ޓްރެފިކް ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ހަރުކަށި ފިޔަވަޅު އަޅަނީ

ޓްރެފިކް ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ހަރުކަށި ފިޔަވަޅު އަޅާނެކަމަށް ފުލުހުން ބުނެފި އެވެ.

ދިވެހި ފުލުހުންގެ ފަރާތުން އާންމުކޮށްފައިވާ ބަޔާނެއްގައި ބުނެފައިވަނީ، މަގުމަތީގެ އާންމު ޓްރެފިކް އުސޫލްތަކަށާއި އަދަބުތަކަށް ބޯނުލަނބާ މަދުބައެއްގެ ސަބަބުން، ގިނަ ބއެއްގެ ހައްގުތައް ގެއްލި، ނުރައްކާތެރި ހާދިސާތައް ދޭތެރެ ދޭތެރެއިން ހިނގަމުންދާ ކަމަށާއި، މިދެންނެވި އުސޫލުތަކާއި ޓްރެފިކް ގާނޫނާއި ގަވާއިދުތަކަށް ތަކުރާރުކޮށް ޚިލާފްވާ ފަރާތްތަކާމެދު ޙާއްސާ ފިޔަވަޅުތަކެއް އަޅަމުންދާނެ ކަމަށެވެ.

އިޝްތިހާރު

އަދި، މިފިޔަވަޅުތަކުގެ މަޤުސަދަކީ މަގުތަކަކީ ރައްކާތެރި އަމާން ތަނެއްގެގޮތުގައި ބޭއްވުން ކަމަށާއި، މަދު ބައެއްގެ ސަބަބުން ތަކުރާރުކޮށް ހިނގަމުންދާ ނުރައްކާތެރި ހާދިސާތައް ހުއްޓުވުމަށް އެޅެންހުރި އެންމެ ހަރުކަށި ފިޔަވަޅުތައް އެޅުން ކަަމަށެވެ.

ޕޮލިސް ކޮމިޝަނަރ އަޙްމަދު މުޙައްމަދު ނެރުއްވާފައިވާ މިބަޔާނުގައި އިތުރަށް ބުނެފައިވަނީ، މަގުމަތީގެ މިފަދަ ނުރައްކާތެރި ހާދިސާތައް ހުއްޓުވުމަށް މިފިޔަވަޅުތައް ކަމާގުޅުންހުރި އެންމެހާ މުއައްސަސާތަކާއި ގުޅިގެން އެންމެ މަތީ ދަރަޖައެއްގައި އަޅަމުން ދިއުމަށް ފުލުހުންގެ ކަމާބެހޭ ބަހާތަކަށް އަންގާފައިވާނެ ކަމަށެވެ. އަދި މިފިޔަވަޅުތައް ގްރޭޓަރ މާލެ ސަރަހައްދުގެ އިތުރުން އަތަޅުތެރޭގެ ރަށްރަށުގައިވެސް އަޅަމުންދާނެ ކަމަށް މިބަޔާނުގައި ވަނީ ބުނެފަ އެވެ.

މިފަދަ ކަންކަމުގައި ރައްޔިތުންގެ ފަރާތުން ދެއްވާ އެއްބާރުލުމަށް މިބަޔާނުގައި ކޮމިޝަނަރ ވަނީ ޝުކުރު އަދާކުރައްވާފަ އެވެ.