ފީފާގެ ފަންޑުތަކާ ބެހޭ ދިރާސާއެއް ކުރުމަށް އިންފަންޓީނޯ އަންގަވައިފި

ޔޫއެފްއާ އާއި ކޮންކާކަފް އިން 2.1 ބިލިއަން ޑޮލަރު ހޯދުމަށް ހުށަހެޅުމާ ގުޅިގެން، ފީފާގެ ފަންޑުތަކާ ބެހޭ ދިރާސާއެއް ކުރުމަށް އިންފަންޓީނޯ އަންގަވައިފި އެވެ.

ފީފާގެ ރިޒާވުން 2.1 ބިލިއަން ޑޮލަރުގެ ފައިސާ މެންބަރު ޤައުމުތަކަށް ބެހުމަށް ޔޫއެފްއާ އާއި ކޮންކާކަފް އިން އެދުމާ ގުޅިގެން، ޤައުމީ އެސޯސިއޭޝަންތަކަށް އިތުރު ފައިސާ ދޫކުރެވޭނެ ގޮތްތަކާ ބެހޭ ދިރާސާއެއް ކުރުމަށް ފީފާގެ ރައީސް ޖިއާނީ އިންފަންޓީނޯ އަންގަވައިފި އެވެ. ނަމަވެސް، ވަކި މިންވަރެއް ދިނުމަށް އޭނާ އަދި އެއްބަހެއްނުވެ އެވެ.

އިޝްތިހާރު

ހަ ބައްރުގެ ކޮންފެޑަރޭޝަންތަކުގެ ރައީސުންނަށް ހޯމަ ދުވަހު އިންފަންޓީނޯ ފޮނުއްވި ސިޓީއެއްގައި ބުނެފައިވަނީ، މިކަމާ ގުޅޭ ދިރާސާ އޮކްޓޫބަރު 15 ގައި ބާއްވާ ފީފާ ކައުންސިލަށް ހުށަހަޅާނެ ކަމަށެވެ. އަދި އިތުރަށް ދޫކުރާ ކޮންމެ ފައިސާއަކީ މާލީ ގޮތުން ބަލަންޖެހޭ ކަންކަން ބަލައި، ރަސްމީކޮށް ފާސްކުރަންޖެހޭނެ ކަމެއް ކަމަށްވެސް އޭނާ ފާހަގަކުރެއްވި އެވެ.

”ދިރާސާކޮށް، ބޭނުންވާ ހުއްދަތައް ލިބުމުގެ ކުރިން އެއްވެސް އަދަދަކީ މެންބަރު އެސޯސިއޭޝަންތަކަށް ދިނުމަށް ކަނޑައެޅިފައިވާ އަދަދެއް ކަމުގައި ބަލައިގެން ނުވާނެ،“ – އިންފަންޓީނޯ –

ޔޫއެފްއާގެ ރައީސް އެލެކްސެންޑަރ ސެފެރިން އަދި ކޮންކާކަފްގެ ރައީސް ވިކްޓަރ މޮންޓަގްލިއާނީ މި މަހު ހުށަހެޅީ، މިހާރު ދެމުންދާ ތަރައްޤީގެ ފަންޑުގެ އިތުރުން، 2027 އިން 2030 އަށް ހިނގާ މުއްދަތުގެ ތެރޭގައި ފީފާގެ 211 މެންބަރު އެސޯސިއޭޝަނުން ކުރެ ކޮންމެ އެސޯސިއޭޝަނަކަށް މަދުވެގެން 10 މިލިއަން ޑޮލަރު ދިނުމަށެވެ.

މީގެ އިތުރުން ފީފާގެ ރިޒާވްގެ މިނިވަން ދިރާސާއެއް ކުރުމަށްވެސް އެ އެމީހުން އެދުނެވެ.

ސެޕްޓެމްބަރު 18 ގައި އެ ބޭފުޅުން ފޮނުއްވި ސިޓީގައި ވަނީ، 2026 ވަނަ އަހަރުގެ ނިޔަލަށް ފީފާގެ ރިޒާވްގައި ގާތްގަނޑަކަށް 6 ބިލިއަން ޑޮލަރު ހުންނާނެ ކަމަށް ލަފާކުރެވޭއިރު، އަމިއްލަ އިންވެސްޓްމަންޓްތައް ހޯދުމަށް ފީފާއިން ކުރިން ރޭވި ރޭވުން ބޭނުންތެރިތޯ ސުވާލު އުފައްދަވާފަ އެވެ.

އެ ބޭފުޅުން ވިދާޅުވި ގޮތުގައި، އެ ބޭފުޅުން ހުށަހެޅުއްވި ގޮތަށް ފައިސާ ބެހުމަށްފަހުވެސް ރިޒާވްގައި 1.5 ބިލިއަން ޑޮލަރަށްވުރެ ގިނަ ފައިސާ ހުންނާނެ އެވެ.

އިންފަންޓީނޯ ވަނީ ފަހުން ހުއްޓާލި ވިޔަފާރީގެ ޕްލޭން ދިފާޢުކުރައްވައި ވާހަކަދައްކަވާފަ އެވެ.

އޭނާ ވިދާޅުވީ އެ ޕްލޭންގެ ބޭނުމަކީ މިހާރު ހުރި ވަސީލަތްތަކުން ދެވޭ މިންވަރަށްވުރެ އިތުރު ފަންޑު ހޯދުން ކަމަށެވެ.

”މިހާރު ހުއްޓާލާފައިވާ ވިޔަފާރީގެ ހުށަހެޅުމުގެ މަޤްޞަދަކީ ފުޓްބޯޅައަށް ކުރާ އިންވެސްޓްމަންޓް އިތުރުކުރުން. އެއީ މިހާރު ހުރި ވަސީލަތްތަކުން ޒިންމާދާރުކަމާއެކު ފޯރުކޮށްދެވޭ އެހީތެރިކަމުގެ ބަދަލުގައި ކުރަން އުޅުނު ކަމެއް ނޫން، އެހެންކަމުން އެއީ މިހާރު ދެވޭ އެހީގެ އިތުރުން ލިބޭނެ އެއްޗެއް.“ އޭނާ ލިޔެފައިވެ އެވެ.

’ފީފާ ފޯވާޑް އެންޓަޕްރައިޒް‘ މަޝްރޫއު ޖުލައި މަހު ހުއްޓާލީ ޔޫއެފްއާ، ކޮންކާކަފް އަދި އޭޝިއަން ފުޓްބޯލް ކޮންފެޑަރޭޝަން ފަދަ އިދާރާތަކާ މަޝްވަރާނުކޮށް ކުރިއަށްގެންދާތީ ކުރިމަތިވި ދެކޮޅުވެރިކަމާ ގުޅިގެންނެވެ.

މި މައްސަލައާ ގުޅިގެން ފީފާގެ ހިންގުމުގެ ނިޒާމަށް ބަދަލުތަކެއް ގެނައުމަށް ގޮވާލާ އަޑުތައް ވަނީ ގަދަވެފަ އެވެ.

އިންފަންޓީނޯ ބުނީ ކޮންފެޑަރޭޝަންތަކުގެ ހުށަހެޅުންތައް ލިބުމުގެ ކުރިންވެސް، އިތުރު ތަރައްޤީގެ ފަންޑާއި އެހީތެރިކަން ފޯރުކޮށްދެވޭނެ ގޮތްތައް ފީފާގެ އިދާރާއިން ދިރާސާކުރަމުން ދިޔަ ކަމަށެވެ.