ނޫނު ކަމުކާމު އެހާ ފުރިހަމަވީ ކީއްވެ؟

ސޮސައިޓީ ފޮ މާފަރު ޑިވެލޮޕްމެންޓް(އެސްއެމްޑީ) އަދި މަހަލްދީބް ފައުންޑޭޝަން ގުޅިގެން ނޫނު އަތޮޅަށް ހާއްސަކޮށްގެން ގެންދިޔަ ބޮޑު އިވެންޓް “ނޫނު ކަމުކާމު” ކާމިޔާބުކަމާއިއެކު މިދިޔަ ހަފްތާ ބަންދުގައި ނިންމާލައިފިއެވެ.

ނޫނު ކަމުކާމު، މިހެން ބުނުމުން އުފެދޭ ސުވާލަކީ ކަމުކާމުގެ މާނައަކީ ކޮަބައިތޯއެވެ. މި އިވެންޓް ރޭވުމުގައި އެންމެ އިސްކޮށް ނޫނު އަތޮޅުން ހަރަކާތްތެރިވި އެސްއެމްޑީގެ ފަރާތުން މައުލޫމާތު ދެއްވި ގޮތުގައި ކަމުކާމު މި ބަހަކީ ބޯދާ ބަހެއްްކަމަށާއި އޭގެ މާނަ އަކީ މަޖިލިސް އެއްވެތިބޭތަން ނުވަތަ އިހުގައި މަޖިލިސްކުރަން ގަނޑުވަރުގައި ތިބޭ އަށި ކަމަށެވެ.

އެހެންކަމުން މި މާނައާއި ގުޅުވާލައިފައި ނޫނު އަތޮޅުގެ އެކި ރަށްރަށުގައި ތަފާތު އިވެންޓްތަކެއް ރޭވިގެން ކުރިއަށްގެންދިއުމަށް މިނަން ދިނީ ކަމަށެވެ. އަދި އެސްއެމްޑީގެ ފަރާތުން އަތޮޅަށް އާންމުކޮށް އިވެންޓެއް ރޭވުމަކީ އަބަދުވެސް ގެންގުޅޭ ވިސްނުމަކަށްވެފައި އިވެންޓްގެ ސެޝަންތައް ކުރިއަށް ގެންދެވޭނެ ގޮތްތައް ބިނާވެގެން އައިސްފައިވަނީ މި އިވެންޓްގައި ބައިވެރިވި ޝެއިހުންގެ ހިޔާލާއި އެއްގޮތަށް ކަމަށް އެ ޖަމިއްޔާއިން މައުލޫމާތު ދިނެވެ.

އިޝްތިހާރު

މި އިވެންޓްތައް ކުރިއަށް ގެންދެވުނު ގޮތާއި ބެހޭގޮތުން މައުލޫމާތު ދެއްވަމުން އެސްއެމްޑީގެ ރައީސް އަދި މި އިވެންޓުގެ ކޯޑިނޭޓަރު ޢަބްދުއްސައްތާރު އަލީ ވިދާޅުވީ ނޫނު އަތޮޅުގެ ބައެއް ރަށްތަކުގެ ކައުންސިލްތަކާއި ގުޅިގެން އެކި ރަށްރަށުގައި އިވެންޓްތަކެއް ގެންދެވުނު ކަމަށެވެ. އެގޮތުން މާޅެންދޫ، ކުޑަފަރި، ލަންދޫ، މަނަދޫ އަދި މާފަރުގައި ތަފާތު އިވެންޓްތަކެއް ގެންދެވުނެވެ. އޭގެ ތެރޭގައި ނަމާދު ވޯރކްޝޮޕާއި، ދަރިން ތަރުބިއްޔަތުކުރުމާއި ބެހޭ ވޯރކްޝޮޕްތަކާއި، ކިޔަވާ ކުދިންގެ އަހްލާގާއި ބެހޭ ސެޝަންތައް ހިމެނެއެވެ. މީގެ އިތުރުން މާފަރުގައި ބޮޑު ދަރުސް އަދި “ތެލަނގަ މަޖާ”ގެ ނަމުގައި ކުޑަކުދިންނަށް ހާއްސަ އިވެންޓަކާއި ޒުވާނުންނަށް ހާއްސަކޮށްގެން “ބާބެކިއު ވިތް ޝެއިހް” ގެ ނަމުގައި ބާބެކިއު އެއްވެސް ކުރިއަށް ގެންދެވުނެވެ.

އަދި މާފަރުގައި ބޭއްވުނު ބޮޑު ދަރުސް ދެއްވީ ޑރ. އިޔާޒްއެވެ. މީގެ އިތުރުން އައްޝެއިހް ޢަބްދުﷲ ރަޝީދާއި، އައްޝައިހް ޢަބްދުﷲ އާމިރު، އައްޝެއިހް ޝިފާން، އައްޝެއިހް އަންޞާރުގެ އިތުރުން މަދީނާ ޔުނިވަރސިޓީގައި މިހާރު ކިޔަވަމުންދާ ބައެއް ދަރިވަރުންވެސް މި އިވެންޓްތައް ކުރިއަށް ގެންދިއުމުގައި ބައިވެރިވިއެވެ.
މި އިވެންޓްގެ ފީޑްބެކް އާއި ބެހޭގޮތުން އެ ޖަމިއްޔާއިން ފާހަގަ ކުރީ ހުރިހާ ރަށެއްގެވެސް ކައުންސިލް ތަކުން ވަރަށް ބޮޑު އެއްބާރުލުމެއް ދެއްވި ކަމަށާއި، އިވެންޓްތަކަށް އުންމީދު ކުރިވަރަށްވުރެ އިތުރަށް ރައްތަކުގެ ރައްޔިތުން ހާޒިރުވެ ބައިވެރިވި ވުމުން މި ފަދަ އިވެންޓްތައް އިތުރަށް ކުރިއަށް ގެންދިއުމަށް ވަރަށް ބޮޑު ހިތްވަރެއް ލިބިގެން ދިޔަ ކަމަށެވެ.

އެސްއެމްޑީގެ ފަރާތުން ފަހު ބަހެއްގެ ގޮތުގައި ފާހަގަ ކޮށްލީ މިފަދަ ރައްޔިތުންނަށް ފައިދާތަކެއް ލިބިގެންދާނެ އިވެންޓްތަކެއް ރަށުގައި ކުރިއަށް ގެންދިއުމަށް އަދިވެސް ރާވަމުން ގެންދާ ކަމަށާއި މި އިވެންޓު ކާމިޔާބު ކަމާއި އެކީ ގެންދިއުމުގައި ރަށުގެ ރައްޔިތުންގެ ވަރަށް ބޮޑު ހިއްސާ އެއް ވާކަމަށެވެ.

އަދި އެކަމަށް ވަރަށް އިހްލާސްތެރި ޝުކުރެއް އަދާކުރާ ކަމަށްވެސް ވިދާޅުވިއެވެ. އަދި މާފަރު ސްކޫލަށާއި މާފަރު ކައުންސިލް އިދާރާއަށް ވަރަށް ހާއްސަ ޝުކުރެއް ދަންނަވާ ކަމަށާއި މަހަލްދީބް ފައުންޑޭޝަނުން މި އިވެންޓަށް ދެއްވި އެއްބާރުލުމާއި އެހީތެރިކަން ފާހަގަ ކުރުމުގެ އިތުރުން އަވަދިނެތިކޮށް އުޅެމުންވެސް މިކަމުގައި ބައިވެރިވި ދެއްވި ކަމަށްޓަކައި އިބްރާހިމް ރަމީޒް(އިބޭ) އަށާއި އަލް ޢަސްރުގެ “ގެއްލޭނެތަ” ސިލްސިލާއިން އާންމުންގެ ސަމާލުކަން ހޯދައިފައިވާ ސަމޫހް މި ދެބޭފުޅުންވެސް ޝުކުރުގެ ލިސްޓުގައި ހިމަނަންޖެހޭ ކަމުގައި އެސްއެމްޑީގެ ރައީސް ވިދާޅުވިއެވެ.

މި ފުރިހަމަ އިވެންޓް ނިންމާލުމުގެ ގޮތުން ހުރިހާ ބައިވެރިން ވަނީ މާފަރުކަިރީގައި އޮންނަ ވައްޓަރު ނަމަކަށްކިޔާ ފަޅުރަށަކަށް ދަތުރެއް ގޮސަފައެވެ.
މި ދަތުރުގައިވަނީ ދަތުރު ގޮސް އުޅޭއިރު ވިސްނާލަންޖެހޭ ބައެއްކަންކަމަށް އަލި އަޅުވާލާ ކުރު ވީޑިއޯ މެސެޖެއް ޢާންމުންނަށް ދީފައެވެ.