ލަންކާ ކޯޗު ވަކިކޮށްފި

އޭއެފްސީ 20 އަހަރުން ދަށުގެ އޭޝިއަން ކަޕް ކޮލިފައިންގައި ދިވެހިރާއްޖެއާ ދެކޮޅަށް ކުޅުނު މެޗަށްފަހު، ސްރީލަންކާގެ 20 އަހަރުން ދަށުގެ ގައުމީ ޓީމުގެ ކޯޗިން ސްޓާފަކު ހިންގި ބަލައިނުގަނެވޭފަދަ ޢަމަލުތަކާ ގުޅިގެން، ފުޓްބޯލް ފެޑަރޭޝަން އޮފް ސްރީލަންކާ (އެފް.އެފް.އެސް.އެލް) އިން ވަގުތުން ފިޔަވަޅު އަޅައިފި އެވެ.

މިގޮތުން، އެ ފެޑަރޭޝަނުން ބަލައިނުގަނެވޭނެ ފަދަ އަޚްލާޤީ މައްސަލައެއްގައި، 20 އަހަރުން ދަށުގެ ޤައުމީ ޓީމުގެ އެސިސްޓަންޓް ކޯޗު ވަނީ ވަގުތުން މަޤާމުން ވަކިކޮށްފަ އެވެ.

އިޝްތިހާރު

އެފް.އެފް.އެސް.އެލްގެ ރައީސް ޖަސްވާރު އުމަރު ވިދާޅުވި ގޮތުގައި،އަޚްލާޤީ މިންގަނޑުތަކާ ޚިލާފު އެއްވެސް ޢަމަލަކަށް، ޚާއްސަކޮށް ޤައުމީ ޓީމުގެ ޒުވާން ކުޅުންތެރިންނާއެކު މަސައްކަތްކުރާ އިރު، އެއްވެސް މިންވަރަކަށް ދޫނުދެއްވާނެ އެވެ.

މި ހާދިސާއާ ގުޅޭ ރަސްމީ ބަޔާނެއް ވަރަށް އަވަހަށް ނެރުމަށް ހަމަޖެހިފައިވާ ކަމަށްވެސް އެ ފެޑަރޭޝަނުން ވަނީ ހާމަކޮށްފައެވެ.

ސްރީލަންކާގެ ފުޓްބޯޅައިގެ ދާއިރާގައި މަސައްކަތްކުރާ ފަރާތްތަކުން މި ނިންމުމަށް މަރުހަބާ ކިޔާފައިވާއިރު، ގިނަ ބަޔަކު ވަނީ ކުޅިވަރުގެ ތެރޭގައިއަޚްލާޤީ ސުލޫކާއި ފަންނީ މިންގަނޑުތައް ހިފެހެއްޓުމުގެ މުހިންމުކަން ފާހަގަކޮށްފަ އެވެ.