ބޯޑަރު ކައިރިން ޕަކިސްތާންގެ 2 މީހަކު އިންޑީއާއިން ބަޑިޖަހާ މަރާލައިފި

ބޯޑަރު ސަރަހައްދުގައި ހިނގި ބަޑިޖެހުމުގެ ހާދިސާއެއްގައި ދެމީހުން މީހުން މަރުވުމާ ގުޅިގެން ޕާކިސްތާނުން އިންޑިއާގެ ޑިޕްލޮމެޓަކު ހާޒިރުކޮށްފި އެވެ.

ޕާކިސްތާނުގެ ފޮރިން މިނިސްޓްރީން ހާމަކުރި ގޮތުގައި، އިންޑިއާގެ ބޯޑަރު ބަލަހައްޓާ ފައުޖުތަކުން ދިން ހަމަލާއެއްގައި ޕާކިސްތާނުގެ އާންމު ދެ މީހަކު މަރުވުމާ ގުޅިގެން، އިންޑިއާގެ ޝާޜޭ ދި އެފެއާޒް ހޮނިހިރު ދުވަހު ވަނީ ހާޒިރުކޮށްފަ އެވެ.

އިޝްތިހާރު

އެ މިނިސްޓްރީން ބުނީ، ހުކުރު ދުވަހު ބޯޑަރުގެ ބޭޑިއަން ސެކްޓަރުގައި އިންޑިއާގެ ބޯޑަރު ސެކިއުރިޓީ ފޯސް އިން ހަތިޔާރެއް ނެތް އާންމުންނާ ދެކޮޅަށް އެއްވެސް މަޤްބޫލު ސަބަބެއް ނެތި ނުރައްކާތެރި ހަމަލާތަކެއް ދީފައިވާ ކަމަށެވެ.

ދެ ޤައުމު ވަކިކުރާ ބައިނަލްއަޤްވާމީ ބޯޑަރު ކައިރީގައި ހިނގި މި ހާދިސާގައި ޕާކިސްތާނުގެ ދެމީހުން މަރުވެ، އިތުރު މީހަކަށް ވަނީ އަނިޔާވެފަ އެވެ.

ޕާކިސްތާނުގެ ފޮރިން މިނިސްޓްރީން ބުނި ގޮތުގައި، އިންޑިއާގެ ޑިޕްލޮމެޓް ހާޒިރުކުރީ މި ހާދިސާއާ ގުޅިގެން އިސްލާމްއާބާދުގެ ”ވަރުގަދަ އިހުތިޖާޖު“ ރައްދުކުރުމަށެވެ. އަދި ބާރުގެ ބޭނުންކުރުމަކީ އެއްވެސް އިންސާފެއް ނެތް، ހައްދުފަހަނައަޅާފައިވާ އަމަލެއްގެ ގޮތުގައި އެ މިނިސްޓްރީން ސިފަކުރި އެވެ.

މިކަމާ ގުޅޭގޮތުން އިންޑިއާގެ އެކްސްޓާނަލް އެފެއާޒް މިނިސްޓްރީން ނުވަތަ ބީ.އެސް.އެފް އިން އަދި ރަސްމީކޮށް އެއްޗެއް ބުނެފައެއްނުވެ އެވެ.

ޕާކިސްތާނުގެ ރަސްމީ މީޑިއާ ”ރޭޑިއޯ ޕާކިސްތާން“ އިން ސަލާމަތީ ބާރުތަކާ ހަވާލާދީ ރިޕޯޓްކޮށްފައިވާ ގޮތުގައި، ޕަންޖާބު ޕްރޮވިންސްގެ ކަސޫރުގެ މި ތިން މީހުން ބޯޑަރުގެ ފާހަގައަކުން ކުޑަކޮށް އެތެރެއަށް ފިޔަވަޅެއް  ވަގުތު، އިންޑިއާގެ ސިފައިން އެއްވެސް އިންޒާރެއް ނުދީ ބަޑިޖަހާފައިވެ އެވެ.

މަސްދަރުތަކުން ބުނާ ގޮތުގައި އެ ތިން މީހުންގެ އަތުގައި އެއްވެސް ހަތިޔާރެއް ނެތް އަދި ބޯޑަރުގެ ފެންސު ހުރަސްކުރަންވެސް މަސައްކަތެއް ކޮށްފައެއް ނުވެ އެވެ.

މި ހާދިސާއާ ގުޅިގެން އިންޑިއާއިން ”ވަގުތުން، ދެފުށް ފެންނަ އަދި އިތުބާރު ކުރެވޭ“ ތަޙްޤީޤެއް ހިންގައި، މިކަމުގައި ޒިންމާވާ ފަރާތްތަކާ މެދު އަދަބީ އަދި ޤާނޫނީ ފިޔަވަޅު އެޅުމަށް ޕާކިސްތާނުން ވަނީ ގޮވާލާފަ އެވެ.

އަދި ތަޙްޤީޤުން ފާހަގަވި ކަންކަމާއި އެޅި ފިޔަވަޅުތަކުގެ މަޢުލޫމާތު ރަސްމީކޮށް ޕާކިސްތާނު ސަރުކާރާ ހިއްސާކުރުމަށްވެސް އިންޑިއާގެ ކިބައިން އެދިފައިވެ އެވެ.

ދެ ޤައުމުގެ ދެމެދުގައިވާ ބޯޑަރުގެ އުސޫލުތަކަށް ހުރުމަތްތެރިކޮށް ހިތުމަށާއި، ބޯޑަރު ސަރަހައްދުގައި ހިނގާ ހާދިސާތަކުގައި ކެތްތެރިކަން އިސްކުރުމަށް އިސްލާމްއާބާދުން އިންޑިއާއަށް އިލްތިމާސްކުރި އެވެ. އަދި މިފަދަ ހާދިސާތައް ތަކުރާރުވިޔަ ނުދިނުމަށް ފިޔަވަޅު އެޅުމަށްވެސް ވަނީ ގޮވާލާފަ އެވެ.

އިންޑިއާގެ ބައެއް މީޑިއާތަކުން މި ހާދިސާ ސިފަކޮށްފައިވަނީ ބޯޑަރު ހުރަސްކޮށް އެތެރެވާން އުޅުނު ބަޔަކު ހުއްޓުވުމުގެ ގޮތުން ހިނގި ކަމެއްގެ ގޮތުގަ އެވެ.

ނަމަވެސް، ޕާކިސްތާނުގެ ފޮރިން މިނިސްޓްރީން ވަނީ އެ ވާހަކަތައް ދޮގުކޮށް، މަރުވި މީހުންނަކީ ބޯޑަރު ހުރަސްކުރަން އުޅުނު ބައެއްގެ ގޮތުގައި ސިފަކުރުން ކަނޑައެޅިގެން ބަލައިނުގަނެވޭނެ ކަމަށް ބުނެފަ އެވެ.

މި ހާދިސާ ހިނގާފައިވަނީ ނިއުކްލިއާ ބާރު ލިބިފައިވާ މި ދެ ޤައުމުގެ ދެމެދުގައި ނުތަނަވަސްކަން ބޮޑުވެފައިވާ ދަނޑިވަޅެއްގަ އެވެ.

ދެ ޤައުމުގެ ބޯޑަރު ސަރަހައްދަކީ ދޭތެރެ ދޭތެރެއިން މިފަދަ ސަލާމަތީ ހާދިސާތަކާއި ތުހުމަތުތައް ބަދަލުކުރެވޭ ސަރަހައްދެކެވެ.