ރިޔާޟް ސީޒަން 2026، އޮކްޓޫބަރު 21 ގައި ފަށަނީ

ރިޔާޟް ސީޒަން 2026 އަންނަ އޮކްޓޫބަރު މަހުގެ 21 ވަނަ ދުވަހު ފެށުމަށް ހަމަޖެހިފައިވާ ކަމަށާއި، 10 ހަފުތާގެ މުއްދަތަށް ކުރިއަށްދާ މި ސީޒަނުގައި ތަފާތު އެކި މުބާރާތްތަކާއި، މިއުޒިކީ ޝޯތަކާއި، ފަންނީ ހުށަހެޅުންތަކުގެ އިތުރުން މުނިފޫހިފިލުވުމުގެ ގިނަ ހަރަކާތްތަކެއް ހިމެނޭނެ ކަމަށް ސަޢޫދީ ޢަރަބިއްޔާގެ ޖެނެރަލް އެންޓަޓެއިންމަންޓް އޮތޯރިޓީ (ޖީ.އީ.އޭ) ގެ ބޯޑު އޮފް ޑައިރެކްޓަރުންގެ ޗެއާމަން ތުރުކީ އާލް އައްޝައިޚް ހޮނިހިރު ދުވަހު އިޢުލާން ކުރައްވައިފި އެވެ.

އާލް އައްޝައިޚް މިކަން ހާމަކުރެއްވީ މި ސީޒަނުގެ ކުޅިވަރާއި، މުނިފޫހިފިލުވުމާއި، ފަންނީ ހަރަކާތްތަކުގެ މަޢުލޫމާތު ހިމެނޭ ޕްރޮމޯޝަނަލް ވީޑިއޯއެއް މެދުވެރިކޮށެވެ.

އިޝްތިހާރު

އޭނާ ވިދާޅުވި ގޮތުގައި މި ހަރަކާތްތަކުގެ ސަބަބުން، ދުނިޔޭގެ އެކި ކަންކޮޅުތަކުން މީހުން ޒިޔާރަތްކުރާ ބޮޑެތި ޙަރަކާތްތައް ބާއްވާ މުހިންމު މަންޒިލެއްގެ ގޮތުގައި ރިޔާޟްގެ މަޤާމު އިތުރަށް ވަރުގަދަވެގެންދާނެ އެވެ.

ސަޢޫދީ ޕްރެސް އެޖެންސީ (އެސް.ޕީ.އޭ) އިން ވެސް ވަނީ މި ޚަބަރު ރިޕޯޓްކޮށްފަ އެވެ.

ހަތްވަނަ ފަހަރަށް ބާއްވާ މި ސީޒަނުގެ ހަރަކާތްތަކުގެ ތެރޭގައި ބޮކްސިން އާއި ރެސްލިންގެ މެޗުތަކާއި، ޔޫ.އެފ.ސީ ކުރިމަތިލުންތަކުގެ އިތުރުން ’ސިކްސް ކިންގްސް ސްލޭމް‘ ޓެނިސް މުބާރާތް ވެސް ހިމެނެ އެވެ.

މީގެ އިތުރުން މިއުޒިކީ ކޮންސަޓްތަކާއި، ތިއޭޓަރިކަލް ޝޯތަކާއި ކޮމެޑީ ހުށަހެޅުންތައް ވެސް ކުރިއަށްދާނެ އެވެ.

މި ސީޒަނުގެ މައިގަނޑު އެއް ސަރަހައްދުގެ ގޮތުގައި ’ބޮލެވާޑް ވޯލްޑް‘ އަލުން ހުޅުވޭއިރު، އެތަނުން ދުނިޔޭގެ އެކި ސަގާފަތްތަކާއި މަޝްހޫރު މަންޒިލްތައް އެއްތަނަކުން ފެނިގެންދާނެ އެވެ. އަދި ’ބޮލެވާޑް ސިޓީ‘ އާ އުސްމިންތަކަކާއެކު ހުޅުވޭއިރު، ’ވޮންޑަރ ގާޑަން‘ އިން ތަފާތު ކުޅިވަރުތަކާއި ހަރަކާތްތައް ތަޖުރިބާކޮށްލެވޭނެ އެވެ.

މީގެ އިތުރުން ’ދަ ގްރޯވްސް’، ’ފާމާސް މާކެޓް’، އަދި ވިއާ ރިޔާޟްގައި ބާއްވާ ’އަނާ ޢަރަބިއާ‘ މައުރަޒުގެ އިތުރުން ސަޢުދީގެ ވެރިރަށުގެ އެކި ސަރަހައްދުތަކުގައި ގިނަ ހަރަކާތްތަކެއް ކުރިއަށްދާނެ އެވެ.