މެލޭޝިޔާގެ ކުރީގެ ބޮޑުވަޒީރުގެ އަނބިކަނބަލުން އުމުރުން 100 އަހަރުގައި އަވަހާރަވެއްޖެ

މެލޭޝިޔާގެ ކުރީގެ ބޮޑުވަޒީރު ޑރ. މަހާތީރު މުޙައްމަދުގެ އަނބިކަނބަލުން ސިތީ ޙަސްމާ މުޙައްމަދު ޢަލީ، އުމުރުން 100 އަހަރުގައި އަވަހާރަވެއްޖެ އެވެ.

ކުރީގެ ފަސްޓް ލޭޑީ ސިތީ ޙަސްމާ ފާހަގަކުރެވިފައި ވަނީ ޢާންމު ޞިއްޙަތު ކުރިއެރުވުމަށް ކުރެއްވި މަސައްކަތްޕުޅުތަކާއި، މެލޭޝިޔާގައި އެންމެ ގިނަ ދުވަހު ބޮޑުވަޒީރުކަން ކުރެއްވި މަހާތީރު މުޙައްމަދާއެކު ދިގު މުއްދަތަކަށް ދެމިގެންދިޔަ ގާތް ގުޅުމުގެ ސަބަބުންނެވެ.

އިޝްތިހާރު

މެލޭޝިޔާގެ ކުރީގެ ބޮޑުވަޒީރު މަހާތީރު މުޙައްމަދުގެ އޮފީހުން ކަށަވަރުކޮށްދީފައިވާ ގޮތުގައި، އެކަމަނާ އަވަހާރަވީ އުމުރުން 100 އަހަރުގަ އެވެ. އެ ދެކަނބަލުންގެ ދަރިކަލުން މުޚްޒަނީ މަހާތީރާ ހަވާލާދީ ދައުލަތުގެ ނިއުސް އެޖެންސީ ”ބާނާމާ“ އިން ރިޕޯޓްކޮށްފައިވާ ގޮތުގައި، އެކަމަނާ އަވަހާރަވީ ކުއާލަލަމްޕޫރުގެ ނޭޝަނަލް ހާޓް އިންސްޓިޓިއުޓްގަ އެވެ.

ސިތީ ޙަސްމާއަކީ އަމިއްލަގޮތުންވެސް ރައްޔިތުންގެ ލޯތްބާއި އިޙްތިރާމް ހޯއްދަވާފައިވާ ބޭފުޅެކެވެ.

އެކަމަނާގެ މަޑުމައިތިރި މިޒާޖާއި، އޯގާތެރިކަމާއި، ހިތްހެޔޮކަން ފާހަގަކުރެވޭއިރު، މިއީ ފިރިކަލުން މަހާތީރުގެ ހަރުކަށި ސިޔާސީ އުސްލާ މުޅިން ތަފާތު ސިފަތަކެކެވެ.

ސިޔާސީ ގޮތުން ނުފޫޒުގަދަ ބޭފުޅެއްގެ އަނބިކަނބަލެއްގެ ގޮތުގައި އެތައް އަހަރެއް ހޭދަކުރެއްވިއިރު، އެކަމަނާ ވަނީ ޢާންމު ޞިއްޙަތުގެ ޕްރޮގްރާމްތަކާއި، ޢާއިލާ ރޭވުމުގެ މަސައްކަތްތަކާއި، އިޖުތިމާޢީ އެކި ކަންކަމުގައި މުހިންމު ދައުރެއް އަދާކުރައްވާފަ އެވެ.

ހަތް ދަހަރުގެ ގާތް ގުޅުމެއް

އެ ދެކަނބަލުން އެންމެ ފުރަތަމަ ބައްދަލުވެވަޑައިގަތީ 1940 ގެ އަހަރުތަކުގެ ފަހުކޮޅު ސިންގަޕޫރުގައި މެޑިކަލް ކިޔަވަން އުޅުއްވި ދުވަސްވަރު އެވެ.

މިއަހަރުގެ އޯގަސްޓް މަހު ކައިވެންޏަށް 70 އަހަރު ފުރުން ފާހަގަކުރި މި ދެކަނބަލުންނަށް ހަތް ބޭފުޅުން ލިބިވަޑައިގެންފައިވެ އެވެ.

އޭގެ ތެރޭގައި ވިޔަފާރިވެރިޔާ މުޚްޒަނީ އާއި، އިޖުތިމާޢީ ހަރަކާތްތެރިޔާ މަރީނާ މަހާތީރު އަދި މަޝްހޫރު ސިޔާސީ ބޭފުޅެއް ކަމަށްވާ މުޚްރިޒް މަހާތީރު ހިމެނިވަޑައިގަންނަވަ އެވެ.

އުމުރުފުޅުން 101 އަހަރުގެ މަހާތީރު އަބަދުވެސް ސިފަކުރައްވާ ގޮތުގައި، އެމަނިކުފާނުގެ ސިޔާސީ ޙަޔާތުގެ އެންމެ ބޮޑު ތަނބަކީ އަނބިކަނބަލުންނެވެ.

ޚާއްޞަކޮށް، މެލޭ ނަސްލުގެ އަންހެނުންނަށް މަތީ ތަޢުލީމުގެ ފުރުޞަތުތައް ނުހަނު މަދު ޒަމާނެއްގައި، ޔުނިވަރސިޓީ ތަޢުލީމު ހާސިލުކުރެއްވުމަށް އެކަމަނާ ކުރެއްވި ވަރުގަދަ އަޒުމަށް މަހާތީރު އަބަދުވެސް ނުހަނު އިޙްތިރާމާއެކު ތަޢުރީފު ކުރައްވައެވެ.