އަޔަލޭންޑް އަތުން އިޒްރޭލް ލަތުވެތި ގޮތަކަށް ބަލިވެއްޖެ

އަޔަލޭންޑް އަތުން 0-3 އިން ބަލިވެ، އިޒްރޭލަށް ކުރިމަތިވި ”ލަދުވެތި“ ނަތީޖާއާ ގުޅިގެން އެ ޤައުމުގެ ފުޓްބޯޅަ އެސޯސިއޭޝަނުން ކޯޗު މަޤާމުން ވަކިކުރުމާ މެދު މަޝްވަރާ ކުރަން ފަށައިފި އެވެ.

ހަންގޭރީގައި ކުޅުނު މި މެޗުގެ ފުރަތަމަ ހާފުގައި އިޒްރޭލުގެ ޓީމު ބަލިކަށިވެގެން ދިޔަ ދިއުމަކީ އެ ޤައުމުގެ ފުޓްބޯޅަ ތާރީޚުގައި ވެސް ކުރިމަތިވި އެންމެ ހުތުރު އެއް ރޭ ކަމަށް އިޒްރޭލުގެ ކޮމެންޓޭޓަރުން ސިފަކޮށްފައިވެ އެވެ.

އިޝްތިހާރު

މި މެޗަކީ ގައްޒާގައި ހިންގަމުންދާ ޤަތުލުޢާންމާ ގުޅިގެން އަޔަލޭންޑް ޓީމުން ބޮއިކޮޓް ކުރުމާ މެދު ވިސްނުމަށްފަހު ކުޅުނު މެޗެކެވެ.

އާދިއްތަ ދުވަހު އަޔަލޭންޑް އަތުން ވީ ބައްޔާއެކު އިޒްރޭލުގެ ފުޓްބޯޅައިގެ ތެރޭގައި ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ.

އިޒްރޭލް ފުޓްބޯޅަ އެސޯސިއޭޝަން (އައި.އެފް.އޭ) އިން މިހާރު ދަނީ ހެޑް ކޯޗު މަޤާމުން ވަކިކުރުމާ މެދު ގޮތެއް ނިންމުމަށް ތައްޔާރުވަމުންނެވެ.

އައި.އެފް.އޭގެ މަސްދަރުތަކުން ”ވައިނެޓް“ ނޫހަށް މަޢުލޫމާތު ދީފައިވާ ގޮތުގައި، ކޯޗު ރަން ބެން-ޝިމަން އަމިއްލައަށް އިސްތިއުފާ ދޭނެ ކަމަށް ބެލެވެ އެވެ.

އެއީ މި ނަތީޖާއަކީ ހަމައެކަނި ކުޅިވަރުގެ ބައްޔެއް ނޫން ކަމަށާއި، އެއީ ކޮންމެ އިޒްރޭލު މީހަކަށާއި ޔަހޫދީއަކަށް ލިބުނު އިހާނެތިކަމެއްގެ ގޮތުގައި އެ ފަރާތުން ސިފަކުރާތީ އެވެ.

ހަންގޭރީގެ ޑެބްރެސެންގައި ކުޅުނު މި މެޗުގައި ބައިވެރިވުމާ މެދު އަޔަލޭންޑްގެ ކުޅުންތެރިން ނިންމީ މެޗު އޮތް ދުވަހުގެ ކުރީ ދުވަހު އެވެ.

އެ ޓީމުގެ ގޯލްކީޕަރު ގޭވިން ބަޒޫނޫ ވަނީ އެ ސަރަހައްދުގައި ހިންގަމުންދާ ލާއިންސާނީ އަމަލުތަކާ ގުޅިގެން މެޗުން ވަކިވެފަ އެވެ.

މެޗު ފެށުމުގެ ކުރިން ދެ ޓީމުގެ ކުޅުންތެރިން ސަލާމްކޮށްފައެއް ނުވެ އެވެ. އަދި އިޒްރޭލުގެ ޤައުމީ ސަލާމް ކުޅުނު ވަޤުތު އަޔަލޭންޑްގެ ކުޅުންތެރިން ތިބީ ބޯ ތިރިކޮށްގެންނެވެ.

މީގެ އިތުރުން، ހަނގުރާމައިގައި ފުރާނަ ގެއްލިފައިވާ އެންމެންގެ ހަނދާނުގައި އަޔަލޭންޑްގެ ކުޅުންތެރިން ތިބީ އަތުގައި ކަޅު ފަށް އައްސައިގެންނެވެ.

މެޗުގެ ފުރަތަމަ ހާފުގައި ޓްރޯއީ ޕެރޮޓް، އެޑަމް އިޑާ އަދި ޖެކް މޮއިލަން ވަނީ އަޔަލޭންޑަށް ލަނޑުތައް ޖަހައިދީފަ އެވެ. އިޒްރޭލަކީ ހޯމް ޓީމު ކަމަށް ވިޔަސް، މެޗު ކުޅުނީ ހުސް ދަނޑެއްގަ އެވެ.

މެޗަށްފަހު އަޔަލޭންޑްގެ މެނޭޖަރު ހެއިމީ ހަލްގްރިމްސަން ބުނީ، އޭނާގެ ކުޅުންތެރިން ދެއްކީ ޤައުމަށްޓަކައި ކުރި ފަޚުރުވެރި ހިތްވަރެއް ކަމަށެވެ. މެޗުގެ ކުރިން އޭނާ ބުނެފައިވަނީ، އެމީހުން ކުޅެނީ ގަތުލުއާންމަށް ތާޢީދުކޮށްގެން ނޫން ކަމަށާއި، އެމީހުން ކުޅެނީ ޤަތުލުއާންމާ ދެކޮޅަށް ކަމަށެވެ. މި ވާހަކަތަކާ ގުޅިގެން އިޒްރޭލު ފުޓްބޯޅަ އެސޯސިއޭޝަނުން ވަނީ އޭނާއަށް ވަރަށް ބޮޑަށް ފާޑުކިޔާފަ އެވެ.

ކޯޗު ބެން-ޝިމަން މީޑިއާތަކަށް ބުނީ، މެޗުން ފެނުނު ކަންތައްތަކާ މެދު އޭނާ ލަދުގަންނަ ކަމަށާއި، އޭގެ ޒިންމާ އުފުލަނީ އޭނާ ކަމަށެވެ. އިޒްރޭލުގެ ގޯލްކީޕަރު ޑެނިއަލް ޕެރޭޒް ވެސް ވަނީ މުޅި ޓީމުގެ ފަރާތުން މާފަށް އެދިފަ އެވެ.

ރިޕޯޓްތައް ބުނާ ގޮތުގައި، މެޗަށްފަހު ޑްރެސިން ރޫމުގައި ކޯޗު ވަނީ ކުޅުންތެރިންނާ ބައްދަލުކޮށް، އެމީހުން އިޒްރޭލުގެ ސަޕޯޓަރުން ލަދުގަންނަވާލައިފި ކަމަށް ބުނެފަ އެވެ. އަދި ދެން އޮތް ކޮސޯވޯ އާއި އަޔަލޭންޑާ ދެކޮޅަށް ކުޅޭ މެޗުތަކުން މޮޅުވެ، މިކަން އިސްލާހުކުރަން ޖެހޭނެ ކަމަށް އޭނާ ބުންޏެވެ.

ނޭޝަންސް ލީގުގައި މި ދެ ޓީމު ބައްދަލުކުރާ ދެވަނަ މެޗު އަންނަ އާދިއްތަ ދުވަހު ސާބިއާގައި ކުޅުމަށް ވަނީ ތާވަލުކޮށްފަ އެވެ.

މި މެޗު ސާބިއާއަށް ބަދަލުކުރީ އަޔަލޭންޑްގައި މެޗު ކުޅެފިނަމަ ކުރިމަތިވެދާނެ މުޒާހަރާތަކަށް ބިރުންނެވެ. އައި.އެފް.އޭގެ މަސްދަރުތަކުން ބުނާ ގޮތުގައި، ކުރިއަށް އޮތް މެޗުތައް ނިމުމުން ކޯޗު މަޤާމުން ވަކިކުރުމަށް އެ އެސޯސިއޭޝަނުން ބާރުއަޅާނެ އެވެ.