލް ސެޓަލައިޓް ސަރވިސް (އެމްއެމްއެސް) އޮޕަރޭޓަރ ތުރާޔާ ޓެލެކޮމިއުނިކޭޝަންސް ކޮމްޕެނީ އިން ރާއްޖޭގެ ފަތުރުވެރިކަމާއި މަސްވެރިކަމުގެ ދާއިރާއަށް މޮބައިލް ސެޓެލައިޓްގެ ޚިދުމަތްތައް ފޯރުކޮށްދިނުމަށް އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އޭނާ ވިދާޅުވީ މަސްވެރިކަމަކީ ރާއްޖޭގެ އެންމެ މުހިންމު އަދި ގިނަ ދިވެހިންގެ ދިރިއުޅުމާއި ގުޅިފައިވާ މަސައްކަތެއް ކަމަށެވެ.

އިޝްތިހާރު

އަދި މަސްވެރިކަމަކީ ދިވެހިރާއްޖޭގެ އެންމެ ބޮޑު އެއް ދާއިރާ ކަމަށާއި ގަދަ ކަނޑުގައި ތަފާތު ހާލަތްތަކާއި ކުރިމަތިލާންޖެހޭއިރު، މަސްވެރިންގެ ރައްކާތެރިކަމަކީ މިދާއިރާގައި ވިސްނަންޖެހޭނެ ކަމެއް ކަމަށްވެސް ޙުސައިން ނިޔާޒު ވިދާޅުވިއެވެ.

އެގޮތުން ނުރައްކާތެރި ޙާލަތަކާއި ދިމާވާ ހިނދު، އެހީތެރިކަން ހޯދުމަށްޓަކައި ރޭޑިއޯގެ އިތުރުން ބޭނުންކުރެވޭ ވަޞީލަތެއް ގެންގުޅުން މުހިންމު ކަމަށާއި އުރީދޫ އިން ތަޢާރަފްކޮށްފައިވާ ތުރާޔާގެ މޮބައިލް ސެޓަލައިޓްގެ ޚިދުމަތް މެދުވެރިކޮށް، އުރީދޫ ކަވަރޭޖާއި ޚިދުމަތްތައް މަސްވެރިކަމުގެ ދާއިރާއަށްވެސް ފޯރުކޮށްދޭނެ ކަމަށްވެސް އޭނާ ވިދާޅުވިއެވެ.

މި ރަސްމިއްޔާތުގައި ވާހަކަ ދައްކަވަމުން ތުރާޔާގެ ޗީފް ކޮމަރޝަލް އޮފިސަރ ބިލާލް އަލް ހަމޫއީ ވިދާޅުވީ މަސްވެރިކަމަކީ ބައެއް ފަހަރު ނުރައްކާތެރި ޙާލަތްތަކާއި ކުރިމަތިލާންޖެހިދާ މަސައްކަތެއް ކަމަށްވާތީ ރައްކާތެރިކަމުގެ ފިޔަވަޅުތައް އެޅުމަކީ މި ދާއިރާގައި މަސައްކަތްކުރާ އިރު ވަރަށް މުހިއްމުކަމެއް ކަމަށެވެ.

އަދި ވަރަށް ފަހަކާއި ޖެހެންދެން، ގިނަ މަސްވެރިންނަށް، ސެޓަލައިޓް މެދުވެރިކޮށް މުވާޞަލާތު ކުރެވޭ ވަޞީލަތްތައް ފަސޭހައިން ލިބިގަނެ ބޭނުންކުރުމުގެ ފުރުޞަތު ލިބިފައި ނުވާ ކަމަށާއި ތުރާޔާ އިން ފޯރުކޮށްދެނީ އަންލިމިޓެޑް ޑޭޓާ ޕްލޭންތަކާއި ހަލުވި ސްޕީޑެއްގައި ފެންވަރު ރަނގަޅު ނެޓްވާރކެއްގައި ފަސޭހަކަމާއެކު ބޭނުންކުރެވޭ ވަޞީލަތްތަކެއް ކަމަށެވެ.

ޢާންމުކޮށް މުވާސަލާތުކުރުމަށް ކުރާ ހޭދަ، ނިސްބަތުން %40 އަށް ތުރާޔާ އިން ދަށްކޮށްދޭނެ ކަމަށާއި ފަސޭހައިން ހެޔޮ އަގެއްގައި ލިބޭ ޓެކްނޮލޮޖީގެ ސަބަބުން އެންމެ ކުދި ދޯނިފަހަރުގައިވެސް މަސްވެރިންނަށް ފަސޭހަކަމާއި އެކު ވަޒީފާ އަދާކޮށް، މުވާސަލާތުކޮށް އުޅެވޭނެ ކަމަށް އޭނާ ވިދާޅުވިއެވެ.

މީގެ އިތުރުން އޭނާ ވިދާޅުވީ ތުރާޔާގެ މަޤުޞަދަކީ ދިރިއުޅުން އިތުރަށް ކުރިއަރުވައިދީ، މީހުންގެ ފުރާނަ ރައްކާތެރި ކޮށްދިނުން ކަމަށާއި މި އެއްބަސްވުމުގެ ސަބަބުން އެތައް މަސްވެރިންނަކަށް، ބޭނުންވާ ވަގުތު، ބޭނުން ތަނަކު ހުރެގެން މުވާސަލާތުކުރުމުގެ ފުރުޞަތު ލިބިގެންދާނެ ކަމަށެވެ.