”ވޯޓު ވަގުން މަޤާމުން ދުރަށްދޭ“ އިންޑިއާ ޖެން-ޒީ
ވޯޓާސް ރޯލަށް ގެނައި ބަދަލުތަކާ ދެކޮޅަށް ”ޖެން-ޒީ“ އިސްވެ އޮވެ އުފައްދާފައިވާ ”ކޮކްރޯޗް ޖަންތާ ޕާޓީ“ އާއި އިދިކޮޅު އެހެން ޖަމާޢަތްތަކުން އިންޑިއާގެ ވެރިރަށް ނިއުދިއްލީގައި ކުރިއަށްގެންދިޔަ މުޒާހަރާގެ ދެވަނަ ދުވަހު، ފުލުހުން ވަނީ ބަޔަކު ހައްޔަރުކޮށް އެ ހަރަކާތަށް ހުރަސް އަޅާފަ އެވެ.
މުޒާހަރާގެ ބައިވެރިން ތުހުމަތުކުރާ ގޮތުގައި ވޯޓާސް ރޯލަށް ގެނައި ބަދަލުތަކަކީ ބޮޑުވަޒީރު ނަރެންދުރަ މޯދީގެ ވެރިކަން ކުރާ ޕާޓީއަށް ނާޖާއިޒު މަންފާ ހޯދައިދިނުމަށް ގެނައި ބަދަލުތަކެކެވެ. އަދި އިންޑިއާގެ އިލެކްޝަންސް ޗީފް މަޤާމުން އިސްތިޢުފާ ދިނުމަށްވެސް އެފަރާތްތަކުން ދަނީ ގޮވާލަމުންނެވެ.
މި މުޒާހަރާތަކަކީ މިއަހަރުގެ ތެރޭގައި ޒުވާނުން އިސްވެ އޮވެ ފަށާފައިވާ ސިލްސިލާ ހަރަކާތްތަކުގެ ތެރެއިން އެންމެ ފަހުގެ މުޒާހަރާ އެވެ.
މިއީ މޯދީގެ 12 އަހަރުވީ ވެރިކަމުގައި އެނާއަށް ކުރިމަތިވި، ކުރިން ތަޖުރިބާކޮށްފައި ނުވާ ފަދަ ބޮޑު ސިޔާސީ ފިއްތުމެކެވެ.
ހޮނިހިރު ދުވަހު ގާތްގަނޑަކަށް 100 އެއްހާ މުޒާހަރާގެ ބައިވެރިން ވަނީ ސަލާމަތީ ބެރިކޭޑްތައް ނަގައި، ”ވޯޓު ވަގުން މަގާމުން ދުރަށްދޭ“ އަދި ”ގްޔަނޭޝް ކުމާރު އިސްތިއުފާދީ“ އޭ ބުނެ އަޑުއުފުލާފަ އެވެ.
ފުލުހުން ވަނީ ބާރުގެ ބޭނުންކޮށް އޭގެ ތެރެއިން ބައެއް މީހުން ހައްޔަރުކޮށްފަ އެވެ. ރޮއިޓާސްގެ މަންޒަރު ދުށް ފަރާތްތަކުން ރިޕޯޓްކުރާ ގޮތުގައި މުޒާހަރާގެ ބައިވެރިންގެ ތެރޭގައި ޤާނޫނު ހަދާ މަޖިލީހުގެ މިނިވަން މެންބަރު ކަޕިލް ސިބަލް އާއި، ވާތުފިޔައިގެ ”އޯލް އިންޑިއާ ސްޓޫޑެންޓްސް އެސޯސިއޭޝަން“ ގެ ރައީސް ނޭހާ ބޯރާގެ އިތުރުން ސިޔާސީ ހަރަކާތްތެރިން ކަމަށްވާ ޕްރަޝާންތު ބުޝާން އަދި ޔޯގޭންދްރަ ޔާދަވް ހިމެނެ އެވެ.
ނަމަވެސް، ހައްޔަރުކުރި މީހުންގެ އަދަދާއި އެއީ ކޮން ބައެއްކަން ހާމަކުރުމަށް ފުލުހުން ވަނީ އިއުތިރާޒުކޮށްފަ އެވެ.
”ފުރަތަމަ އެމީހުން ވޯޓާ ލިސްޓުން މީހުން އުނިކުރީ، މިހާރު މިކަމާ ދެކޮޅަށް އަޑުއުފުލުމުގެ ފުރުސަތެއްވެސް ނުދޭ. މިއީ ބަލައިގަނެވޭނެ ކަމެއް ނޫން،“ ބޯރާ
އިލެކްޝަން ކޮމިޝަނުގެ އިސްވެރިޔާ ކުމާރު، މި މުޒާހަރާތަކާ ގުޅޭގޮތުންނާއި އޭނާ އިސްތިޢުފާ ދިނުމަށް ގޮވާލާ ގޮވާލުންތަކަށް މިހާތަނަށް އެއްވެސް އެއްޗެއް ބުނެފައެއް ނުވެއެވެ.
ހުކުރު ދުވަހު ފުލުހުން ވަނީ މުޒާހަރާގެ ބައިވެރިން އެއްވިޔަނުދީ ހުއްޓުވައި، އެމީހުން ބަސްތަކަށް އަރުވައިގެން ގެންގޮސްފަ އެވެ. އަދި ސަލާމަތީ ފިޔަވަޅުތައް ވަރުގަދަކުރުމުގެ ގޮތުން ކައިރީގައި ހުރި ބައެއް މެޓްރޯ ސްޓޭޝަންތައް ވެސް ވަނީ ބަންދުކޮށްފަ އެވެ.
ފުލުހުންގެ މަސްދަރަކުން މަޢުލޫމާތު ދޭ ގޮތުގައި، ހުކުރު ދުވަހު ހައްޔަރުކުރި މީހުންގެ ތެރެއިން ގިނަ ބަޔަކު ދޫކޮށްލާފައިވީ ނަމަވެސް، ދިއްލީގައި ގިނަ މީހުން އެއްވެ އުޅުން މަނާކޮށް ނެރެފައިވާ އަމުރާ ޚިލާފުވި ކަމުގެ ދަޢުވާ ބައެއް މީހުންގެ މައްޗަށް ވަނީ އުފުލާފަ އެވެ.
ފާޑުކިޔާ ފަރާތްތަކުން ބުނާ ގޮތުގައި މިދިޔަ އަހަރު މުޅި ޤައުމުގައި ފެށި ވޯޓާ-ވެރިފިކޭޝަން މަސައްކަތުގެ ސަބަބުން، ވޯޓުލުމުގެ ޙައްޤު ލިބިގެންވާ އެތައް މިލިއަން ބަޔަކު ވަނީ ވޯޓާ ރޯލުން އުނިވެފަ އެވެ.
އިންޑިއާގެ އެންމެ އިތުބާރު ހިފޭ މުއައްސަސާތަކުގެ ތެރޭގައި ހިމެނޭ އިލެކްޝަން ކޮމިޝަނުން ބުނަނީ، މި މަސައްކަތުގެ މަޤްޞަދަކީ ދެފަހަރަށް ލިސްޓުގައި ހިމެނިފައިވާ މީހުންނާއި، މަރުވެފައިވާ މީހުންގެ އިތުރުން ޝަރުތު ހަމަނުވާ މީހުން ލިސްޓުން އުނިކުރުން ކަމަށެވެ.
ހުކުރު ދުވަހު ކޮމިޝަނުން ވަނީ އަލަށް ވޯޓުލުމުގެ ޙައްޤު ލިބޭ މީހުންނާއި ލިސްޓުން އުނިވެފައިވާ މީހުން ރަޖިސްޓްރީ ކުރުމަށް އޮފިޝަލުންނަށް އަންގާފަ އެވެ.
މިލިޔުން ކިޔާލުމުން
