ސަޢޫދީ އިން އަލުން ތެޔޮ އެކްސްޕޯޓް ކުރަން ފަށައިފި

ސަޢުުދީ ޢާާރަބިއްޔާގެ އިރުމަތިން ހުޅަނގަށް ގުޅާލެވިފައިވާ މައި ހޮޅި މެދުވެރިކޮށް އަލުން ތެޔޮ އެކްސްޕޯޓް ކުރަން ފަށައިފި އެވެ.

ބްލޫމްބާގުން ރިޕޯޓްކޮށްފައިވާ ގޮތުގައި، ސަރުކާރުގެ ތެޔޮ ކުންފުނި، ސަޢޫދީ އަރަމްކޯއިން ފާއިތުވި ހަފުތާގައި މި ހޮޅި ޓެސްޓުކޮށް، ތެޔޮ ފޮނުވުމަށް ބޭނުންވާ ޕްރެޝަރު އުފެއްދުމުގެ މަސައްކަތް ވަނީ ކޮށްފަ އެވެ.

އިޝްތިހާރު

މަޢުލޫމާތު ލިބޭގޮތުގައި އަމާޒަކީ ހަފުތާ ބަންދުގެ ކުރިން އާދައިގެ މަތިން ތެޔޮ ފޮނުވަން ފެށުމެވެ.

މި ހޮޅިލައިން އަލުން ބޭނުންކުރަން ފެށުމާއެކު، ހޮރްމޫޒް ކަނޑުއޮޅި ފިޔަވައި ތެޔޮ ބޭރުކުރުމަށް ސަޢޫދީއަށް އޮތް މަގު އަލުން ހުޅުވިގެންދާނެ އެވެ.

މިއީ އީރާން ހަނގުރާމައިގެ ދުވަސްވަރުވެސް ސަޢޫދީން ބޭނުންކުރި މުހިންމު މަގަކަށްވާއިރު، މި މަހު ހޮރްމޫޒް ކަނޑުއޮޅި މެދުވެރިކޮށް ތެޔޮ ބޭރުކުރާ މިންވަރުވެސް ވަނީ އިތުރުކޮށްފަ އެވެ.

މީގެ ސަބަބުން ތެޔޮ ގަންނަ ފަރާތްތަކަށް ބޮޑު ލުޔެއް ލިބިގެންދާނެ އެވެ. ޚާއްޞަކޮށް، އަންނަ މަހުގެ ކޮންޓްރެކްޓްތަކުގެ ދަށުން ތެޔޮ ނުލިބޭނެ ކަމަށް އަންގާފައިވާ ޔޫރަޕްގެ ބައެއް ކަސްޓަމަރުންނަށް މީގެ ސަބަބުން ހިތްހަމަޖެހުމެއް ލިބޭނެ އެވެ.

ސަޢޫދީ ސަރުކާރުން ހާމަކޮށްފައިވާ ގޮތުގައި، މި މުހިންމު ހޮޅި ވަގުތީގޮތުން ބަންދުކުރަން ޖެހުނީ ސެޕްޓެމްބަރު 11 ވަނަ ދުވަހު އިރާޤުން ފޮނުވާލި ޑްރޯން ހަމަލާތަކަކާ ގުޅިގެންނެވެ.