ނަތަންޔާހޫ ޔޫއޭއީ އަށް ޒިޔާރަތްކުރި ކަން ޔޫއޭއީން ރަސްމީކޮށް ކަށަވަރުކޮށްދީފި

ޔޫއޭއީއާއި އިޒްރޭލާ ދެމެދު އޮންނަ ގުޅުމުގެ ތާރީޚުގައި ފުރަތަމަ ފަހަރަށް، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އެ ޤައުމަށް ކުރެއްވި ޒިޔާރަތް ޔޫއޭއީން ރަސްމީކޮށް ކަށަވަރުކޮށްދީފި އެވެ.

ނަމަވެސް، މި ޒިޔާރަތާ ގުޅޭގޮތުން ނެރުނު ބަޔާނުގައި ސަރަހައްދީ ހަނގުރާމަތަކާ ބެހޭ އެއްވެސް ވާހަކައެއް ހިމަނާފައެއް ނުވެ އެވެ.

އިޝްތިހާރު

މި ޒިޔާރަތް ކުރިއަށް މިދިޔައީ، އޮކްޓޫބަރު 7 ގެ ކުރިން ހަމާސްއިން ހަމަލާއެއް ދީފާނެކަމުގެ އިންޒާރު ޔޫއޭއީގެ ރައީސް މުޙައްމަދު ބިން ޒައިދު ނަތަންޔާހޫއަށް ދެއްވިކަމަށް މީޑިއާތަކުން ރިޕޯޓްކޮށްފައިވާ ދަނޑިވަޅެއްގަ އެވެ.

2020 ވަނަ އަހަރު އިޒްރޭލާއެކު ސިޔާސީ ގުޅުން ޤާއިމުކުރި ފަހުން، ނަތަންޔާހޫ ޔޫއޭއީއަށް ވަޑައިގެން ރައީސް މުޙައްމަދު ބިން ޒައިދާ ބައްދަލުކުރެއްވިކަން އެ ޤައުމުން ރަސްމީކޮށް އިޢުތިރާފުވި މިއީ ފުރަތަމަ ފަހަރެވެ.

ހޯމަ ދުވަހުގެ ރޭ އެމިރޭޓްސް ނިއުސް އެޖެންސީން ނެރުނު ކުރު ބަޔާނެއްގައި ބުނެފައިވަނީ، ދެ ޤައުމުގެ ދެމެދުގައި އޮތް ގުޅުން ހަރުދަނާކޮށް ކުރިއެރުވޭނެ ގޮތްތަކާ މެދު ދެ ބޭފުޅުން މަޝްވަރާ ކުރެއްވި ކަމަށެވެ.

އާދީއްތަ ދުވަހު ބޭއްވި މި ބައްދަލުވުމުގެ އެއްވެސް ފޮޓޯއެއް ޔޫއޭއީން އާންމުކޮށްފައެއް ނުވެ އެވެ. އަދި ފަލަސްޠީނު، ލުބުނާން، ސޫރިޔާ، އީރާން، ޔަމަން އަދި ސޫދާނުގައި ހިނގަމުންދާ ހަނގުރާމަތަކާ ގުޅޭ އެއްވެސް ވާހަކައެއް ރަސްމީ ބަޔާނުގައި ހިމަނާފައެއް ނުވެ އެވެ.

ނަމަވެސް، ހާރެޓްޒް ނޫހުން ރިޕޯޓްކޮށްފައިވާ ގޮތުގައި އެއާޕޯޓުން ނަތަންޔާހޫއަށް މަރުހަބާ ދެންނެވީ ސީދާ ރައީސް ބިން ޒައިދެވެ.

މީގެ ކުރިން މޭ މަހުގެ ތެރޭގައި، ނަތަންޔާހޫ ސިއްރިއްޔާތުގައި ޔޫއޭއީއަށް ޒިޔާރަތްކުރެއްވިކަން އޭނާގެ އޮފީހުން ހާމަކުރުމާ ގުޅިގެން ޔޫއޭއީން ވަނީ އެކަން ދޮގުކޮށްފަ އެވެ.

އެފަހަރު ޔޫއޭއީގެ ފޮރިން މިނިސްޓްރީން ބުނެފައިވަނީ އިޒްރޭލާއެކު އޮންނަ ގުޅުމަކީ ފާޅުކަން ބޮޑު، ހާމަކަން ހުރި ގުޅުމެއް ކަމަށާއި، ރަސްމީ އިދާރާތަކުން ހާމަނުކުރާ އެއްވެސް ކަމެއް ޤަބޫލުނުކުރުމަށެވެ.

މިފަހަރުގެ ބައްދަލުވުން ބާއްވާފައި މިވަނީ، 7 އޮކްޓޫބަރު 2023 ގެ ހަމަލާގެ ދިހަވަރަކަށް ދުވަސް ކުރިން، އެފަދަ ހަމަލާއެއް އަތުވެދާނެކަމުގެ އިންޒާރު ބިން ޒައިދު ފޯނުން ގުޅުއްވައި ނަތަންޔާހޫއަށް ދެއްވިކަމަށް ހާރެޓްޒް ނޫހުން ރިޕޯޓްކޮށްފައިވާ ދަނޑިވަޅެއްގަ އެވެ.

ރިޕޯޓްތައް ބުނާގޮތުން، މި ބައްދަލުވުމުގައި ނަތަންޔާހޫ ވަނީ އެ ޚަބަރު ދޮގުކޮށްދިނުމަށާއި އޭނާއަށް ސިޔާސީ ގޮތުން އެހީތެރިވުމަށް ބިން ޒައިދުގެ ކިބައިން އެދިވަޑައިގެންފައެވެ.

ނަތަންޔާހޫގެ އޮފީހުންވެސް މި ޒިޔާރަތް ކަށަވަރުކޮށްދެމުން ބުނެފައިވަނީ، އޭނާ ޔޫއޭއީއަށް ވަޑައިގަތީ ބިން ޒައިދުގެ ދަޢުވަތަކަށް ކަމަށެވެ.

މި ދަތުރުގައި ނަތަންޔާހޫގެ އަންހެނުން ސާރާގެ އިތުރުން، އިޒްރޭލުގެ ނޭޝަނަލް ސެކިއުރިޓީ ކައުންސިލްގެ ވެރިޔާއާއި މޮސާޑުގެ ވެރިޔާވެސް ބައިވެރިވި އެވެ.

އިޒްރޭލުގެ މީޑިއާތަކުން ރިޕޯޓްކުރާ ގޮތުގައި މި ބައްދަލުވުމުގައި ސަޢޫދީ ޢަރަބިއްޔާ، އުރުދުން، ލީބިޔާ، ޤަޠަރު އަދި މޮރޮކޯގެ މަންދޫބުންވެސް ބައިވެރިވި އެވެ.

އަދި މިއީ ރަތްކަނޑުގެ ސަރަހައްދުގައި ހޫޘީން ދެމުންދާ ހަމަލާތަކާ ދެކޮޅަށް އިޒްރޭލުގެ އެހީތެރިކަމަށް ސަޢޫދީން އެދުމާ ގުޅިގެން، މޮސާޑުގެ ވެރިޔާ ރޯމަން ގޮފްމަން އިންތިޒާމުކުރެއްވި ބައްދަލުވުމެއް ކަމަށްވެސް ރިޕޯޓްތައް ބުނެ އެވެ.